«ستۋدەنتتىك جاتاقحانالاردا جاڭا ورىنداردى بەرۋ ەلىمىزدىڭ بارلىق وڭىرىندە جۇزەگە اسىرىلىپ جاتىر. بەرىلگەن جاتاقحانالار بويىنشا كوشباسشىلار قاتارىندا نۇر-سۇلتان قالاسى – 4 060 ورىنعا شاقتالعان 6 جاتاقحانا, شىعىس قازاقستان وبلىسى –10 جاتاقحانا (2 926 ورىن), الماتى قالاسى – 11 جاتاقحانا (2 698 ورىن), شىمكەنت قالاسى – 9 جاتاقحانا (2 434 ورىن) پايدالانۋعا بەردى. ال باتىس قازاقستان, اقتوبە, سولتۇستىك قازاقستان جانە تۇركىستان وبلىستارىنداعى جاتاقحانالاردا پايدالانۋعا بەرىلگەن ورىن سانى از بولىپ وتىر», دەدى ءبىلىم جانە عىلىم مينيسترلىگىنىڭ «قارجى ورتالىعى» اق پرەزيدەنتى اسقار يبرايموۆ.
ستۋدەنتتىك جاتاقحانالار مەملەكەت-جەكەشەلىك ارىپتەستىك قاعيداتى بويىنشا سالىنىپ, ولاردىڭ قۇرىلىسىنا ينۆەستورلار بەلسەندى تارتىلىپ جاتىر.
سونىمەن قاتار جەكە ينۆەستورلاردى قوسىمشا ىنتالاندىرۋ ءۇشىن جاتاقحانالارعا اسا قاجەتتىلىك بايقالاتىن نۇر-سۇلتان جانە الماتى قالالارىندا مەملەكەتتىك تاپسىرىس كولەمىن 47 اەك-تەن 92 اەك-كە دەيىن ۇلعايتۋ ۇسىنىلادى. بۇل باعىتتا مينيسترلىك تاراپىنان عيماراتتاردى قايتا قۇرۋ تۋرالى 14-تەن استام مەموراندۋم جاسالدى.
جالپى, 2021-2022 جىلدارى بەكىتىلگەن جوسپارعا سايكەس جوعارى وقۋ ورىندارىنىڭ جاتاقحانالارىندا تاعى 55 مىڭ جاڭا ورىن پايدالانۋعا بەرىلەدى.
ەلباسى نۇرسۇلتان نازارباەۆ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندە ستۋدەنتتەردىڭ ءومىر ءسۇرۋ جاعدايىن جاقسارتۋدى جانە 2022 جىلدىڭ سوڭىنا دەيىن كەمىندە 75 مىڭ ورىنعا شاقتالعان جاڭا ستۋدەنتتىك جاتاقحانالار سالۋدى قامتاماسىز ەتۋدى تاپسىرعانىن ايتا كەتكەن ءجون. بۇل ستۋدەنتتەردى تۇرعىن ۇيمەن قامتاماسىز ەتۋ ماسەلەسىن تولىق شەشۋگە مۇمكىندىك بەرەدى.
