سۋرەت: قفب
بۇل كەزدەسۋ 10 شىلدە كۇنى الماتىدا ءوتۋى كەرەك بولاتىن. بىراق ميحايل كوحانچيكتى بەلگىسىز بىرەۋلەر پىشاقتاپ كەتكەن. ول قازىر جانساقتاۋ بولىمىندە ەكەن.
«بۇل جەكپە-جەكتىڭ وتپەيتىنىن حابارلاعىم كەلىپ وتىر. ماعان ميحايل كوحانچيكتى پىشاقتاپ كەتكەنى تۋرالى حابار كەلدى. قازىر ول جانساقتاۋ بولىمىندە. تەز جازىلىپ كەتۋىنە تىلەكتەسپىن», دەپ جازدى داۋرەن ەلەۋسىنوۆ الەۋمەتتىك جەلىسىندەگى پاراقشاسىندا.
ەلەۋسىنوۆ سوڭعى جەكپە-جەگىن 2020 جىلدىڭ تامىزىندا مەكسيكالىق حۋان كارلوس رايگوساعا قارسى وتكىزىپ, تورەشىلەردىڭ شەشىمىمەن جەڭىلىپ قالعان ەدى. داۋرەن ەلەۋسىنوۆ وليمپيادا چەمپيونى دانيار ەلەۋسىنوۆتىڭ تۋعان اعاسى.
ال كوحانچيك ءساۋىر ايىندا قازاقستان اتىنان شىعاتىن تاعى ءبىر بوكسشى, ايان اعابەكپەن كەزدەسىپ, نوكاۋتپەن جەڭدى. اۋەسقويلار اراسىندا ول 2017 جىلى قازاقستان چەمپيوناتىندا جانىبەك ءالىمحان ۇلىن جەڭىپ كەتكەن بولاتىن.
