«مەملەكەتتىك ساياساتتىڭ باستى قاعيداسى بۇگىندە – بۇل تۇراقتىلىق, جۇيەلىلىك جانە ساباقتاستىق ەكەنىن ەسكە سالامىن. مەنىڭ مىندەتىم – ءىزاشارلارىم باستاعان جوبالار مەن جاڭاشىلدىقتاردى جالعاستىرۋ, پرەزيدەنت جاريا ەتكەن رەفورمالارمەن ۇيلەسەتىن ءوز باستامالارىمدى ۇسىنۋ, وڭ دۇنيەلەردى جاقسارتىپ, كەم-كەتىكتەردى تۇزەتۋ.
مەن جاڭا باسشىنىڭ كەلۋىمەن قانداي دا ءبىر مەملەكەتتىك قۇرىلىم جاھاندىق وزگەرىستەرگە ۇشىراۋى كەرەك دەپ سانامايمىن», دەدى مينيستر.
ايدا بالاەۆا وتاندىق مەدياداعى باستى وزگەرىستەر: مەملەكەتتىك اقپاراتتىق تاپسىرىستى رەفورمالاۋ, اقپاراتتىق جانە ازاماتتىق قوعام سالاسىندا جاڭا زاڭدار قابىلداۋ جانە جۋرناليستەردى وقىتۋ جوبالارى ەكەنىن اتاپ ءوتتى.
«دەسە دە ەڭ ماڭىزدىلاردىڭ ءبىرى سانالاتىن جانە اقپارات سالاسىن دامىتۋعا عانا ەمەس, الەۋمەتتىك قۇرامى بار, ۇلتتىق قاۋىپسىزدىكتىڭ كەيبىر ماسەلەلەرىن شەشەتىن ءبىر جۇمىستى اتاپ وتكىم كەلەدى. ناقتىراق ايتساق, 2021 جىلدىڭ سوڭىنا دەيىن قازاقستاننىڭ شەكارا ماڭى وڭىرلەرىندە 107 راديو تاراتقىش ورناتىلادى. بۇل Qazaq radiosy مەن شالقار راديوسىنىڭ حابار تاراتۋىنا مۇمكىندىك بەرەدى. سونىڭ ارقاسىندا 630 مىڭنان استام حالقى بار, تۇركىستان, جامبىل جانە شىعىس قازاقستان وبلىستارىنىڭ شەكارا ماڭى اۋماعىنداعى 400-دەن اسا اۋىل وتاندىق راديونى تىڭدايدى. ال جالپى جول كارتاسىن جۇزەگە اسىرۋ اياسىندا 2025 جىلعا قاراي شەكارا ماڭى وڭىرلەرىندە تۇراتىن حالىقتىڭ 95%-ى راديوباعدارلامالارمەن قامتىلادى.
بۇل وڭىرلەردە ۇزاق جىلدار بويى تەك قىتاي, رەسەي جانە وزبەك راديوسى حابار تاراتقانىن ەسكەرسەك, شەكارالاس اۋماقتاردى وتاندىق راديوسيگنالدارمەن قامتۋ جوباسى ستراتەگيالىق ماڭىزعا يە», دەپ مالىمدەدى مينيستر.
سونداي-اق قازىر پاندەمياعا بايلانىستى تۋىنداعان كەيبىر قيىندىقتارعا قاراماستان, بەيىندى جوعارى وقۋ ورىندارىمەن (ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, ءال-فارابي اتىنداعى قازاق ۇلتتىق ۋنيۆەرسيتەتى, حالىقارالىق اقپاراتتىق تەحنولوگيالار ۋنيۆەرسيتەتى, س.د.اسفەندياروۆ اتىنداعى قازاق ۇلتتىق مەديتسينا ۋنيۆەرسيەتى) ەتەنە ىنتىماقتاسا جۇمىس ىستەپ جاتقانىن, ستۋدەنتتەرگە ەلدىڭ ۇزدىك رەداكتسيالارىندا پراكتيكادان وتۋگە مۇمكىندىك بەرىپ, وتاندىق جانە تۇركيا, ۇلىبريتانيا, رەسەي سياقتى شەتەلدىك جۋرناليستيكانىڭ كوريفەيلەرىمەن سەمينار وتكىزىلەتىنىن اتاپ ءوتتى.
ءمينيستردىڭ ايتۋىنشا, جىل باسىنان بەرى مەديتسينا, ءدىني جانە ەكولوگيا جۋرناليستيكاسى بويىنشا ءۇش وقىتۋ كۋرسى وتكىزىلىپ, ەلدىڭ بارلىق وڭىرىنەن 4 مىڭعا جۋىق ادام قامتىلدى. بۇل بولاشاقتا كەڭەيتىلىپ, جەتىلدىرەتىن ۇزاق مەرزىمدى جوبالار.
«قازاقستان ازاماتتارى ءوز وتانىن دامىتۋعا ۇلەس قوسادى, الەۋمەتتىك جانە ازاماتتىق جاۋاپكەرشىلىك ارتىپ كەلەدى, جوعارى وقۋ ورىندارىنىڭ ستۋدەنتتەرى ۇزدىك الەمدىك ستاندارتتار بويىنشا مەملەكەتتىك تىلدە وقۋ مۇمكىندىگىنە يە, ەلدىڭ قاسيەتتى جەرلەرىنە باراتىن ادامدار سانى ارتۋدا.
بيىل «رۋحاني جاڭعىرۋ»باعدارلاماسىن ۇلتتىق جاڭعىرۋ كەزەڭىنە كوشىرۋ جول كارتاسى بەكىتىلدى. جوسپارلانعان شارالار مەن جوبالار جاس ەرەكشەلىكتەرىنە ساي ازىرلەندى, ماقساتى – باعدارلاما مازمۇنىن حالىقتىڭ ءتۇرلى توپتارىنا جەتكىزۋ», دەدى ايدا بالاەۆا.
