اقىندار مەن باتىرلارعا باي تارباعاتايدى تاريحي, شەجىرەلى ولكە دەيتىنىمىز – ايگىلى ىرعىزباي بابانىڭ كەسەنەسى سوندا. بورىتوستاعان تاۋى دا تارباعاتاي دالاسىنىڭ توسىندە جاتىر.
شەجىرەلى توپىراقتا ءوسىپ-ونگەن ونەرپازداردان قۇرالعان 22 شىعارماشىلىق ۇجىم بار بۇگىندە. مادەنيەت وشاقتارىنىڭ سانى دا جيىرمادان اسىپ جىعىلادى. ساننان بۇرىن ساپا بار مۇندا. وڭىردەن كۇمىس كومەي ءانشى دە, داۋلەسكەر كۇيشى دە شىققان. سۋرەتشىلەر مەن قولونەر شەبەرلەرىنىڭ جۇمىستارى دا تاڭداي قاقتىرادى.
وسكەمەندىكتەر تارباعاتاي اۋدانىنىڭ دارىندارىن ونەر مۋزەيىندە تاماشالادى. كورمەدە اۋداننىڭ بەلگىلى سۋرەتشىلەر ديناستياسى الىبەك, ادىلەت شوقانوۆتاردىڭ پەيزاج جانرىنداعى جۇمىستارى, سۋرەتشىلەر ەركەبۇلان جاكىشەۆتىڭ «كۇمىس جاڭبىر», مەيىر جەتپىسوۆتىڭ «تۋعان جەر», ەركىن سۇلەيمەنوۆتىڭ «ابىلاي حان» كارتينالارىنا قاراپ, قازاق دالاسىنا ساپار شەككەندەي كۇيدە بولاسىز. قولونەر شەبەرلەرى ەلامان قۇجيمانوۆتىڭ ۇلتتىق اسپاپتارى, مارات ابىلقاسىموۆ, رينات سالمەنوۆتىڭ ات ابزەلدەرى, اينۇر جۇمابەكقىزى مەن جانسايا ابىلعازينوۆانىڭ ۇلتتىق قولونەر بۇيىمدارى شىنايى شەبەرلىكپەن جاسالعانى كورىنىپ تۇر.
تارباعاتاي اۋدانى ەجەلدەن جىراۋلار مەن التاي-تارباعاتاي ءان-كۇي ءداستۇرلى مەكتەبىنىڭ ورداسى بولعاندىقتان, فەستيۆالدا «بابالار سازى» ەتنو توبى, ءداستۇرلى ءانشى ايان سادۋاقاسوۆ ونەر كورسەتتى.
ايتا كەتسەك, تارباعاتايدىڭ كورمەسى 27 ماۋسىمعا دەيىن جالعاسادى. الداعى ۋاقىتتا اۋداندار اراسىندا ءوتىپ جاتقان «دالا ديدارى» بايقاۋىنىڭ قازىلار القاسى ۇزدىك جۇمىستاردى تاڭداپ, ماراپاتتايتىن بولادى.
وسكەمەن
