اگروونەركاسىپ كەشەنىندە جۇمىس ىستەيتىن نيدەرلاندى كومپانيالارىنىڭ باسشىلارىنان قۇرالعان ارنايى دەلەگاتسيا جۇمىس ساپارىمەن قازاقستانعا كەلدى. ينۆەستورلار ءبىر اپتا ىشىندە جاڭا ينۆەستيتسيالىق جوبالاردى ىسكە اسىرۋ بويىنشا بىرقاتار كوممەرتسيالىق قۇجاتقا قول قويۋدى, سونداي-اق وڭىرلەردىڭ ينۆەستيتسيالىق مۇمكىندىكتەرىمەن تانىسۋدى جوسپارلاپ وتىر.
دەلەگاتسيا قۇرامىندا Food Ventures, KUBO, Van Der Hoeven, Certhon, Gakon, Dalsem سىندى بەسىنشى جانە التىنشى بۋىنداعى جىلىجاي ءوندىرىسى سالاسىنداعى ءىرى كومپانيالاردىڭ باسشىلارى بار. سونىمەن قاتار دەلەگاتسيا قۇرامىنا زاماناۋي اۋىل شارۋاشىلىعى جابدىقتارىن شىعارۋمەن اينالىساتىن Hoogendoorn, Svensson, Gاkon, Priva كومپانيالارىنىڭ باسشىلارى كىرگەن. بۇدان بولەك, وسىمدىكتەردى بيولوگيالىق قورعاۋ قۇرالدارىن وندىرەتىن Koppert Biological Systems, تۇقىم ءوندىرۋ بويىنشا كوش باستاپ تۇرعان Solynta, Rijk Zwaan جانە Dutch Greenhouse Delta, HVA International قاۋىمداستىقتارىنىڭ باسشىلارى بار.
جۇمىس ساپارى اياسىندا ەكى ەلدىڭ بيزنەس وكىلدەرىنىڭ قاتىسۋىمەن دوڭگەلەك ۇستەل ءوتتى. ءىس-شارا بارىسىندا نيدەرلاندى كومپانيالارى زاماناۋي اگروونەركاسىپ كەشەنىن دامىتۋ, تۇراقتى اۋىل شارۋاشىلىعىنا كوشۋ جانە وزىق تسيفرلى تەحنولوگيالاردى, سونىڭ ىشىندە جاساندى ينتەللەكت پەن Big Data تەحنولوگياسىن پايدالانا وتىرىپ, جاڭا سەلەكتسيالىق شەشىمدەردى ەنگىزۋ تۋرالى وي-پىكىرلەرىمەن ءبولىستى.
قازاقستان رەسپۋبليكاسىنىڭ نيدەرلاندى كورولدىگىندەگى ەلشىسى اسقار جۇماعاليەۆتىڭ ايتۋىنشا, ساياسات سالاسىندا دا, ەكونوميكالىق كووپەراتسيادا دا ەكى ەل اراسىنداعى سەنىمدى بايلانىستاردىڭ ورناۋىندا ءوزارا دوستىق قارىم-قاتىناستاردىڭ ماڭىزى زور. ساپار اياسىندا جالپى سوماسى 200 ملن ەۋرونى نەمەسە 100 ملرد تەڭگەنى قۇرايتىن 6 مەموراندۋمعا قول قويىلدى.
– KAZAKH INVEST ۇلتتىق كومپانياسى تاراپىنان نيدەرلاندى كورولدىگىندەگى قازاقستان ەلشىلىگىمەن ينۆەستيتسيالىق ىنتىماقتاستىقتى دامىتۋ جانە نىعايتۋ بويىنشا جۇيەلى جۇمىس جۇرگىزىلۋدە. ماسەلەن, وسى باعىتتاعى نەگىزگى درايۆەرلەردىڭ قاتارىنا ەنەرگەتيكالىق سەكتوردان بولەك, اگروونەركاسىپ سەكتورى دا قوسىلۋى ءتيىس. نيدەرلاندىلىق كومپانيالار بىزگە تىكەلەي ينۆەستيتسيا سالۋ تۇرعىسىنان دا, وزىق تەحنولوگيالار ترانسفەرتى تۇرعىسىنان دا, سونداي-اق مەملەكەت, بيزنەس, عىلىم جانە ءبىلىم بەرۋدىڭ تابىستى ىنتىماقتاستىعى تۇرعىسىنان دا قىزىقتى, – دەيدى Kazakh invest ۇك اق باسقارما توراعاسى مەيىرجان يۋسۋپوۆ.
نيدەرلاندىلىق دەلەگاتسيا الماتى, اقتوبە جانە باتىس قازاقستان وبلىستارىنا بارماق. وندا جوبالاردى ىسكە اسىرۋدىڭ ءمان-جايىن تالقىلاۋ ماقساتىندا ءوڭىر باسشىلارىمەن جانە وڭىرلىك بيزنەس قوعامداستىقپەن كەزدەسۋلەر وتەدى. باتىس قازاقستان وبلىسىنا جۇمىس ساپارى اياسىندا نيدەرلاندىلىق Van Der Hoeven كومپانياسىنىڭ قاتىسۋىمەن جىلىجاي كەشەنىنىڭ قۇرىلىسى بويىنشا جاڭا جوبانىڭ ىرگەتاسى قالانادى. جوباعا سالىناتىن ينۆەستيتسيا كولەمى 35 ملن دوللارعا تەڭ.
