تالعات بايسۋفينوۆ باپتايتىن قازاقستان قۇراماسىنا بۇل كەزدەسۋدە تابلوداعى كورسەتكىشتەن بۇرىن, قوسالقى قۇرامداعى جانە قۇراماعا جاڭادان شاقىرىلعان فۋتبولشىلاردى كۇزدەگى نەگىزگى ماتچ الدىندا سىناقتان وتكىزىپ الۋ ماڭىزدى بولدى. دەگەنمەن ءبىرىنشى تايمدا نەگىزگى قۇرامدا جاڭا ويىنشىلاردان ەركىن تاپالوۆ شىققانىمەن, وزگە ويىنشىلاردىڭ بارلىعى تەگىس ۇلتتىق قۇراما نامىسىن قورعاپ جۇرگەن بولاتىن. ءبىرىنشى تايمنىڭ العاشقى 30 مينۋتىن ءتاۋىر وتكىزگەن جەرلەستەرىمىز ماتچتىڭ 34-مينۋتىندا ابزال بەيسەبەكوۆ ءوز الاڭىمىزدا ءتارتىپ بۇزىپ, تورەشى 11-مەترلىك ايىپ دوبىن بەلگىلەدى. پەنالتيدى ءساتتى ورىنداعان ەگزيان اليوسكي ەسەپتى اشتى. ال ءبىرىنشى تايم اياقتالار تۇستا سەرىكجان مۇجىقوۆ قارسىلاس ويىنشىسىنا قارسى ورەسكەل ءتارتىپ بۇزعانى ءۇشىن باس تورەشى تاراپىنان «قىزىل قاعازبەن» جازالانىپ, الاڭنان قۋىلدى.
ەكىنشى تايم باسىندا باس باپكەر قاقپاشى ستاس پوكاتيلوۆتىڭ ورنىنا مۇحاممەدجان سەيسەندى, رۋسلان ءۆاليۋليننىڭ ورنىنا عافۇرجان سۇيىمباەۆتى, الەكسەي ششەتكيننىڭ ورنىنا رومان مۇرتازاەۆتى الاڭعا شىعارسا, كەيىننەن الىبەك قاسىم, باۋىرجان بايتانا, ميحايل گابىشەۆ سەكىلدى ۇلتتىق قۇراماعا جاڭادان كەلگەن ويىنشىلاردى ماتچقا ارالاستىردى. وكىنىشكە قاراي, كەيبىر جاس ويىنشىلاردىڭ ۇلتتىق قۇراما دەڭگەيىندە ويناۋىنا ءالى ەرتە ەكەنى بايقالىپ قالدى. ءبىرىنشى تايمدا ارەڭ دەگەندە پەنالتيدەن گول سوققان الاڭ يەلەرى ەكىنشى تايمدا قاقپامىزعا تاعى جاۋاپسىز ءۇش گول سالدى. بۇعان س.مۇجىقوۆتىڭ الاڭنان قۋىلۋى دا سەبەپ بولعانى انىق. قورىتىندى ەسەپ – 4:0.
