جاستاردىڭ بۇگىنگى القالى جيىنىنىڭ مەملەكەتتىك رامىزدەر كۇنىمەن تۇسپا-تۇس كەلۋىنىڭ سيمۆولدىق ءمانى بار دەپ ويلايمىن. مەملەكەتتىك رامىزدەر – ەگەمەندىكتىڭ مارتەبەلى نىشانى بولسا, جاستار – ەلدىكتىڭ كەمەل كەلەشەگىنىڭ كەپىلى.
سونىمەن بىرگە فورۋم ءبارىمىز ءۇشىن قاستەرلى دە قاسيەتتى مەرەكە تاۋەلسىزدىكتىڭ 30 جىلدىعى اياسىندا ءوتىپ وتىر.
تاۋەلسىزدىك – ءبىز ءۇشىن ءتاۋ ەتەر جالعىز كيەمىز! تاۋەلسىزدىك – اتا-بابامىزدىڭ عاسىرلار بويعى اڭسار-ارمانى, ءبىزدىڭ ۇلتتىق يدەيامىز! سوندىقتان ەل ەرتەڭى جاستار ءۇشىن تاۋەلسىزدىكتەن اسقان اسقاق مۇرات, اسقارالى قۇندىلىق بولماۋى ءتيىس. كەزىندە تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆ: «جاس قازاقستاندىق ازاماتتار دەگەنىمىز – تەك قۇقىق قانا ەمەس, ءبىرىنشى كەزەكتە ءوزى, ءوزىنىڭ وتباسى جانە ءبىزدىڭ وتانىمىز ءۇشىن جاۋاپكەرشىلىك ەكەنىن ەستە ۇستاۋلارى كەرەك», دەگەن ەدى. بۇگىندە حالقىمىزدىڭ جيىرما پايىزىن 14 پەن 29 جاس ارالىعىنداعى جاستار قۇرايدى. ال بالالار مەن جاسوسپىرىمدەردى قوسا ەسەپتەسەك, بۇگىنگى قازاقستاندىقتاردىڭ جارتىسى جاستار ەكەنىن كورەمىز. وسى تۇرعىدان العاندا, ءبىز – تاريحى تەرەڭ, بولاشاعى جارقىن, بويىن جاستىق جالىنى شارپىعان قۋاتتى ۇلتپىز دەۋگە تولىق نەگىز بار.
ەندەشە, باردى باعالاپ, جوقتى سارالاپ, تاۋبەمىزدەن جاڭىلماي, تاۋەكەلدەن تايىنباي, تاۋەلسىزدىكتىڭ تاسىن ورگە بىرگە سۇيرەيىك, قادىرلى جاس دوستار!
مەملەكەت باسشىسى قاسىم-جومارت كەمەل ۇلى توقاەۆ ء«ححى عاسىرداعى قازاقستاندى بيىك بەلەستەرگە سىزدەر سياقتى ءبىلىمى وزىق, ويى ۇشقىر جاستار باستاۋى كەرەك» دەپ جاستاردىڭ الدىنا ايقىن مىندەت بەلگىلەپ بەردى. پرەزيدەنت ء«بىزدىڭ ەلىمىزدە «جاۋاپتى مەملەكەت, جاۋاپتى قوعام, جاۋاپتى ادام جۇيەسى بەرىك ورنىعۋى كەرەك» دەگەن ۇستانىمىن ەرەكشە اتاپ ءوتتى. جانە دە مەملەكەتىمىز بۇگىندە ءوز تاراپىنان ءار سالادا كوش باستاپ, جەتىستىككە جەتىپ جۇرگەن جاستاردى ەلگە تانىتىپ, ولارعا قولداۋ كورسەتۋ شارالارىن جۇيەلى تۇردە جۇرگىزىپ كەلەدى. جوعارى ينتەللەكت سالتانات قۇرعان, اقىل-پاراسات الەۋەتى الدىڭعى قاتارعا شىققان جاڭا داۋىردە بۇل اسا ماڭىزدى جۇمىس.
بۇگىنگى تاڭدا ەلىمىزدە «رۋحاني جاڭعىرۋ» باعدارلاماسىن ۇلتتىق جاڭعىرۋعا ۇلاستىرۋ بويىنشا ناقتى شارالار قابىلدانۋدا. بۇل جاڭعىرۋلار ەڭ اۋەلى, ەلىمىزدىڭ ەرتەڭگى كەلەشەگى – جاستار ءۇشىن اسا قاجەت. سىزدەر زاماننىڭ سىن-قاتەرلەرىنە لايىقتى جاۋاپ بەرە وتىرىپ, ۇلتتىق قۇندىلىقتارىمىزدى قاستەرلەپ, ولاردى ۋاقىت تالابىنا ساي ورنىقتىرۋلارىڭىز قاجەت. مىسالى, زەرتتەۋلەر كورسەتىپ وتىرعانداي, بۇگىنگى جاستار داڭعازا توي-دۋمان مەن اسىرا ىسىراپشىلدىقتى قالامايدى ەكەن. بۇل – يگىلىكتى ءۇردىس. ويتكەنى اتا ءدىنىمىز دە, ۇلتتىق ءداستۇرىمىز دە, حاكىم اباي ايتقانداي, ارتىق ماقتانىش, استا-توك ىسىراپتى يگى ادەپتەردىڭ قاتارىنا ەشقاشان جاتقىزباعان.
سوندىقتان جاستار جاھاندانۋدىڭ زاماناۋي يگىلىكتەرىن بويىنا سىڭىرە وتىرىپ, ۇلتتىق قۇندىلىقتارىمىزدى قۇلدىراتپاۋى ءتيىس. جاستار ءۇشىن وتاننىڭ كەلەشەگى مەن وتباسى بەرەكەسى ءبىرىنشى كەزەكتە تۇرۋى قاجەت. قازاق ۇلتى ءبىزدىڭ كوپۇلتتى مەملەكەتىمىزدە جاسامپاز ىستەردىڭ ۇيتقىسى بولۋعا مىندەتتى!
قادىرمەندى فورۋمعا قاتىسۋشىلار!
بىرىنشىدەن, فورۋمعا شاقىرعانى ءۇشىن ۇيىمداستىرۋ كوميتەتىنە العىس ايتامىن, سونداي-اق جيىنعا قاتىسىپ وتىرعان شەتەلدىك جاس دوستارعا شىن جۇرەكتەن قوش كەلدىڭىزدەر دەيمىن!
بۇگىندە پاتريوتتىق تاربيە ازاماتتىق قوعامنىڭ ورنىقتى ءارى تۇراقتى پروگرەسكە جەتۋ جولىنداعى دامۋىنىڭ اجىراماس بولىگى ەكەنى انىق.
مەملەكەت باسشىسى قاسىم-جومارت كەمەل ۇلى توقاەۆ ءدال وسى ءپاتريوتيزمنىڭ العى شەبىندە جاس قازاقستاندىقتار ءجۇرۋى كەرەك دەپ سەنەدى. ول وتاندىق ءپاتريوتيزمنىڭ ناقتى جانە ايقىن فورمۋلاسىن اتاپ بەردى. بۇل – حالىقتىڭ تاريحىن ءبىلۋ, مەملەكەتكە دەگەن قۇرمەت, ءوزىن-ءوزى ۇزدىكسىز دامىتۋ, ادالدىق جانە جۇمىسقا قابىلەتتىلىك.
الەمدەگى ەڭ جاقسى ۇكىمەت, ەڭ جاقسى پارلامەنت وزدىگىنەن جۇمىس ىستەيدى دەسەك, بۇل ءوزىمىزدى الداۋ بولار ەدى. ولار بار ماسەلەگە شەشىم بولارلىق امبەباپ «ەس جاسايدى» دەپ كۇتۋ دە قاتە.
بوستاندىق پەن دەموكراتيا – ءاربىر ادام اتسالىساتىن دۇنيە. بۇدان بارىمىزگە جۇكتەلگەن جاۋاپكەرشىلىك تۋىندايدى.
مەملەكەت باسشىسى, سونداي-اق, جاستاردىڭ ساياسي ساناسىنىڭ ءوسۋىن مەملەكەتتىڭ قاجەتتى جانە قۋاتتى الەۋەتى, ەكونوميكالىق جانە قوعامدىق-ساياسي پروتسەستەرگە بالامالى, پروگرەسسيۆتى كوزقاراستىڭ باستاۋى رەتىندە قاراستىرا وتىرىپ, ەلدىڭ تەحنولوگيالىق جانە رۋحاني جاڭعىرۋىنداعى جاستاردىڭ نەگىزگى ءرولىن اتاپ كورسەتتى. مۇنىڭ وزەكتى ەكەنىن بۇگىنگىدەي وتكەندى بۇرمالاۋ, بولاشاقتى ميستيفيكاتسيالاۋ, ساياسي, رۋحاني-ادامگەرشىلىك جانە تەحنولوگيالىق سالالارداعى قاراما-قايشىلىقتارعا كۋا بولا وتىرىپ تۇسىنەمىز.
بۇگىندە ەلىمىزدە ءتۇرلى سالادا جاستاردى قولداۋ جانە ىنتالاندىرۋ جونىندەگى مەملەكەتتىك جوبالار تابىستى ىسكە اسىرىلۋدا. مىسالى, تۇڭعىش پرەزيدەنت – ەلباسى باستاماشىلىق ەتكەن «بولاشاق» حالىقارالىق ءبىلىم بەرۋ ستيپەندياسى, پرەزيدەنتتىك جاستار كادرلىق رەزەرۆى, جاستاردى جۇمىسقا ورنالاستىرۋ جانە جۇمىسپەن قامتۋ باعدارلامالارى جانە باسقا دا كوپتەگەن جوبا بار. ساياسي ۇيىمداردىڭ پارتيالىق سايلاۋ تىزىمدەرىندە ايەلدەر مەن 29 جاسقا دەيىنگى جاستار ءۇشىن مىندەتتى 30 پايىزدىق كۆوتانى ەنگىزۋ ەرەكشە نازار اۋدارۋعا تۇرارلىق.
وزدەرىڭىز بىلەسىزدەر, مەملەكەت كوپتەگەن جىل بويى «دارىن» مەملەكەتتىك جاستار سىيلىعىن بەرىپ كەلەدى. بۇعان قوسا, مەملەكەت باسشىسىنىڭ تاپسىرماسى بويىنشا بيىل تالانتتى جاستارعا ارنالعان «تاۋەلسىزدىك ۇرپاقتارى» گرانتى تاعايىندالدى.
مەملەكەت بۇدان ءارى دە جاستاردىڭ ءوزىن-ءوزى تابىستى جۇزەگە اسىرۋى جانە ءوز ەلىنىڭ, حالقىنىڭ مۇددەلەرىن قورعايتىن جاڭا كوشباسشىلاردى تاربيەلەۋ ءۇشىن جاعداي جاسايدى دەپ سەندىرۋگە دايىنمىن.
قىمباتتى دوستار!
سىزدەر – تاۋەلسىزدىك ۇرپاقتارىسىزدار! سىزدەر كوپتەگەن ۇرپاق ارمان ەتكەن تاۋەلسىزدىگىمىزبەن تەل وستىڭىزدەر. ەندى سىزدەر جاسامپازدىق ەستافەتاسىن قابىلداپ, ءححى عاسىردا قازاقستاننىڭ گۇلدەنۋى مەن وزگە جۇرتتىڭ مويىنداۋىن قامتاماسىز ەتەتىن قوزعاۋشى كۇشكە اينالۋعا تيىسسىزدەر.
بۇگىنگى تاڭدا ءوز بىلىمدەرىڭىز بەن كاسىبي شەبەرلىكتەرىڭىزدى پايدالانا وتىرىپ, قازاقستاندى قازىرگى الەمدەگى قۋاتتى جانە باسەكەگە قابىلەتتى ەل ەتۋگە كۇشتەرىڭىز جەتەدى.
ءوزىمىزدى دە, وزگەلەردى دە تاڭداي قاقتىراتىن ازاماتتارعا اينالۋلارىڭىزعا تىلەكشىمىن!
قۇرمەتتى جاستار!
ەلىمىزدى جارقىن بولاشاققا جەتەلەۋ بۇگىن جاسايتىن تاڭداۋلارىڭىزعا بايلانىستى ەكەنىن ۇمىتپاڭىزدار. ماڭگىلىك ەل بولۋ, ونىڭ تاۋەلسىزدىگىن ساقتاۋ – كوزى اشىق, كوكىرەگى وياۋ ءبىلىمدى ۇرپاقتىڭ عانا قولىندا. مەملەكەت تاراپىنان بۇل ءۇشىن بارلىق مۇمكىندىك جاسالۋدا.
قازاق ەلىنىڭ جارقىن بولاشاعى ءۇشىن جاستارىمىز تەرەڭ اقىلمەن, قاجىر-قايراتپەن تىنباي ەڭبەكتەنۋى قاجەت. بۇل رەتتە ساپالى ءبىلىمدى سانالى تاربيەگە نەگىزدەۋ – وتە ماڭىزدى. وتانىمىزدىڭ كەمەل كەلەشەگى جاستارىمىزدىڭ رۋحاني مۇرامىزدى يگەرىپ, ءتول تاريحىمىزبەن ماقتانۋىنا, ءوز ۇلتىن شەكسىز ءسۇيىپ, وزگە ۇلتتاردى قۇرمەتتەۋىنە تىكەلەي بايلانىستى.
بۇگىنگى فورۋم جاستاردىڭ ۇلتتىق جاڭعىرۋ جولىنداعى ۇلى مۇراتتارعا جول باستاۋىنا ەرەكشە سەرپىن بەرسىن دەپ تىلەك ايتامىن!
وسى ساتتە قازاقتىڭ اقيىق اقىنى ماعجان جۇماباەۆتىڭ مىنا ءبىر جولدارى ەسكە تۇسەدى:
ارىستانداي ايباتتى,
جولبارىستاي قايراتتى –
قىرانداي كۇشتى قاناتتى,
مەن جاستارعا سەنەمىن!
قاجۋ بار ما تۇلپارعا,
تالۋ بار ما سۇڭقارعا.
يمان كۇشتى ولاردا,
مەن جاستارعا سەنەمىن!
ءاردايىم الەمدىك باسەكەنىڭ الدىندا بولىڭىزدار!
ىسكە ءسات, جاس دوستار!
