ايماقتار • 04 ماۋسىم، 2021

اقىن ءوز ولەڭىن وسكەمەننىڭ تورىندە شىرقادى

106 رەت كورسەتىلدى

مەملەكەتتىك رامىزدەر كۇنىنە وراي وسكەمەندە مادەنيەت قايراتكەرى، قازاقستان جازۋشىلار وداعىنىڭ مۇشەسى، تارباعاتاي اۋدانىنىڭ قۇرمەتتى ازاماتى، اقىن الماس احمەتبەك ۇلىمەن شىعارماشىلىق كەزدەسۋ كەشى ءوتتى، دەپ حابارلايدى Egemen.kz.

مەملەكەتتىك رامىزدەر كۇنىندەگى ءىس-شارا «كوك تۋدىڭ جەلبىرەگەنى» ءانىنىڭ ءسوزىن جازعان اقىن الماس احمەتبەك ۇلى مەن جاستار اراسىن بايلانىستىرا وتىرىپ، پاتريوتتىق سەزىمدى، رامىزدەرگە دەگەن قۇرمەتتى ارتتىرۋدى ماقسات ەتتى.

– العاش كوك تۋدى قورعاس شەكارا بەكەتىنەن ەلگە ءوتىپ كەلە جاتقاندا كوردىم، بايراق الىستا جەلبىرەپ تۇردى. «كوك تۋدىڭ جەلبىرەگەنى» – ساعىنىشقا تولى، جان تەبىرەنتەر، رۋحتى وياتار ءان دەپ ويلايمىن. اتامەكەنگە دەگەن ساعىنىشتان، كوك بايراعىمىزدى كورگەندەگى تەبىرەنىستەن تۋعان ءان. وتانىنا جەتە الماي جۇرگەن قازاقتاردىڭ جۇرەك ءلۇپىلى، – دەدى الماس احمەتبەك ۇلى.

اقىن ءومىر جولى، بالالىق شاعى تۋرالى قىزىقتى اڭگىمە ءوربىتتى. الماس احمەتبەك ۇلىقىتايدىڭ تارباعاتاي وكرۋگىندە دۇنيەگە كەلگەن. 1982 جىلى ىلە پەداگوگيكالىق ينستيتۋتىنىڭ فيلولوگيا فاكۋلتەتىن بىتىرگەن. ادەبيەتكە التى جاسىنان قۇمارتقانىن، ون جىلداي قىتايدىڭ شاۋەشەك قالاسىندا شىعاتىن «تارباعاتاي» ادەبي جۋرنالىندا قىزمەت ەتىپ، 1993 جىلى ەلگە ورالعانىن ايتتى.

بيىل الپىسقا كەلگەن الماس احمەتبەك ۇلىنا شىعىس قازاقستاندىقتار قۇرمەت-ءىلتيپاتىن كورسەتىپ، يىعىنا شاپان جاۋىپ جاتتى. جۇرەكجاردى لەبىزدەرىن اقتاردى.

– «كوك تۋدىڭ جەلبىرەگەنى» ءانى ەل تاۋەلسىزدىگىنىڭ سيمۆولىنا اينالىپ، جاستاردى شابىتتاندىرىپ كەلەدى. ءار اقىننىڭ وتان الدىنداعى ءوز بورىشى بار، الماس احمەتبەك ۇلى وسى پارىزىن تولىق وتەدى دەپ ويلايمىن، – دەدى شقۋ رەكتورى، پروفەسسور مۇحتار تولەگەن.

امانجولوۆ ۋنيۆەرسيتەتىنىڭ جاستارى وسى ءىس-شارا اياسىندا تۇتاس كونتسەرتتىك باعدارلاما ۇسىندى. «شابىت» ستۋدەنتتىك تەاترىنىڭ اكتەرلەرى اقىننىڭ ولەڭدەرىن جاتقا وقىپ، ۋنيۆەرسيتەت تۇلەگى ايان قالىمبەك مەرەيتوي يەسىنە ارناۋ ايتتى. پاتريوتتىق اندەر شىرقالدى. كەزدەسۋ «كوك تۋدىڭ جەلبىرەگەنى» انىمەن اياقتالدى.

سوڭعى جاڭالىقتار

ۇقساس جاڭالىقتار