تاراز قالاسىنىڭ 23 جاستاعى تۇرعىنى اۋرۋى جانىنا باتىپ, ءبىر اپتاداي اياعىنان جۇرە الماي قالادى. جامبىل وبلىستىق كوپبەيىندى اۋرۋحاناسىنىڭ ونكولوگيالىق قۇرىلىمىنا جۇگىنگەن وعان مەديتسينالىق تەكسەرىس جاسالىپ, سان سۇيەگىندە قاتەرلى ىسىكتىڭ بارى انىقتالادى. «وستەوساركوما» دەپ اتالاتىن بۇل قاتەرلى ىسىك سۇيەك تىنىنەن پايدا بولادى جانە سۇيەكتەردە كەزدەسەتىن قاتەرلى پروتسەسس.
مۇنداي جاعدايدا ۋاقىت وتكىزبەي شۇعىل تۇردە حيرۋرگيالىق وپەراتسيا ارقىلى ىسىكتى الىپ تاستاۋ قاجەت. جامبىل وبلىسىندا مۇنداي وتا ءتۇرى بۇرىن-سوڭدى جاسالماعان. بۇل ءۇشىن ناۋقاستار الماتى نەمەسە نۇر-سۇلتان قالالارىنداعى ارنايى ورتالىقتارعا جىبەرىلەتىن.
جەرگىلىكتى دارىگەرلەر ءوزارا كەڭەسە كەلە, ءبىراۋىزدان وتا جاساۋدى ۇيعارادى. 2 ساعاتتان استام ۋاقىتقا سوزىلعان كۇردەلى وتا تۇرىنە حيرۋرگتار مەن ونكولوگتار بارىن سالدى. ءساتتى جاسالعان وتادان سوڭ ناۋقاس جانساقتاۋ بولىمىنە, كەيىنىرەك پالاتاعا اۋىستىرىلعان.
«دەنساۋلىعىم جاقسى. قازىر ەش جەرىم اۋىرمايدى, سۇيەمەلدەسە جايلاپ جۇرە الامىن. مەنى اياققا تۇرعىزعان دارىگەرلەرگە العىسىم شەكسىز. ەندى الداعى ۋاقىتتا قايتادان سپورتپەن اينالىسا الاتىن بولدىم. قۋانىشىمدا شەك جوق», دەيدى 23 جاسار تارازدىق تۇرعىن.
مامانداردىڭ پىكىرىنشە, بۇل – وتە سيرەك كەزدەسەتىن كەسەل. مەديتسينا تىلىمەن ايتقاندا, ساركوماعا ۋاقتىلى وپەراتسيا جاساماسا, كەيىن كەش بولادى. مۇنداي جاعدايدا جىگىتتىڭ اياعىن كەسۋگە تۋرا كەلەتىن ەدى. ونكوحيرۋرگتەر قاتەرلى ىسىكتى الىپ قانا قويماي, ەندوپروتەز يمپلانتاتسياسىن دا قويدى. ەندى ول تىزە بۋىنى قىزمەتىن اتقارادى.
«بۇرىن مۇنداي دياگنوز قويىلعان ناۋقاس ءۇشىن ءبىزدىڭ مەديتسينا دارمەنسىز بولاتىن, ال قازىر ىسىك جايىلىپ كەتسە دە كۇرەسە الاتىن جاعدايعا جەتتىك. ەندى پاتسيەنت ءارى قاراي حيميا, ساۋلە تەراپيالارىن الىپ, ەمدەلە الادى. ءبىز جاڭا تەحنولوگيالاردىڭ كومەگى مەن زاماناۋي قوندىرعىلاردىڭ كومەگىمەن ناۋقاستىڭ اياعىن ساقتاپ قالدىق. ەندى وڭالتۋ شارالارىنان كەيىن پاتسيەنتىمىز تولىققاندى ومىرگە ورالادى», دەيدى ونكولوگيالىق قۇرىلىمنىڭ ونكوحيرۋرگى جاندوس سەيداحمەتوۆ.
الداعى ۋاقىتتا جامبىل وبلىستىق كوپبەيىندى اۋرۋحاناسىنىڭ ونكولوگيالىق قۇرىلىمىندا مۇنداي وتا ءتۇرى جاسالاتىن بولدى.
جامبىل وبلىسى
