پاندەميا باستالعاننان بەرى وبلىستا COVID-19-دان 21 863 جاعداي تىركەلسە, ونىڭ 15 505-ىندە اۋرۋ بەلگىلەرى بار, 6 358-ءى سيمپتومسىز بولعانىمەن ۆيرۋستى تاسىمالداۋشىلار. 109 ادام وسى ىندەتتەن كوز جۇمعان. ساۋىرمەن سالىستىرعاندا مامىر ايىندا قاۋىپتى ىندەت 13,6 پايىزعا ءوستى. ىندەتتەن كوش باستاپ تۇرعان بۋراباي اۋدانىندا – 564, اتباساردا – 328, اقكولدە 290 جاعداي انىقتالىپ, سىرقاتتار سانى ءبىر ايدىڭ ىشىندە بىرنەشە ەسەگە وسكەنى بەلگىلى بولىپ وتىر. «سارى ايماقتاعى» شورتاندى مەن ەرەيمەنتاۋ اۋداندارىن قوسپاعاندا, باسقا اۋدانداردىڭ بارلىعى دەرلىك كوروناۆيرۋستىڭ تارالۋى تۇرعىسىنان «قىزىل ايماقتا». قورعالجىن, زەرەندى جانە ءبىرجان سال اۋداندارى مەن ستەپنوگور قالاسى عانا «جاسىل ايماقتا».
دەگەنمەن, بيىلعى جازدا بالالار ساۋىقتىرۋ لاگەرلەرىندە بىلتىرعىداي ەمەس, دەم الۋعا مۇمكىندىك تۋادى دەپ كۇتىلۋدە. بىراق ەپيدەميالىق جاعدايدى ەسكەرە وتىرىپ, بالالاردىڭ دەنساۋلىعىن قورعاۋ ۇيىمدارىنىڭ جۇمىسىنا بىرقاتار شەكتەۋ ەنگىزىلەدى. مەكتەپكە دەيىنگى ءبىلىم بەرۋ ورتالىعىنىڭ قىزمەتى «قىزىل ايماقتا» بالالار سانى 30 پايىزدان اسپاعان جاعدايدا, «سارى ايماقتا» 50 پايىزدان اسپايتىن جاعدايدا رۇقسات ەتىلەدى. سونىمەن قاتار بالالار ساۋىقتىرۋ مەكەمەلەرىنە كەلگەن كەزدە ءار بالانىڭ دەنساۋلىعى تۋرالى قۇجاتتارى, جۇقپالى اۋرۋلارمەن, ونىڭ ىشىندە كوروناۆيرۋس بەلگىلەرى جوق ەكەندىگى تۋرالى انىقتاماسى, 72 ساعات بۇرىن جۇرگىزىلگەن COVID-19 زەرتحانالىق رەاكتسياسى تەرىس دەگەن قۇجات بولۋى شارت. بارلىق بالالار لاگەرگە ءبىر مەزگىلدە كەلىپ, كەتۋى ءتيىس. كەلگەن بالالاردى قابىلداۋ كۇنىنەن كەيىن سىرتتان كەلگەن ادامدارمەن بايلانىسۋعا نەمەسە اۋىسىم كەزىندە ۋاقىتشا كەتۋگە تىيىم سالىنادى.
دەرتتىڭ دەندەپ كەتۋىنە ءوزىمىز دە كىنالىمىز. قانشا ايتىلعانىمەن, ساقتىق شارالارى ساقتالا بەرمەيتىن جيىندار تىيىلماي وتىر. جىل باسىنان بەرى جۇرگىزىلگەن مونيتورينگكە سايكەس, 18 440 نىساننىڭ 345-ىندە كارانتيندىك ءىس-شارالاردى بۇزۋ وقيعالارى انىقتالىپ, 401-ىنە اكىمشىلىك ايىپپۇل سالىنعان. مامىر ايىندا عانا 2 801 نىسان تەكسەرىلىپ, كارانتيندىك شارالاردى بۇزۋدىڭ 57 فاكتىسى انىقتالعان. ءتارتىپ بۇزعاندارعا 45 مارتە اكىمشىلىك ايىپپۇل سالىنعان. كوكشەتاۋدا ASHYQ جوباسى ىسكە قوسىلىپ, وعان قاتىساتىن وبەكتىلەر ءۇشىن جەڭىلدىكتەر قاراستىرىلعان. مىسالى, تاماقتانۋ وبەكتىلەرىنىڭ جۇمىس رەجىمى جالپى, 20 ساعاتقا دەيىن, ال ASHYQ جوباسىنا قاتىسقاندار تۇنگى 2 ساعاتقا دەيىن جۇمىس ىستەي الادى. بانكەت زالدارىنىڭ قىزمەتىنە تىيىم سالىنادى, تەك ەسكە الۋ شارالارىن وتكىزۋگە رۇقسات ەتىلەدى.
ASHYQ جوباسىنا قاتىساتىن فيتنەس ورتالىقتار, سپورت زالدارى مەن سپورتتىق-ساۋىقتىرۋ ورتالىقتارى, باسسەيندەردىڭ جۇمىسى تۋرالى ايتاتىن بولساق, سەنبى مەن جەكسەنبى كۇندەرى بەلگىلەنگەن ساقتىق شارالارىنا ساي جۇمىس ىستەي الادى. مادەني نىساندار جوباعا قاتىسسا عانا جۇمىس ىستەۋگە رۇقسات ەتىلەدى.
قازىر ASHYQ جوباسىنا تىركەلىپ, جۇمىس ىستەگىسى كەلەتىن كاسىپكەرلەر قاتارى ءبىرشاما كوبەيىپ كەلەدى. بۇگىندە 285 ءوتىنىش كەلىپ تۇسسە, ونىڭ 215-ءى QR كودتارىن رەسمي ەنگىزگەن. سول ارقىلى «قىزىل» جانە «سارى» مارتەبەسى بار 12 كەلۋشى انىقتالىپ, ونىڭ 4-ەۋىندە پتر تەستىنىڭ وڭ ناتيجەسى جانە 8-ءى قاۋىپتى ىندەتتى تاسىمالداۋشىلار ەكەنى انىقتالعان. ماسەلەن, كوكشەتاۋداعى FamilyMood IPARTMOOD مەيرامحاناسى مەن «مياسورۋبكا» نىساندارى سياقتى قوعامدىق تاماقتانۋ ورىندارىندا «قىزىل» مارتەبەدەگى 2 كەلۋشى انىقتالعان. سول سياقتى قوعامدىق تاماقتانۋ ورىندارىندا تاعى 5 كەلۋشى «سارى» مارتەبەمەن جۇرگەنى بەلگىلى بولعان. ششۋچينسك قالاسىنداعى «ياگۋار» فيتنەس-ورتالىعىنا تاعى ەكى كەلۋشى «قىزىل» جانە «سارى» مارتەبەمەن جۇرگەنى انىقتالعان.
حالىق ساقتىق شارالارىن بارىنشا كۇشەيتپەسە, داۋاسىز دەرتتىڭ تامىرىنا بالتا شابۋ, الدىن الۋ وتە قيىن. كوپكە بەلگىلى وسى ءبىر جايتتى تاعى ءبىر قايتالاپ ايتساق, ارتىقتىعى بولماس.
