1 ماۋسىمدا ايماقتاردا تۇرعىندار مەن تۇرعىن ەمەس ءۇي-جايلاردىڭ مەكەنجايلارىن جاڭارتۋ جانە ولاردا تۇراتىن تۇرعىنداردى ناقتىلاۋ ماقساتىندا سۇحبات بەرۋشىلەر ەلدى مەكەندەردى ارالاۋدى باستادى.
حالىق ساناعىنا دايىندىققا شامامەن 6,5 مىڭ ادام تارتۋ جوسپارلانۋدا.
تولىق ساناق قۇرامى نۇر-سۇلتان, الماتى قالالارى, الماتى, اتىراۋ, باتىس قازاقستان, قوستاناي, قىزىلوردا وبلىستارىندا جاساقتالعان. بۇعان قوسا, بۇل ايماقتاردا ىندەتكە قارسى ەكپە العان سۇحبات بەرۋشىلەردىڭ پايىزى جوعارى.
كەزدەسۋ قورىتىندىسى بويىنشا ءاليحان سمايىلوۆ بىرقاتار ناقتى تاپسىرما بەردى. وبلىستار مەن نۇر-سۇلتان, الماتى, شىمكەنت قالالارىنىڭ اكىمدىكتەرى جانە ۇلتتىق ستاتيستيكا بيۋروسى, ءبىلىم جانە عىلىم, دەنساۋلىق ساقتاۋ مينيسترلىكتەرىمەن بىرلەسىپ, جۇمىسسىز حالىقتى, ەرىكتى ۇيىمداردى, ستۋدەنتتەردى ەكپە العاننان سوڭ, سۇحباتتاسۋشى رەتىندە تارتۋ بويىنشا جۇمىستى كۇشەيتۋى ءتيىس.
پوليتسيا دەپارتامەنتتەرىمەن بىرگە وبلىستىق اكىمدىكتەر حالىق ساناعى كەزىندە ساناق قىزمەتكەرلەرىنىڭ قاۋىپسىزدىگىن جەرگىلىكتى دەڭگەيدە قامتاماسىز ەتۋى, سونداي-اق تەرىس پيعىلدى ادامداردىڭ الاياقتىق ارەكەتتەرىنە جول بەرمەۋى كەرەك.
سونداي-اق ءا.سمايىلوۆ ساناق ناۋقانى اياقتالعانعا دەيىن ەلدى مەكەندەردىڭ قۇرامداس بولىكتەرىنە (داڭعىلدار, كوشەلەر, اللەيالار جانە ت.ب.) جاڭا اتاۋ بەرۋ تۋرالى ءموراتوريدى ساقتاۋدى تاپسىردى.
حالىق ساناعى كەزىندە الىنعان جەكە مالىمەتتەر قۇپيا بولادى جانە «مەملەكەتتىك ستاتيستيكا تۋرالى» قازاقستان رەسپۋبليكاسىنىڭ زاڭىنا سايكەس قورعالادى.
«مەملەكەت تاراپىنان قابىلدانىپ جاتقان شەشىمدەردىڭ تيىمدىلىگى الىنعان مالىمەتتەرگە بايلانىستى بولادى. ساناق ناتيجەلەرى مەكتەپ, بالاباقشا, ەمحانالاردى سالۋ بويىنشا بيۋدجەتتى جوسپارلاۋعا جانە ەلىمىزدىڭ ءاربىر اكىمشىلىك-اۋماعىندا حالىققا كولىك قىزمەتىن ۇسىنۋ ءۇشىن قاجەت. ساناق دەرەكتەرى الەۋمەتتىك سالاداعى, ءبىلىم بەرۋدەگى, دەنساۋلىق ساقتاۋداعى, تۇرعىن ءۇي قۇرىلىسىنداعى جانە جۇمىس ورىندارىن قۇرۋداعى مەملەكەتتىك باعدارلامالاردى ىسكە اسىرۋدا ماڭىزدى. سوندىقتان بۇل شارانىڭ ماڭىزدىلىعىن ەسكەرە كەلە, ءبىز بۇل ناۋقاندى ساپالى وتكىزۋىمىز كەرەك», دەدى ءا.سمايىلوۆ.
