بۇل نورما جەر تۋرالى زاڭنىڭ جوباسىندا قاراستىرىلعان. ءماجىلىس دەپۋتاتى بەرىك وسپانوۆتىڭ ايتۋىنشا, بۇعان دەيىن قازاقستاندىقتاردا مۇنداي قۇقىق بولعان جوق. شەتەلدىكتەر نەمەسە ولاردىڭ قاتىسۋىمەن اشىلعان كاسىپورىندارعا جەر تەلىمدەرىن جالعا الۋعا قاتاڭ تىيىم سالىنعان. ەگەر مۇنداي جاعدايلار انىقتالسا, مەملەكەت كەرى قايتارىپ الادى. جالعا الۋشىلار تۋرالى تولىق اقپارات ارنايى بازاعا جيناقتالادى. جاۋاپتى ورگاندار ۇنەمى تەكسەرىس وتكىزىپ, زاڭ بۇزۋشىلىقتاردى انىقتايدى.
بۇرىن وسى ماسەلەمەن جەرگىلىكتى اتقارۋشى ورگاندار اينالىسسا, ەندى ول اۋىل شارۋاشىلىعى مينيسترلىگىنىڭ قۇزىرىندا. جاڭا قۇجاتتا مال جايىلىمدارىنا قاتىستى وزگەرىستەر دە بار. ەندى مەملەكەت قاجەت بولعان جاعدايدا جەردى يەسىنەن ساتىپ الۋعا قۇقىلى. ال, شارۋا جايىلىمدى جالعا الىپ وتىرسا, ۇكىمەت وعان اۋماعى سايكەس كەلەتىن تۋرا سونداي جەر تاۋىپ بەرۋى ءتيىس. زاڭ جوباسىنا سايكەس اۋىل شارۋاشىلىعى جەرلەرىندە ونەركاسىپتىك نىساندار سالۋعا تىيىم سالىنعان. ونى قولدانۋ ماقساتىن دا وزگەرتۋگە بولمايدى.
قازىر ەلىمىزدە شامامەن 100 ميلليون گەكتار اۋىل شارۋاشىلىعى جەرى بار.
«ەگەر ءسىز جەر پايدالانۋ قۇقىعىنىڭ يەسى بولساڭىز, جاڭادان جەر الدىڭىز, قۇقىقتى بىرەۋگە وتكىزۋ ءۇشىن ءوزىڭىز ونى 5 جىل پايدالانۋىڭىز كەرەك. سودان كەيىن عانا ونى باسقا بىرەۋگە وتكىزە الاسىز. مىسالى, ءسىز بۇگىن ونى الاسىز, ەرتەڭ ساتىپ جىبەرەمىن دەيسىز. وسى جەردە سپەكۋلياتيۆتىك جاعدايلاردا تولىق توقتاتۋ ءۇشىن 5 جىل يگەرمەسەڭىز جەر پايدالانۋ قۇقىعىنان ايىرىلاسىز», دەدى قر پارلامەنتى ءماجىلىسىنىڭ دەپۋتاتى بەرىك وسپانوۆ.
