«بۇگىن قازاق فيلوسوفياسى عىلىمى اۋىر قازاعا دۋشار بولدى. ايگىلى ويشىل-فيلوسوف اعىن قاسىمجانوۆتىڭ ءىزباسارى, كورنەكتى عالىم, فيلوسوفيا عىلىمىنىڭ دوكتورى, پروفەسسور ساعادي بايۇزاق ۇلى بولەكباەۆ دۇنيەدەن وزدى. مارقۇمنىڭ وتباسى مەن تۋعان-تۋىستارىنا كافەدرا ۇجىمى اتىنان قايعىرىپ كوڭىل ايتامىز. جاتقان جەرىڭىز جارىق, توپىراعىڭىز تورقا بولسىن!», دەلىنگەن ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتى فيلوسوفيا كافەدراسى تاراتقان حابارلامادا.
پروفەسسور ساعادي بولەكباەۆ – جارتى عاسىرعا جۋىق عۇمىرىن عىلىم مەن ۇستازدىققا ارناعان بەلگىلى عالىم, پەداگوگ, قوعام قايراتكەرى, ساياسي عىلىمدار جانە زاڭ عىلىمدارى اكادەميالارىنىڭ اكادەميگى. قر بعم-ءنىڭ ۇلتتىق ساراپشىسى, قازاقستان حالقى اسسامبلەياسىنىڭ كەڭەسشىسى, قر مادەنيەت مينيسترلىگى ءدىن ىستەرى جونىندەگى كوميتەتى ساراپشىلار كەڭەسىنىڭ مۇشەسى, الماتى قالاسىنداعى اقپاراتتىق-تالداۋ ورتالىعىنىڭ مۇشەسى بولعان.
پروفەسسور ساعادي بولەكباەۆ شەتەلدىك عىلىمي ورتالاردا دا تانىمال تۇلعا. عالىمنىڭ 50-دەن استام عىلىمي ەڭبەگى چەحيا, پولشا, نيدەرلاند, گەرمانيا, پاكىستان, رەسەي, ۋكراينا, وزبەكستان, تۇركمەنستان, قىرعىزستان, ازەربايجان جانە ت.ب. ەلدەردە جاريالانعان.
