اقتوتى رايىمقۇلوۆا تۇركىستان وبلىسىنىڭ الەۋمەتتىك-ەكونوميكالىق دامۋىنىڭ 2021-2025 جىلدارعا ارنالعان كەشەندى جوسپار جوباسىندا مادەنيەت جانە سپورت مينيسترلىگىنىڭ قۇزىرەتى شەگىندە 27 ءىس-شارا كوزدەلگەنىن ايتتى.
«بۇگىندە مينيسترلىكتىڭ مالىمەتىنە سايكەس, تۇركىستان وبلىسىندا 4 529 سپورت نىسانى بار. وبلىس حالقىنىڭ 32,1% تۇرعىنى دەنە شىنىقتىرۋمەن, سپورتپەن جۇيەلى تۇردە شۇعىلدانادى.
كەشەندى جوسپار شەڭبەرىندە سپورت سالاسىندا 13 جوبانى جۇزەگە اسىرۋ جوسپارلانىپ وتىر. ولاردىڭ ىشىندە رەسپۋبليكالىق جانە جەرگىلىكتى بيۋدجەت ەسەبىنەن 3 ءىرى سپورت نىسانىن سالۋ قاراستىرىلعان.
جەكە ينۆەستيتسيا تارتۋ ارقىلى ەكى جوبا جانە جەرگىلىكتى بيۋدجەت ەسەبىنەن 8 ينفراقۇرىلىمدىق جوبانى جۇزەگە اسىرۋ جوسپارلانعان. بۇل جوبالاردىڭ باسىم بولىگى بۇقارالىق سپورتتى دامىتۋعا باعىتتالعان. 2025 جىلى دەنە شىنىقتىرۋ جانە سپورتپەن شۇعىلداناتىن ازاماتتاردى ۇلەسى 45%-عا دەيىن ۇلعايادى دەپ كۇتىلۋدە.
قازىرگى تاڭدا تۇركىستان وبلىسىندا تۋريستەر سانى 1,2 ملن ادامعا جەتكەن. جالپى سپورت ينفراقۇرىلىمىن دامىتۋ ەڭ الدىمەن حالىقتىڭ دەنساۋلىعىن جاقسارتۋعا جاعداي جاسايدى», دەدى مينيستر.
سونداي-اق ول تۋريزم سالاسىنداعى جوسپارعا توقتالدى.
«وڭىرگە كەلەتىن تۋريستەر اعىنىن ۇلعايتۋ ماقساتىندا تۇركىستان جانە تولە بي اۋدانىنداعى «قاسقاسۋ» تۋريستىك-رەكرەاتسيا ورتالىعىنىڭ ينفراقۇرىلىمىن دامىتۋ جوسپارلانۋدا. وڭىرارالىق ىنتىماقتاستىقتى ودان ءارى كەڭەيتۋ ماقساتىندا تۋريستتىك باعىتتاردى ودان ءارى دامىتۋ بويىنشا جۇمىس جالعاسادى. « ۇلى جىبەك جولى» بويىندا جاڭا تۋريستىك ونىمدەر قالىپتاساتىن بولادى. كەشەندى جوسپار شەڭبەرىندە 11 ينۆەستيتسيالىق جوبانى جۇزەگە اسىرۋ جوسپارلانىپ وتىر. ونىڭ ىشىندە 9-ى جەكە ينۆەستيتسيا ەسەبىنەن.
وڭىردە تۋريزم يندۋسترياسىن دامىتۋ بويىنشا ۇسىنىلاتىن تۋريستىك قىزمەتتەردىڭ ساپاسىن ارتتىرۋ, تۋريستىك قىزمەت سۋبەكتىلەرىنە مەملەكەتتىك قولداۋدىڭ جاڭا شارالارىن ۇسىنۋ, تۇركىستان قالاسى مەن تۇركىستان وبلىسىنىڭ كولىكتىك قولجەتىمدىلىگىن ارتتىرۋ سياقتى جانە ت.ب. كەشەندى شارالاردى ىسكە اسىرۋ جوسپارلانىپ وتىر.
جوبالاردى ىسكە اسىرۋ ناتيجەسىندە 2025 جىلى تۋريستەر سانى 2,5 ملن ادامعا دەيىن, ورنالاستىرۋ ورىندارىمەن قىزمەت كورسەتىلگەن كەلۋشىلەر سانى 291 مىڭ ادامعا دەيىن جانە تۋريزم سالاسىندا جۇمىس ىستەيتىندەر سانى 30 مىڭ ادامعا دەيىن ارتادى دەپ جوسپارلانۋدا», دەدى اقتوتى رايىمقۇلوۆا.
سونىمەن قاتار مينيستر مəدەنيەت سالاسىندا اتقارىلاتىن جۇمىس بارىمىمەن تانىستىردى.
«ستاتيستيكا دەرەكتەرىنە سايكەس, وڭىردە 703 مادەنيەت مەكەمەسى بار. مادەنيەت سالاسىنداعى باسىم مىندەتتىڭ ءبىرى - مەملەكەتتىك باعدارلامالار, جەكە ينۆەستيتسيا شەڭبەرىندە ينفراقۇرىلىمدى ودان ءارى دامىتۋ. ناتيجەسىندە 13 مادەنيەت نىسانى پايدالانۋعا بەرىلەدى. «رۋحاني جاڭعىرۋ» جانە « ۇلى دالانىڭ جەتى قىرى» باعدارلامالارى اياسىندا ەسكەرتكىشتەردى عىلىمي قالپىنا كەلتىرۋگە جانە ارحەولوگيالىق زەرتتەۋلەرگە باعىتتالعان اۋقىمدى جۇمىس جوسپارلانعان.
وبلىستى دامىتۋدىڭ كەشەندى جوسپارى اياسىندا تاريحي-مادەني مۇرانى ساقتاۋ بويىنشا 3 اۋقىمدى جوبانى ىسكە اسىرۋ كوزدەلگەن. ونىڭ ىشىندە كۇلتوبە قالاشىعىنىڭ تاريحي نىساندارىن قالپىنا كەلتىرۋ, «ازىرەت سۇلتان» قورىق-مۋزەيىنىڭ اۋماعىن اباتتاندىرۋ, «قوجا احمەت ياساۋي» جانە «رابيا سۇلتان بەگىم» كەسەنەسىن, تۇركىستان قالاسىنداعى تسيتادەلدىڭ قامال قابىرعاسىن قالپىنا كەلتىرۋ جۇمىسى كوزدەلىپ وتىر.
2025 جىلى 59 نىساندى قالپىنا كەلتىرۋ جۇمىسى اياقتالىپ, 24 ارحەولوگيالىق زەرتتەۋ جۇرگىزۋ جوسپارلانىپ وتىر. ناتيجەسىندە باس تاريحي مادەني نىسان – «قوجا احمەت ياساۋي» كەسەنەسىنە كەلۋشىلەر سانى 2,3 ملن ادامعا دەيىن ارتادى دەپ كۇتىلۋدە.
اتالعان شارالار ءوڭىردىڭ تاريحي-مادەني مۇراسىن ساقتاۋعا, دامىتۋعا, ونى ەلىمىزدە جانە شەتەلدە تانىمال ەتۋگە, تۋريستەردىڭ كەلۋى ءۇشىن قولايلى جاعدايلار جاساۋعا باعىتتالعان. بۇل ءوز كەزەگىندە ەلىمىزدىڭ تۋريستىك تارتىمدىلىعىن ارتتىرادى», دەدى مينيستر.
