قاسىم-جومارت توقاەۆ نگوزي وكوندجو-يۆەالانى جۋىردا دۇنيەجۇزىلىك ساۋدا ۇيىمىنىڭ باس ديرەكتورى قىزمەتىنە سايلانۋىمەن قۇتتىقتاپ, اتالعان ۇيىممەن اراداعى تىعىز ىنتىماقتاستىق ەلىمىزدىڭ باسىمدىقتارىنىڭ ءبىرى ەكەنىن اتاپ ءوتتى.
كەزدەسۋدە قازاقستاننىڭ توراعالىعىمەن وتەتىن دسۇ-عا مۇشە ەلدەر مينيسترلەرىنىڭ 12-ءشى كونفەرەنتسياسىنا دايىندىق ماسەلەلەرىنە ەرەكشە نازار اۋدارىلدى.
– ءبىز ءۇشىن بيىلعى قاراشانىڭ سوڭى جەلتوقساننىڭ باسىندا وتەتىن دسۇ-عا مۇشە ەلدەر مينيسترلەرىنىڭ 12-ءشى كونفەرەنتسياسىنا توراعالىق ەتۋ ۇلكەن مارتەبە. قازاقستان ۇكىمەتى ورتاق ءىس-شارامىزدىڭ بارلىق مازمۇندىق جانە ۇيىمداستىرۋشىلىق ماسەلەلەرىنە قاتىستى پىسىقتاۋ جۇمىستارى بويىنشا دسۇ حاتشىلىعىمەن تىعىز ىقپالداستىق ورناتادى, – دەدى مەملەكەت باسشىسى.
پرەزيدەنتتىڭ ايتۋىنشا, قازاقستان كوپجاقتى ساۋدا جۇيەسىن بەلسەندى جاقتايتىن بولعاندىقتان, كونفەرەنتسيانىڭ ناقتى ناتيجە اكەلۋىنە مۇددەلى. سونداي-اق كۇن تارتىبىندەگى بارلىق شەشىلمەگەن ماسەلەلەردى تالقىلاۋعا ءوز تاراپىنان كونسترۋكتيۆتى تۇردە ۇلەس قوسۋعا دايىن ەكەنىن جەتكىزدى.
مەملەكەت باسشىسى دسۇ باس ديرەكتورىنا قازاقستاننىڭ كوروناۆيرۋسقا قارسى كۇرەستە قابىلداپ جاتقان شارالارى تۋرالى مالىمەت بەردى. تاراپتار پاندەمياعا قارسى كۇرەستى, سونىڭ ىشىندە, ۆاكتسينا مەن مەديتسينالىق قۇرال-جابدىقتارعا جالپى قولجەتىمدىلىكتى قامتاماسىز ەتۋگە باعىتتالعان جاھاندىق كۇش-جىگەردى تالقىلادى.
قاسىم-جومارت توقاەۆ دسۇ باسشىسىنىڭ جەتەكشىلىگى بويىنشا ۇيىمعا مۇشە ەلدەرمەن, ۆاكتسينا ءوندىرۋشى مەملەكەتتەرمەن جانە قولجەتىمدى ۆاكتسيناعا مۇقتاج ەلدەرمەن جۇرگىزىلىپ جاتقان سىندارلى ديالوگتى تولىق قولدايتىنىن ايتتى.
– دۇنيەجۇزىلىك ساۋدا ۇيىمى قاجەتتى مەديتسينالىق تاۋارلاردىڭ جەتكىزىلۋىن جانە ۆاكتسيناعا ادىلەتتى قولجەتىمدىلىكتى قامتاماسىز ەتۋدە ماڭىزدى ءرول اتقارۋى ءتيىس دەپ ەسەپتەيمىز. وسىعان بايلانىستى ۇكىمەتكە ساۋدا جانە دەنساۋلىق ساقتاۋ سالاسىنداعى باستامالارعا قاتىستى ەلىمىزدىڭ ۇستانىمىن, اتاپ ايتقاندا, مينيسترلەردىڭ 12-ءشى كونفەرەنتسياسىنا قاتىستى ءتيىستى شەشىم ازىرلەۋگە قوماقتى ۇلەس قوسۋدى تاپسىردىم, – دەدى پرەزيدەنت.
ءوز كەزەگىندە, نگوزي وكوندجو-يۆەالا قازاقستاننىڭ COVID-19 ىندەتىنە قارسى كۇرەستەگى كۇش-جىگەرىن جوعارى باعالاپ, وتاندىق QazVac ۆاكتسيناسىنىڭ ازىرلەنۋىمەن قۇتتىقتادى.
دۇنيەجۇزىلىك ساۋدا ۇيىمىنىڭ باسشىسى الدا بولاتىن مينيسترلەردىڭ 12-ءشى كونفەرەنتسياسىنا دايىندىق بارىسى تۋرالى ايتا كەلە, پرەزيدەنتكە اتالعان ءىس-شارا اياسىندا وتەتىن بيزنەس-فورۋمدى ۇيىمداستىرۋعا قازاقستاننىڭ قاتىسۋ مۇمكىندىگىن قاراستىرۋدى ۇسىندى. سونداي-اق قاسىم-جومارت توقاەۆتى جەنەۆادا وتەتىن كونفەرەنتسياعا شاقىردى.
كەزدەسۋ سوڭىندا قاسىم-جومارت توقاەۆ نگوزي وكوندجو-يۆەالانى وزىنە ىڭعايلى ۋاقىتتا قازاقستانعا ساپارمەن كەلۋگە شاقىردى.
