بۇل جادىگەر ءحىح عاسىرعا تيەسىلى, ونى جاساعان ادامنىڭ ەسىمى بەلگىسىز, سوندا دا قولىنان بال تامعان شەبەر اعاشتوسەكتى ۇلتتىق ناقىشپەن اسەم ورنەكتەگەن. اتالعان مۇراجايدىڭ قور ساقتاۋشىسى كامشات ءابجانوۆانىڭ ايتۋىنشا, ول وتكەن عاسىردىڭ 70-جىلدارى الماتىداعى مۋزەيدەن كەلگەن. ونى مۇراجايعا كىم تاپسىرعانى تۋرالى ناقتى دەرەك جوق. الايدا امانگەلدى اتامىزدىڭ اناسىنىڭ اعاشتوسەگى ەكەندىگى انىق دالەلدەنگەن. قۇندى جادىگەرگە ەكى عاسىرعا جۋىق ۋاقىت بولسا دا جاقسى ساقتالعان.
1916 جىلعى تورعايداعى ۇلت-ازاتتىق كوتەرىلىسىنىڭ باس ساردارى امانگەلدىنىڭ اناسى تەكتى جەردەن شىققان. ول بەردىكەي رۋىنىڭ ىشىندەگى قۇلمۇحاممەد يشان ارىستانباي ۇلىنىڭ اۋلەتىنەن تارايدى. قۇلمۇحاممەد يشان 1902 جىلى قازىرگى قاراعاندى وبلىسى ۇلىتاۋ اۋدانى اۋماعىنداعى دۋلىعالى دەگەن جەردەن ويۋلى قىزىل كىرپىشتەن ەڭسەلى مەشىت پەن 24 بولمەلى مەدرەسە سالدىرعان. بۇل ءدىني ءبىلىم ورداسى سول كەزەڭدە ەلىمىزدەگى ءىرى رۋحاني-مادەني ورتالىقتىڭ ءبىرى بولدى. ودان ءبىرتالاي تانىمال تۇلعا العاشقى ساۋاتىن اشقان. مەشىت پەن مەدرەسە يشاندار اۋلەتى قۋعىنعا تۇسكەنشە, ياعني 1929 جىلعا دەيىن جۇمىس ىستەپ كەلگەن. دۋلىعالى مەشىتىنىڭ تورعايداعى ۇلت-ازاتتىق كوتەرىلىسىندە الار ورنى زور. حالىق امانگەلدىنى كوتەرىلىستىڭ باس ساردارى ەتىپ سايلاعاندا, يشاندار اۋلەتى ونى قولداپ, باتىرعا باتاسىن بەرگەن. ءدىني ۇعىمدا ەل اراسىندا ساۋات اشۋ, عيبادات ايتۋ قىزمەتىن اتقارعانعا بەرىلەتىن يشاندىق اتاق قۇلمۇحاممەد يشاننان باستاپ, ونىڭ نەمەرەسى قازي يشانعا دەيىن جالعاسقان. ۇلىتاۋ مەن تورعاي جۇرتى يشاندار اۋلەتىن ءالى كۇنگە دەيىن كيەلى تۇقىم دەپ قادىر تۇتادى.
