تاۋەلسىزدىكتىڭ 30 جىلدىعىنا ارلنالعان بايقاۋدى قر ەكولوگيا, گەولوگيا جانە تابيعي رەسۋرستار مينيسترلىگى 2021 جىلدىڭ 1 اقپانى مەن 15 ءساۋىرى ارالىعىندا «National Geographic Qazaqstan» جۋرنال رەداكتسياسىمەن بىرگە ۇيىمداستىرعان بولاتىن.
دودانىڭ باستى ماقساتى - ادام مەن تابيعاتتىڭ ءوزارا ارەكەتتەسۋ ماسەلەلەرىنە قوعام نازارىن اۋدارۋ, تابيعي الۋانتۇرلىلىكتى ساقتاۋ جانە قورشاعان ورتاعا دەگەن قۇرمەت يدەياسىن كەڭىنەن ناسيحاتتاۋ. ۇيىمداستىرۋشىلاردىڭ سوزىنشە, قوعامداعى جانۋارلارعا دەگەن قاتىگەزدىكتىڭ الدىن الۋ مەن جاناشىرلىق, وسىمدىكتەر الەمىنە ۇقىپتى قاراۋ يدەيالارىن ونەر تۋىندىلارى ارقىلى دا كەڭىنەن تاراتۋ قاجەت.
«بايقاۋعا ارنالعان سايتتا 782 ادام تىركەلىپ, 1515 سۋرەت سايىسقا ءتۇستى. فوتوبايقاۋعا تۇسكەن سۋرەتتەردىڭ باسىم كوپشىلىگى كومپوزيتسيالىق تۇرعىدان ادەمى بولعاندىقتان قازىلار القاسىنىڭ الدىندا ۇلكەن جاۋاپكەرشىلىك پەن قيىن تاڭداۋ تۇردى. جالپى, ەكولوگيالىق اعارتۋشىلىق, ەكولوگيالىق سانانى كوتەرۋ جۇمىسىنىڭ ءبىر بولىگى رەتىندە وسى بايقاۋدى تاۋەلسىزدىكتىڭ 30 جىلدىعى مەرەكەسىنە ارناپ مينيسترلىكتىڭ قولداۋىمەن ءبىرىنشى رەت ۇيىمداستىرىپ وتىرمىز. ايماقتارداعى ەكولوگيا, جانۋارلار الەمى پروبلەمالارىن وسىنداي فوتوسۋرەتتەر ارقىلى كورسەتۋدى ماقسات تۇتتىق»»,- دەيدى «National Geographic Qazaqstan» جۋرنالىنىڭ باس رەداكتورى ەركىن جاقىپوۆ.
ءۇش كەزەڭنەن تۇرعان باعالاۋدان كەيىن قازىلار القاسى 4 نوميناتسيا بويىنشا جەڭىمپازداردى انىقتادى:
1. ماكروالەم – الەكساندر ۆلاسيۋك, «Melolontha»;
2. اناسى مەن بالاسى – فارحات كابدىكايروۆ, «بابىسەك بالاپانىن تاماقتاندىرۋ»;
3. قازاقستان پەيزاجدارى – ەرنۇر ماناپحان, «حان ءتاڭىرى»;
4. قازاقستان جان-جانۋارى – پاۆەل ميحەەۆ, «سوپەرنيك».
سونداي-اق, «تۋرانگا گرۋپپ» كومپانياسى اتىنان «ايۋساي» نوميناتسياسىن «ەگەمەن قازاقستان» رەسپۋبليكالىق گازەتىنىڭ ءفوتوتىلشىسى, ارىپتەسىمىز ەرلان ومار يەلەندى. ىلە-الاتاۋ پاركىندەگى ايگىلى شاتقالدىڭ اتىمەن اتالعان نوميناتسيا ۇلتتىق پاركتەردىڭ تابيعاتىن شەبەر بەينەلەگەن قاتىسۋشىلارعا ۇسىنىلادى.
وتاندىق اۋەسقوي جانە پروفەسسيونال فوتوگرافتار اراسىنداعى بايقاۋدىڭ ءار نوميناتسيانىڭ جەڭىمپازىنا 300 000 تەڭگە جۇلدەقورى تاعايىندالدى.
جەڭىمپازداردىڭ جۇمىسى www.photocontest.kz سايتىنىڭ, «جەڭىمپازدار» بولىمىندە جاريالاندى.
جارىسقا تۇسكەن بارلىق سۋرەتتى سايت گالەرەياسىنان تابۋعا بولادى.
