كەلەس اۋداندىق پوليتسيا بولىمىنە جەرگىلىكتى تۇرعىن حابارلاسىپ, تەز ارادا كومەك كەرەك بولىپ تۇرعانىن ايتادى. ايەلدىڭ ايتۋىنشا, ونىڭ 11 جاستاعى قىزى مەن جەتى, بەس جانە ءتورت جاستاعى ۇلدارى تاڭەرتەڭگى ۋاقىتتا ءۇيدىڭ اۋلاسىندا ويناپ جۇرگەن. ءبىرشاما ۋاقىتتان كەيىن قاراسا, جاقىن ارادا بالالارى كورىنبەيدى. اناسى ءوزى ارى-بەرى ىزدەپ, جارتى ساعاتتاي ۋاقىتىن جۇمسايدى. ىزدەۋدەن ناتيجە شىقپاعاننان كەيىن, پوليتسەيلەردەن جاردەم سۇراعان.
وقيعا ورنىنا بىرنەشە توپقا بولىنگەن ءتارتىپ ساقشىلارى جەدەل جەتتى. جان-جاقتى ىزدەستىرۋ جۇمىستارىن جۇرگىزدى. كۋاگەرلەردەن سۇراستىردى, كوشە-كوشەنى, ۇيلەردى رەتىمەن مۇقيات قاراپ شىقتى. ودان بولەك, قاراۋسىز قالعان ۇيلەر دە تىڭعىلىقتى تەكسەرىلدى. بىرنەشە ساعاتقا سوزىلعان پوليتسەيلەردىڭ ىزدەستىرۋى وڭ ناتيجە بەرىپ, بالالار سەگىز شاقىرىم قاشىقتىقتاعى باسقا كوشەدەن تابىلدى. وسىلايشا ويناپ ءجۇرىپ اداسقان بۇلدىرشىندەردى يۋۆەنالدى پوليتسيا توبىنىڭ ينسپەكتورى تويلىباي قوشتاەۆ امان تاپتى. ءتارتىپ ساقشىلارى بالالاردىڭ اس-سۋىن بەرىپ, جاعدايى جاقسى ەكەنىنە كوز جەتكىزىپ, اتا-انالارىنا ءتۇسىندىرۋ جۇمىستارىن جۇرگىزدى. بالاقايلاردى ۇيلەرىنە قايتاردى.
