كەزدەسۋدە ەل پرەزيدەنتىنىڭ تاپسىرمالارىن زاڭنامالىق تۇرعىدان قامتاماسىز ەتۋ ماسەلەلەرى قاراستىرىلدى. سەنات توراعاسى مەملەكەت باسشىسى قاسىم-جومارت توقاەۆقا قابىلدانعان بىرقاتار زاڭدار جونىندە, سونىڭ ىشىندە, رەسپۋبليكالىق بيۋدجەت تۋرالى زاڭعا ەنگىزىلگەن وزگەرتۋلەر مەن تولىقتىرۋلار, سايلاۋ تۋرالى زاڭعا ەنگىزىلگەن تۇزەتۋلەر تۋرالى ايتتى. مەملەكەت باسشىسى اتالعان زاڭدارعا قول قويدى.
جوعارعى پالاتا كۆازيمەملەكەتتىك سەكتورداعى ساتىپ الۋلاردى رەتتەيتىن زاڭ قابىلدادى. قازىرگى ۋاقىتتا الەۋمەتتىك كاسىپكەرلىكتى دامىتۋ, سالىق كودەكسىنە وزگەرتۋلەر مەن تولىقتىرۋلار ەنگىزۋ جانە باسقا دا زاڭ جوبالارى دەپۋتاتتاردىڭ قاراۋىندا جاتىر.
ماۋلەن اشىمباەۆتىڭ مالىمەتى بويىنشا وسى سەسسيا باستالعالى بەرى سەناتورلار 12 زاڭ جوباسىنا باستاماشى بولدى. ونىڭ 3-ءىن پارلامەنت قابىلداسا, 4-ءۋى سەنات پەن ءماجىلىستىڭ قاراۋىندا. تاعى 5 زاڭ جوباسى دەپۋتاتتاردىڭ باستاماسىمەن ازىرلەنىپ جاتىر.
سەنات توراعاسى پرەزيدەنتكە پارلامەنتارالىق ىنتىماقتاستىقتى دامىتۋ, رەسەي, وزبەكستان جانە باسقا دا ەلدەردىڭ زاڭ شىعارۋشى ورگاندارىمەن بايلانىستاردى نىعايتۋ جونىندە ايتتى.
سونىمەن قاتار ماۋلەن اشىمباەۆ مەملەكەت باسشىسىنىڭ تاپسىرماسى بويىنشا ازىرلەنگەن «اشارشىلىق. گولود. 1928-1934. دەرەكتى حرونيكا» جيناعىن ۇسىندى. اتالعان ءۇش تومدىقتا قازاقستانداعى كۇشتەپ ۇجىمداستىرۋدىڭ قاسىرەتتى تاريحىن باياندايتىن مىڭنان استام ارحيۆ قۇجاتتارى جيناقتالعان.
