جەدەل الدىن الۋ ءىس-شاراسى بارىسىندا وبلىس جولدارىندا, اسىرەسە تۇنگى ۋاقىتتا پاترۋلدىك پوليتسيا جاساقتارىنىڭ تىعىزدىعى ارتقان. اتالعان شارا شەڭبەرىندە بەس كۇننىڭ ىشىندە پوليتسيا قىزمەتكەرلەرى جول قوزعالىسى ەرەجەلەرىن بۇزۋعا قاتىستى 3447 اكىمشىلىك بۇزۋشىلىقتى انىقتاپ, جولىن كەستى. ونىڭ ىشىندە 327 جول ەرەجەسىن ورەسكەل بۇزۋ دەرەگى بار. ونىڭ 37-ءسى قوعامدىق كولىك جۇرگىزۋشىلەرى تاراپىنان جاسالعان.
بۇل رەتتە وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى راحىمبەردى اشكەەۆ مەملەكەتتىك نەمەسە مىندەتتى تەحنيكالىق بايقاۋدان وتپەگەن كولىك قۇرالىن باسقارۋدىڭ 119 دەرەگى انىقتالعانىن ايتتى. ال, باعدارشامنىڭ تىيىم سالاتىن بەلگىسىنە قاراماستان جۇرگەنى ءۇشىن 75 جۇرگىزۋشى, جاياۋ جۇرگىنشىلەرگە نەمەسە جول ءجۇرىسىنىڭ وزگە دە قاتىسۋشىلارىنا قوزعالىس كەزىندە باسىمدىق بەرمەگەنى ءۇشىن 54 جۇرگىزۋشى جانە اپاتتىق جاعداي تۋعىزۋعا اكەپ سوققان جول قوزعالىسى قاعيدالارىن بۇزعانى ءۇشىن 34 جۇرگىزۋشى جاۋاپكەرشىلىككە تارتىلعان. «سونىمەن قاتار, كولىك قۇرالىن الكوگولدىك, ەسىرتكىلىك نەمەسە ۋىتقۇمارلىق ماساڭ كۇيدە باسقارعانى ءۇشىن 22 جۇرگىزۋشى ۇستالدى. ءتيىستى رۇقساتسىز قايتا جابدىقتالعان كولىك قۇرالىن باسقارۋدىڭ 14 دەرەگى انىقتالدى. كولىك قۇرالىن جولدىڭ ءجۇرۋ بولىگىندە ورنالاستىرۋ, قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋدىڭ بەس دەرەگى جانە كورىنەۋ جالعان نەمەسە قولدان جاسالعان مەملەكەتتىك تىركەۋ نومىرلىك بەلگىسى بار كولىك قۇرالىن باسقارۋدىڭ ءبىر دەرەگى انىقتالدى», دەيدى راحىمبەردى اشكەەۆ. ايتا كەتەيىك, جىل باسىنان بەرى وبلىستا 344 جول-كولىك وقيعاسى تىركەلىپ, 40 ادام قازا تاۋىپ, 489 ازامات ءتۇرلى دارەجەدەگى جاراقات العان.
جامبىل وبلىسى
