قازىر پوليمەر مەن ارالاس قاپتاما (تەتراپاك) قالدىعىن قايتا وڭدەۋ كەشەندەرىن سالۋعا قاتىستى جوبالار كونكۋرستىق ىرىكتەۋدەن ءوتىپ جاتىر. وڭىرلەردە قتق-نى بولەك جيناۋدى دامىتۋعا ارنالعان نىساندار ىسكە قوسىلىپ, ءتيىستى ينفراقۇرىلىم دامىعاندا 2025 جىلعا دەيىن قايتالاما شيكىزاتتى (مەتالل, پلاستيك, شىنى جانە پلاستيك) وڭدەۋ كولەمىن 30%-عا دەيىن جەتكىزۋگە مۇمكىندىك تۋادى. قايتا وڭدەۋگە جارامايتىن قالدىقتار ەكولوگيالىق كودەكسكە سايكەس, ەنەرگياعا اينالدىرۋ (Waste to Enەrgy) زاۋىتتارىنا جىبەرىلەتىن بولادى.
«قالدىقتى ءبولىپ جيناۋ جانە دەپوزيتتىك-كەپىلدىك جۇيەسىن ەنگىزۋ ارقىلى قالدىقتىڭ 30%-ىن قايتا كادەگە جاراتۋعا جول اشىلادى. قايتا وڭدەۋگە كەلمەيتىن قالدىقتىڭ 20%-ى ورتەۋگە جىبەرىلمەيدى. قالعان قالدىقتار قاتتى لاستانعان جانە بۇگىندە ولاردى جويۋدىڭ جالعىز جولى – ەنەرگەتيكالىق كادەگە جاراتۋ», دەدى ەكولوگيا, گەولوگيا جانە تابيعي رەسۋرستار ۆيتسە-ءمينيسترى احمەتجان پىرىمقۇلوۆ.
تاياۋدا مينيسترلىك قالدىقتاردى ەنەرگياعا اينالدىرۋ جوبالارىنا بايلانىستى اۋكتسيوندى ساۋدا-ساتتىق جاريالاعان ەدى. Waste to Energy (قالدىقتى ەنەرگەتيكالىق كادەگە جاراتۋ) كەشەندەرىن اقتوبە, الماتى, وسكەمەن, نۇر-سۇلتان, قاراعاندى جانە شىمكەنت قالالارىندا ىسكە قوسۋ جوسپارلانۋدا. زاۋىتتاردىڭ قۇرىلىسى ينۆەستورلاردى تارتۋ ەسەبىنەن جۇرگىزۋ كوزدەلىپ وتىر. ينۆەستورلارعا قويىلاتىن باستى تالاپ – ەۋروپالىق پارلامەنت پەن ەۋروپالىق وداق كەڭەسىنىڭ ارنايى ديرەكتيۆاسىنىڭ نورماسىنا سايكەس, ءتۇتىن گازىن تازارتۋدىڭ 5 ساتىلى جۇيەسىن ورناتۋ. بولاشاق زاۋىتتار زياندى قالدىقتى باقىلايتىن اۆتوماتتاندىرىلعان جۇيەمەن جابدىقتالادى. قازىر جەر ۋچاسكەلەرىن بەرۋ جانە ينفراقۇرىلىم جۇرگىزۋگە قاتىستى ماسەلەلەر پىسىقتالىپ جاتىر. بولجام بويىنشا 6 زاۋىتتى ىسكە قوسۋ ناتيجەسىندە 2025 جىلعا قاراي قالدىق وڭدەۋ كولەمى 30%-عا دەيىن جەتكىزىلۋى ءتيىس. ورتەۋگە كەلمەيتىن قالدىقتار كولەمى 20%-دى قۇراسا, قالعان قالدىقتى ەنەرگياعا اينالدىرۋ جوسپارلانىپ وتىر.
