بۇۇ باس حاتشىسى انتونيۋ گۋتەرريشتىڭ باستاماسىمەن وتكەن ۆيرتۋالدى ءىس-شاراعا مەملەكەتتەر مەن ۇكىمەتتەردىڭ باسشىلارى, حالىقارالىق ۇيىمداردىڭ جەتەكشىلەرى, ىسكەرلىك توپتاردىڭ وكىلدەرى مەن ساراپشىلار قاتىستى.
قاسىم-جومارت توقاەۆ ءوز سوزىندە كوروناۆيرۋستان كەيىنگى قايتا قالپىنا كەلتىرۋ ءىسى قورشاعان ورتانى قورعاۋ ماسەلەسىن حالىقارالىق كۇن تارتىبىندەگى ەڭ وزەكتى پروبلەما رەتىندە قويۋعا جاقسى مۇمكىندىك بەرەدى دەگەن پىكىر ايتتى.
مەملەكەت باسشىسى قازاقستاننىڭ كومىرتەگىنەن ادا ەكونوميكانى دامىتۋدىڭ بالاماسى جوق دەگەن ۇستانىمدا ەكەنىن جەتكىزدى. ونىڭ ايتۋىنشا, قازاقستان تمد-دا پاريج كەلىسىمىن ءبىرىنشى بولىپ راتيفيكاتسيالاپ, ورنىقتى دامۋ ماقساتىنا قول جەتكىزۋگە باعىتتالعان بەلسەندى كليماتتىق ساياساتتى العاش قابىلداعان ەل بولدى.
پرەزيدەنت قازاقستاننىڭ 2060 جىلعا قاراي كومىرتەگىنەن تازا ەل بولۋعا قول جەتكىزۋگە نيەتتى ەكەنىن ەسكە سالدى. بۇل باستاما 2020 جىلى جەلتوقساندا وتكەن كليماتتىڭ وزگەرۋىنە بايلانىستى ماڭىزدى مىندەتتەر جونىندەگى سامميت بارىسىندا ايتىلدى.
قاسىم-جومارت توقاەۆ قازاقستاننىڭ الەمدە ەڭ كوپ ەنەرگيا پايدالاناتىن ەل ەكەنىنە نازار اۋداردى. ويتكەنى ونەركاسىپتىڭ 50 پايىزىن ءوندىرۋشى سەكتور قۇرايدى. ەلەكتر ەنەرگياسىن ءوندىرۋدىڭ شامامەن 70 پايىزى بۇرىنعىشا كومىرگە تاۋەلدى بولىپ وتىر.
وسىعان بايلانىستى مەملەكەت باسشىسى قازاقستاننىڭ ورنىقتى دامۋىندا ءوندىرۋشى ونەركاسىپتىڭ ەكولوگيالىق تالاپتارعا ساي بولۋىن باستى مىندەت جانە زور باسىمدىق دەپ اتاپ ءوتتى.
پرەزيدەنتتىڭ ايتۋىنشا, قازىرگى ۋاقىتتا قازاقستاندى 2050 جىلعا دەيىن كومىرتەگىن از پايدالانىپ, دامىتۋ تۇجىرىمداماسى ازىرلەنىپ جاتىر.
– كومىر جاعۋ سالدارىنان تۋىندايتىن ەنەرگەتيكالىق تەڭگەرىمگە تاۋەلدىلىكتى ازايتۋ ءۇشىن گاز جانە سۋ ەنەرگەتيكاسىن دامىتۋ, جاڭارتىلاتىن قۋات كوزدەرىن پايدالانۋ سياقتى نەگىزگى باسىمدىقتاردى شەشۋگە باعىتتالعان ەلەكتر ەنەرگەتيكاسىن دامىتۋ جونىندەگى ۇلتتىق جوبا ازىرلەنەدى. بۇدان بولەك الداعى بەس جىل ىشىندە قازاقستاندا 2 ميللياردقا دەيىن اعاش وتىرعىزىلادى, – دەدى قاسىم-جومارت توقاەۆ.
مەملەكەت باسشىسى بۇۇ باس حاتشىسى انتونيۋ گۋتەرريشتىڭ الەم ەندى بۇرىنعىداي بولمايدى دەگەن ءسوزىن قولدادى. بۇل رەتتە قاسىم-جومارت توقاەۆ بىردە-ءبىر مەملەكەتتىڭ ارتتا قالماۋى ءۇشىن بەلسەندى تۇردە حالىقارالىق كۇشتى جۇمىلدىرۋعا شاقىردى. ال 2030 جىلعا دەيىنگى ورنىقتى دامۋ ماقساتتارىنا قول جەتكىزۋگە باعىتتالعان كۇن ءتارتىبى تولىق ىسكە اسىرىلۋعا ءتيىس.
– ساليقالى ساياسات پەن ينۆەستيتسيالاردىڭ ارقاسىندا ءبىز بارىنشا جاھاندىق جاسىل ەكونوميكاعا قاراي بەت بۇرا الامىز. بۇل ماقساتقا قول جەتكىزۋ ءۇشىن جەكەمەنشىك, سونداي-اق, مەملەكەتتىك سەكتورلار ەسەبىنەن قاجەتتى قارجى رەسۋرستارىن جۇمىلدىرۋ ماڭىزدى. ءبىز «COVID-19 پاندەمياسى كەزەڭىندە دامۋدى قارجىلاندىرۋ سالاسىنداعى حالىقارالىق كۇش-جىگەردى جۇمىلدىرۋ» اياسىندا كوپجاقتى ءىس-قيمىلدى ۇيلەستىرۋدى قولدايمىز, – دەدى قازاقستان پرەزيدەنتى.
قاسىم-جومارت توقاەۆ ناقتى ءارى ەكولوگيالىق قايتا قالپىنا كەلتىرۋ ءىسى 2030 جىلعا دەيىنگى ورنىقتى دامۋدىڭ كۇن ءتارتىبى مەن پاريج كەلىسىمىندە كورسەتىلگەن مىندەتتەردىڭ اجىراماس بولىگى ەكەنىن اتاپ ءوتتى.
مەملەكەت باسشىسىنىڭ پىكىرىنشە, 2021 جىل كليماتتىڭ جىلدام وزگەرۋىن جانە قورشاعان ورتانىڭ بۇزىلۋىن باياۋلاتۋعا مۇمكىندىك بەرىپ وتىر.
– قورشاعان ورتانى قورعاۋعا باعىتتالعان يگى شارالاردى ساۋدا جانە ينۆەستيتسيالارعا قارسى قولدانىلاتىن كەدەرگىگە اينالدىرماۋ اسا ماڭىزدى. مەن قازاقستاننىڭ وسى يگى باستامالاردى ناقتى قولدايتىنىن راستايمىن, – دەدى پرەزيدەنت.
