ميگرانتتار تۇرىپ جاتقان بوسانسكا بوينا اۋىلى 1992-95 جىلدارداعى بوسنياداعى سوعىس كەزىندە بوساپ قالعان. ونداعى حالىق كوشىپ كەتكەن ۇيلەر بۇگىندە قۇلاپ تا ۇلگەرگەن. ەۋروپاعا بەتتەگەن ميگرانتتار بۇل جەردى پانا ەتىپ ءبىراز ءومىر ءسۇردى. الايدا دارىگەردىڭ, باسقا دا ادام ومىرىنە قاجەت مامانداردىڭ بولماۋى بۇگىندە جاعدايدىڭ ۋشىعۋىنا اكەلگەن.
اۋىل تۇرعىندارىنىڭ كوبى اۋرۋعا شالدىققان. دالادا ۇيىقتاپ, سانيتارلىق تالاپقا ساي كەلمەيتىن جەردە ءومىر ءسۇرۋ اقىرى ءوز سالدارىن تانىتىپ جاتىر.
بوسنيا مەن گەرتسەگوۆينا ۇكىمەتى ولارعا ارنايى لاگەرلەرگە كوشۋدى ۇسىنعان جانە كوشپەيىنشە گۋمانيتارلىق كومەك المايتىندارىن ەسكەرتكەن. رەسمي لاگەرلەردە مىڭداعان ادام تۇرىپ جاتقان كورىنەدى. ولاردىڭ كوبى بوسنيا ارقىلى ەۋروپا وداعىنىڭ مۇشەسى سانالاتىن حورۆاتياعا جەتىپ, ودان ءارى قاراي باسقا ەلدەرگە قونىس اۋدارۋدى كوزدەيدى.
ال حورۆاتيا اسكەرى بولسا, ساق. زاڭسىز وتۋگە تىرىسقان بوسقىنداردى تۇتقىنداپ, كەرى قايتارىپ جاتىر. ياعني شەكارادان ءوتۋ ازىرگە مۇمكىن ەمەس. ميگرانتتار ءتىپتى قارسىلاسقاندارعا كۇش كورسەتىلەتىنىن ايتادى. ماسەلەن, باسىلىمعا سۇحبات بەرگەن اۋعانستان ازاماتى ارزو ازەمي كەيىنگى ەكى ايدا ون شاقتى رەت شەكارانى كەسىپ وتپەك بولعانىن, الايدا ەشبىر تالپىنىسى ءساتتى اياقتالماعانىن ايتتى. ونىڭ ايەلى حورۆاتيا اسكەرى كۇيەۋىنىڭ اقشاسى مەن جانىندا بولعان باعالى زاتتارىن الىپ قالعانىن حابارلادى. دەگەنمەن ۇكىمەت بۇعان قاتىستى شارا قولدانۋعا اسىعار ەمەس.
