ماتچ جانكۇيەرلەر كۇتكەندەي اسا تارتىستى باستالعان جوق. كەزدەسۋدىڭ 30-مينۋتىنا دەيىن ەكى كوماندا ءبىراز اڭدىسىپ باققانىمەن, ەكى كلۋب فۋتبولشىلارى دا قاقپاعا ءدال سوققى جاساي المادى. تەك ءبىرىنشى تايم سوڭىنا قاراي ازداعان بەلسەندىلىك بايقالدى. سونداي ساتتەردىڭ بىرىندە «قايراتتىڭ» برازيليالىق شابۋىلشىسى ۆاگنەر لاۆ كوماندالاسى حوسە كانتەنى «استانا» قاقپاشىسىمەن بەتپە-بەت شىعارعان. الايدا كانتە سوققىسىن نەپوگودوۆ وڭاي قايتاردى. ىزىنشە نەبويشا كوسوۆيچ دوپقا ءبىرىنشى جەتىپ, سوققى باعىتتاپ ۇلگەرگەن, الايدا ول باعانادان كەرى سەرپىلدى. بۇدان كەيىن دوپ وسى شابۋىلدى ۇيىمداستىرعان ۆاگنەر لاۆقا جەتكەنىمەن, ول دا قاقپانى ءدال كوزدەي العان جوق. «استانا» ايىپ الاڭىندا ەركىن كوسىلگەن الماتىلىقتاردىڭ شابۋىلىن كامو وگانەسيان باسپەن تۇيىندەۋگە تالپىنعان. بىراق ءالسىز سوققىنى قاقپاشى توسىپ الدى.
ءبىرىنشى تايمدا كورەرمەندەر گول كورە العان جوق. ەكىنشى تايم دا سىلبىر باستالدى. دەگەنمەن, كەزدەسۋدىڭ العاشقى گولىن 87-مينۋتتا «استانا» فۋتبولشىسى تيگران بارسەگيان سوقتى. ماكس ەبونگتان پاس العان بارسەگيان ءۇش بىردەي قورعاۋشىنىڭ اراسىنان سىتىلىپ شىعىپ, قاقپاشى پوكاتيلوۆتى دا اينالىپ ءوتىپ, بوس قالعان قاقپانى ءدال كوزدەدى.
بۇل گولعا «قايرات» ويىنشىلارى جىلدام جاۋاپ بەردى. ايبول ابىكەننىڭ الىستان باعىتتاعان جويقىن سوققىسىن نەپوگودوۆ ارەڭ قايتارىپ, اۋتقا جىبەرگەن. 91-مينۋتتا اۋتتان اۋەلەي كەلگەن پاسقا ءبىرىنشى جەتكەن كاپيتان سۇيىمباەۆ دوپتى جەرگە تۇسىرمەگەن كۇيى تەۋىپ, «استانا» قورعاۋشىلارى مەن قاقپاشىسىن شاراسىز قالدىردى. قورىتىندى ەسەپ – 1:1.
13-تۋردان كەيىن ەكى كوماندا اراسىنداعى ايىرماشىلىق وزگەرىسسىز قالدى – 12 ۇپاي. «استانا» 33 ۇپايمەن كوش باستاسا, «قايرات» 21 ۇپايمەن ءتورتىنشى ساتىعا تۇراقتادى. 14-تۋردا «قايرات» ءوز الاڭىندا «قايساردى» قابىلداسا, «استانا» سىرت الاڭدا «كاسپيمەن» وينايدى.
سونىمەن قاتار جەكسەنبىنىڭ كەشىندە 13-تۋردىڭ تاعى ەكى ويىنى ءوتتى. قىزىلورداعا ساپار شەككەن تالدىقورعاننىڭ «جەتىسۋى» سىرت الاڭدا «قايسار» قاقپاسىنا جاۋاپسىز ەكى گول سوعىپ, قاتارىنان ەكىنشى ويىندا جەڭىسكە جەتتى. ەكىنشى ويىندا «اقتوبە» ءوز الاڭىندا تۇركىستان وبلىسىنىڭ «تۇران» كلۋبىن قابىلدادى. قوبىلاندى باتىر ستاديونىندا وتكەن ماتچ 2:0 ەسەبىمەن «تۇراننىڭ» پايداسىنا اياقتالدى. تۇركىستاندىق كلۋب بۇل ويىننان كەيىن 15 ۇپايمەن تۋرنير كەستەسىندە «اقتوبەنى» ارتقا تاستاپ, 10-ورىنعا كوتەرىلدى.
