اتاپ ايتقاندا, «قىزىل» سىزىق تالابىن ساقتاماعان نىسانداردى بۇزۋ بويىنشا ءتيىستى باسشىلارعا ناقتى تاپسىرما جۇكتەگەن ەدى. بۇگىندە بەرىلگەن تاپسىرمانىڭ ورىندالۋ قارقىنى قانداي؟ ءتيىستى مەكەمەلەر ايتىلعان سىننان قورىتىندى شىعاردى ما؟
وبلىستىق ساۋلەت جانە قالا قۇرىلىسى باسقارماسىنىڭ باسشىسى ارمان ابدەشوۆءتىڭ ايتۋىنشا, وتكەن جىلى وبلىس اكىمىنىڭ تاپسىرماسى بويىنشا كوممەرتسيالىق كاسىپورىندار قۇرىلىسىنىڭ زاڭدىلىعىنا تەكسەرۋلەر جۇرگىزىلگەن ەكەن. تەكسەرۋ بارىسىندا بارلىعى 123 نىساننىڭ «قىزىل» سىزىق تالابىن بۇزعاندىعى انىقتالىپ, بۇگىنگە دەيىن 85 نىسان سۇرىلگەن.
سونداي-اق, اتالعان باسقارما باسشىسى قالعان 38 نىسانعا قاتىستى اۋداندىق اكىمدىكتەر ءتيىستى شارا قولدانباي وتىرعانىن جەتكىزدى. اعىمداعى جىلدىڭ باسىنان بەرى «قىزىل» سىزىقتان اسقان تاعى 80 نىسان, ودان بولەك قۇرىلىس سالۋدى ۇيىمداستىرۋ جانە رۇقسات بەرۋ راسىمدەرىنەن ءوتۋ جانە پايدالانۋ قاعيداسىنا ساي قۇجاتتارى راسىمدەلمەگەن 16 زاڭسىز قۇرىلىس انىقتالعان.
بۇل ورايدا, بەردىبەك ساپارباەۆ اۋدان اكىمدەرى قۇرىلىس نورمالارى مەن ەرەجەلەرىن بۇزۋدى جويۋ بويىنشا ناقتى شارالار قابىلداۋعا قۇزىرسىز ەكەنىن ايتتى.
«قىزىل» سىزىققا قاتىستى ماسەلە ءبىرىنشى رەت تالقىلانىپ وتىرعان جوق. زاڭسىز سالىنعان نىسانداردى بۇزىپ جاتقانىمىزبەن, مىنا جاقتان تاعى دا زاڭسىز جاڭا نىساندار بوي كوتەرۋدە. دەمەك, جاۋاپتى ورگاندار مەن اكىمدىكتەر بىرلەسىپ جۇمىس ىستەي الماي وتىر. ءبارى جاۋاپكەرشىلىكتى ءبىر-بىرىنە ىسىرا سالۋعا دايىن. رەسمي حاتتار جولداپ قويىپ, جاۋابىن كۇتىپ وتىرۋعا ۇيرەنگەنسىزدەر. ال, ناقتى جۇمىستى باستاۋعا ەشكىم اسىعار ەمەس. بۇل بيۋروكراتيا قاشان اياقتالادى؟», دەدى اكىم.
وسى ورايدا بەردىبەك ساپارباەۆ قۇرىلىس سالاسىنداعى زاڭسىزدىقتاردى قىسقا مەرزىمدە جويۋ بويىنشا ارنايى ءىس-شارالار كەستەسىن ازىرلەۋدى تاپسىرىپ, تاراز قالاسى مەن اۋدان اكىمدىكتەرى سالىنىپ جاتقان نىسانداردىڭ يەلەرىندە ءتيىستى رۇقسات قۇجاتتارىنىڭ بار-جوقتىعىن زەردەلەپ, دەر كەزىندە قاجەتتى شارالاردى قابىلداۋى ءتيىس ەكەنىن جەتكىزدى.
سونىمەن قاتار, مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسىنا دا قۇرىلىس جۇمىستارىنىڭ ساپاسىن قاداعالاۋدى تاپسىردى.
