10 مامىر كۇنگى ريددەر ورمان شارۋاشىلىعىنداعى ءىرى دالا ءورتى مولشەرى 310 گەكتار اۋماقتى شارپىپ, 1 ادام قازا تاۋىپ, 37 ءۇي مەن 9 شارۋاشىلىقتىڭ ءاپ-ساتتە ك ۇلى كوككە ۇشتى. ءىرى ورتكە سەبەپكەر بولعان كۇدىكتى كىناسىن مويىنداپ, زاڭدى تۇردە ءتيىستى جازاسىن دا الار, بىراق ادام قازاسى, باسپاناسىز دالادا قالعان وتباسىلار, فاۋنا مەن فلوراعا كەلگەن زيان, كۇيگەن توپىراق قاباتىنىڭ ورنىنا قايتا كەلمەس جەر بەدەرىنىڭ وزگەرۋى جانعا اۋىر ءتيدى. وسى ورنى تولماس تابيعات بايلىعىنىڭ قايتا قالپىنا كەلۋى ءۇشىن 20-30, ءتىپتى جارتى عاسىرلىق ۋاقىت قاجەت ەكەن.
ريددەردىڭ ءبىر بايلىعى – ورمانى ەدى. ونىڭ قاس قاعىم ساتتە ورتكە ورانعانى بارىمىزگە وكىنىشتى-اق. جالپى ورمانداعى ءورت تومەندەگى جانە جوعارىداعى بولىپ ەكى تۇرگە بولىنەدى. جوعارىداعى ءورت قاتتى جەل سوققاندا باستالىپ, ۇشقىندارى بۇتاقتان بۇتاققا تۇسەدى. جالىن جان-جاققا شاشىرايدى. ورمان ءورتى اعاش قورىن ازايتىپ, قالىڭ اعاشتار اۋماعىن مۇلدە ورتەپ جىبەرەدى. وندا مەكەن ەتەتىن قۇستار مەن جان-جانۋارلار تىرشىلىگىن جويادى.
ەلىمىزدىڭ ورمان قورى از. ال وسى قوردى ساقتاۋ – مەملەكەت ءۇشىن ماڭىزدى. ءورت اۋا رايىنان عانا ەمەس, سونبەي قالعان شوقتان, ابايسىز تابيعاتتاعى دەمالۋشىلار ارەكەتىنەن, شارۋا قوجالىقتارى يەلەرىنىڭ ەگىستىك القاپتارىن تازارتۋ جۇمىستارىمەن وت قويىپ, ونى باقىلاۋسىز قالدىرۋىنان دا پايدا بولادى. ورماندى ورتتەن ساقتاۋ, تابيعاتقا تاعىلىق كورسەتپەۋ – جەرىنەن ءنار الىپ, اۋاسىمەن تىنىستاپ, ورمانىندا سايالاپ وتىرعان ءار ادامعا ورتاق مىندەت. ءورت – ءتىلسىز جاۋ, ەلدىڭ, ءوڭىردىڭ ەكونوميكالىق الەۋەتىنە ۇلكەن ماتەريالدىق شىعىن كەلتىرىپ, تۇرعىنداردىڭ ومىرىنە قاۋىپ توندىرەتىنىن وسى وقيعادان كوزى اشىق, كوكىرەگى وياۋ ادام ۇعىپ وتىر. ورمان ورتىنەن كەيىن ەسەڭگىرەپ قالعان ريددەردىڭ ورمان شارۋاشىلىقتارى مەن حالقىنا عانا ەمەس, بارشاعا ساباق بولسا ەكەن دەيمىز.
«تارباعاتاي» مەملەكەتتىك ۇلتتىق تابيعات پاركىنىڭ جالپى اۋماعى 143 550 گەكتاردى قۇرايدى, ونىڭ ىشىندە ورمانمەن قامتىلعان اۋماعى 7183 گەكتار. وسى از ورماندى القاپتا ءۇرجار, ەمىل وزەندەرىنىڭ اڭعارىنان قاساقانا جانە سالعىرتتىق ءىس-ارەكەتتەردىڭ سالدارىنان بىرنەشە ءورت بولدى. قاتىنسۋ وزەنى بويىنان بىرنەشە رەت زاڭسىز اعاش كەسۋ فاكتىلەرى تىركەلدى. ۇستالعان ازامات 0,6 كۋب اعاش كەسىپ, 4 248 تەڭگە زالال كەلتىرگەنى ءۇشىن قولدانىستاعى زاڭناماعا سايكەس 30 اەك( 87 510 تەڭگە) جانە ەرەكشە قورعالاتىن تابيعات ايماعىنا رۇقساتسىز كىرگەنى ءۇشىن 2 اەك (5 834 تەڭگە) ايىپپۇل, ياعني جالپى قۇنى 97 592 تەڭگە تولەيدى. «تەك جۇرسەڭ, توق جۇرەسىڭ»دەگەن وسى.
ۇلتتىق پارك قىزمەتكەرلەرىنىڭ باستى مىندەتى – ورماندى, تابيعاتتى قورعاۋ. ريددەردەگى ءورت ءبىزدىڭ قابىرعامىزدى قايىستىرىپ كەتتى. ول وسىنداي ءىرى اپاتتىڭ الدىن الۋعا كوپ بولىپ, قوعام بولىپ جۇمىلۋىمىز قاجەت ەكەنىن كورسەتتى. سوندا عانا ايالى تابيعاتىمىز سايالى بولادى.
الىبەك توقىمتاەۆ,
«تارباعاتاي» مەملەكەتتىك ۇلتتىق تابيعات پاركىنىڭ ديرەكتورى
