ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 25 جىلدىعىنا ارنالعان عىلىمي كەڭەستىڭ سالتاناتتى وتىرىسى ءوتتى. سانيتارلىق تالاپ ساقتالعان جيىندى ەۇۋ رەكتورى, ۇعا اكادەميگى ەرلان سىدىقوۆ اشتى.
«ەلباسى ن.نازارباەۆتىڭ ل.ن.گۋميلەۆ اتىنداعى ەۋرازيا ۋنيۆەرسيتەتىن قۇرۋ تۋرالى جارلىعى وتاندىق ءبىلىم-عىلىم سالاسىنىڭ جاڭا پاراعىن اشتى. اتاپ ايتساق, بىرىنشىدەن, ەلباسى ەۋرازيا ۋنيۆەرسيتەتىن قۇرۋ ارقىلى 1994 جىلى 29 ناۋرىزدا ماسكەۋ مەملەكەتتىك ۋنيۆەرسيتەتى مىنبەرىنەن جاريا ەتكەن ەۋرازيالىق ەكونوميكالىق وداق يدەياسىنا سەرپىن بەردى. ەكىنشىدەن, قازاقستاننىڭ جاڭا استاناسىنىڭ ينتەللەكتۋالدىق ىرگەتاسىن قالادى. ۇشىنشىدەن, وتاندىق جوعارى مەكتەپتىڭ درايۆەرى رەتىندە ەۋرازيا ۋنيۆەرسيتەتىنە زور مۇمكىندىك تۋعىزدى. ال وقۋ ورنىنا تۇركىتانۋشى, تاريحشى, گەوگراف لەۆ گۋميلەۆتىڭ اتىن بەرۋ ارقىلى جاس بۋىنعا ەل تاريحىنىڭ تەرەڭدىگىن, كونە تۇركى قۇندىلىقتارىنىڭ ماڭىزدىلىعىن مەڭزەدى. بۇدان دا ماڭىزدى قادام – قازاقستان جولىنىڭ, قازاقستان دامۋىنىڭ, لەۆ گۋميلەۆ ايتقانداي, پاسسيونارلىق جاڭعىرۋىن ايقىندادى», دەدى رەكتور.
وسىدان سوڭ ەۇۋ باسشىسى اتالعان ۋنيۆەرسيتەتتە ەڭبەك ەتكەن ءىرى تۇلعالار مەن ولاردىڭ جەمىستى جۇمىستارىنا توقتالدى. ونىڭ ايتۋىنشا, امانگەلدى قۇسايىنوۆ, مىرزاتاي جولداسبەكوۆ, سارسەنعالي ءابدىماناپوۆ, باقىتجان ءابدىرايىم – ەكس-رەكتورلار ەمەس, تاريحتا اتى قالعان رەكتورلار. ال جابايحان ءابدىلدين, بولات كومەكوۆ, سەيىت قاسقاباسوۆ, راحمەتقاجى بەرسىمباي, مۇحتارباي وتەلباەۆ, عاريفوللا ەسىم, رىسقۇل وينار ۇلى, قارجاۋباي سارتقوجا ۇلى, قويشىعارا سالعارا ۇلى, سايلاۋ باتىرشا ۇلى, ەڭلىك نۇرعاليەۆا, شاكىر يبراەۆ, نامازالى وماش ۇلى, عادىلبەك شالاحمەتوۆ, سەرىك نەگيموۆ, ت.ب. اكادەميكتەر مەن ايگىلى پروفەسسورلار ۇلتتىق ۋنيۆەرسيتەتتىڭ عىلىمي مەكتەپتەرىن قالىپتاستىردى. سونداي-اق شيرەك عاسىردا ءبىلىم ورداسىنىڭ قابىرعاسىندا ەڭبەك ەتىپ, بۇگىندە باقيعا اتتانعان رىمعالي نۇرعالي, مىرزاتاي سەرعاليەۆ, اقسەلەۋ سەيدىمبەك, مىرزاگەلدى كەمەل, ءناۋبات قاليەۆ سىندى عالىمداردىڭ اتى ۇمىتىلمايدى.
سالتاناتتى جيىندا ءسوز العان ءبىلىم جانە عىلىم ءمينيسترى اسحات ايماعامبەتوۆ ەلباسى نۇرسۇلتان نازارباەۆتىڭ قۇتتىقتاۋ حاتىن وقىدى. وندا ۋنيۆەرسيتەت العاش قۇرىلعان كۇننەن باستاپ تاۋەلسىزدىكپەن بىرگە جاساسىپ كەلە جاتقانى جانە ەلىمىزدىڭ بەتكە ۇستار ءبىلىم ۇياسىنا اينالعانى ايتىلعان. قۇرىلعانىنا 50 جىل تولماعان الەمدىك ۋنيۆەرسيتەت اراسىندا ەۇۋ-دىڭ كوش باستاعانىن جەتكىزىپ, الداعى ۋاقىتتا ءبىلىم مەن عىلىمنىڭ كوشباسشىسى بولىپ, ۇلتتىق ۋنيۆەرسيتەتتىڭ بەدەلىن ارتتىرا بەرەتىنىنە جانە ۋنيۆەرسيتەت تۇلەكتەرى ەلىمىزدىڭ بارلىق سالاسىندا جەمىستى ەڭبەك ەتەتىنىنە سەنىم بىلدىرگەن. وتاندىق جوعارى وقۋ ورىندارىنىڭ اراسىندا الدى ەكەنى اتالىپ, ەۇۋ الداعى ۋاقىتتا دا جوعارى بىلىكتى مامانداردى دايارلاۋدا ماڭىزدى عىلىمي-ءبىلىم بەرۋ ورتالىعى رەتىندە قالا بەرەتىنىنە ءۇمىت ارتقان.
سونىمەن قاتار مينيستر ا.ايماعامبەتوۆ مەملەكەت باسشىسى قاسىم-جومارت توقاەۆتىڭ دا قۇتتىقتاۋىن جەتكىزدى. پرەزيدەنتتىڭ قۇتتىقتاۋىندا: «سىزدەردى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 25 جىلدىق مەرەيتويىمەن شىن جۇرەكتەن قۇتتىقتايمىن! وسىدان 25 جىل بۇرىن ەلباسى نۇرسۇلتان ءابىش ۇلى نازارباەۆتىڭ تىكەلەي باستاماسىمەن قۇرىلىپ, ەۇۋ ەۋروپا, ازيا, اقش, تاعى باسقا شەتەلدىك جوعارى وقۋ ورىندارىمەن, ءتۇرلى عىلىمي-زەرتتەۋ ورتالىقتارىمەن, شەتەل مەملەكەتتەرىنىڭ ەلشىلىكتەرىمەن, حالىقارالىق ءبىلىم بەرۋ ۇيىمدارىمەن قارىم-قاتىناس جاسايتىن ەۋرازيالىق يدەياسىن ىسكە اسىراتىن جەتەكشى ۋنيۆەرسيتەتكە اينالدى», دەلىنگەن.
پرەزيدەنت قۇتتىقتاۋىن وقىپ بەرگەننەن كەيىن ۆەدومستۆو باسشىسى ا.ايماعامبەتوۆ:
«بۇل ۋنيۆەرسيتەت قازاقستان توڭىرەگىندە عانا ەمەس, حالىقارالىق دەڭگەيدە قابىلەتتى بولىپ, الەمدەگى ۇزدىك ۋنيۆەرسيتەتتەردىڭ قاتارىنا ەنۋى كەرەك. قازىر ءدال وسىنداي مىندەتتى مەملەكەت باسشىسى ءبىزدىڭ الدىمىزعا قويىپ وتىر. ارينە, بۇل ءۇشىن بارلىق مۇمكىندىك بار دەپ ايتۋعا بولادى. جۋىردا ۋنيۆەرسيتەتتىڭ ديرەكتورلار كەڭەسىندە ەۇۋ-نى زەرتتەۋشى ۋنيۆەرسيتەت رەتىندە قايتا قالىپتاستىرۋ بويىنشا شەشىم قابىلدادىق. ەندى وسى شەشىمدى ۇكىمەتتىڭ قاراۋىنا شىعارىپ, ءتيىستى قاۋلى قابىلدانسا, ەۇۋ زەرتتەۋشى ۋنيۆەرسيتەت بولىپ, جاڭا بەلەستەرگە كوتەرىلەدى دەپ سەنەمىن», دەدى.
مينيستر ەۇۋ-نىڭ ءبىر توپ قىزمەتكەرىن مەرەكەلىك مەدالمەن ماراپاتتادى. ولاردىڭ ىشىندە ەلتاڭبا اۆتورى جانداربەك مالىبەك ۇلى, اكادەميك راحمەتقاجى بەرسىمباي, فيلولوگ-عالىم سەرىك نەگيموۆ, پەداگوگيكا عىلىمدارىنىڭ دوكتورى, پروفەسسور پەريزات سەيىتقازى «ىبىراي التىنسارين» توسبەلگىسىمەن ماراپاتتالسا, عالىمدار نۇرجان بوقاەۆ, نۇرساۋلە بورانباەۆا عىلىمدى دامىتۋعا قوسقان ۇلەسى ءۇشىن توسبەلگىسىن كەۋدەلەرىنە تاقتى.
وقۋ ورنىنىڭ مەرەيتويىن اتاپ وتۋدە توي تويلاۋعا ەمەس, يگى ىسكە دە كوبىرەك ءمان بەرىلگەندەي. سونىڭ ءبىر كورىنىسى بولار, ەۇۋ-نىڭ 25 جىلدىعىنا وراي «University sports centre» سپورتتىق-ساۋىقتىرۋ كەشەنى اشىلدى. جالپى اۋدانى 7 074 شارشى مەتر جانە ءار اۋىسىمدا 216 ادام قابىلداي الاتىن جاڭا سپورت كەشەنى ۆولەيبول, باسكەتبول, شاعىن فۋتبول, گاندبول, كۇرەس, بي سياقتى سپورتتىڭ ويىن تۇرلەرى بويىنشا ساباقتار وتكىزۋگە, سونداي-اق جارىستار مەن ارنايى سپورت سەكتسيالارىنىڭ جاتتىعۋ ساباقتارىن وتكىزۋگە ارنالعان. كەشەن عيماراتى ءتورت قاباتتان تۇرادى: ءبىرىنشى قاباتتا ەكى فۋتبول, ءبىر باسكەتبول جانە ءتورت ۆولەيبول الاڭى, ەكىنشى قاباتتا ەرلەر مەن ايەلدەردىڭ كيىم شەشەتىن بولمەلەرى, ءۇشىنشى قاباتتا ەرلەر مەن ايەلدەردىڭ جاتتىعۋ زالى, بوكس زالى, شاحمات ويناۋعا ارنالعان سپورت كابينەتتەرى, سونداي-اق توعىزقۇمالاق, اسىق اتۋ جانە بەس تاس سياقتى ۇلتتىق سپورت تۇرلەرى, ءتورتىنشى قاباتتا تەننيس ويناۋعا ارنالعان زال, شەيپينگ پەن بيگە ارنالعان سپورتزال ورنالاسقان.
جاقىن ۋاقىتتا سكالودروم اشۋ جوسپارلانىپ وتىر. ەسكە سالا كەتەيىك, سوڭعى 8 جىلدا ەۇۋ كورپۋسىنا قاراستى وقۋ-زەرتحانالىق عيمارات, ستارتاپ ايماعى, 2 ستۋدەنتتەر ءۇيى, وقىتۋشىلار قۇرامى مەن قىزمەتكەرلەر ءۇشىن 2 تۇرعىن ءۇي سالىندى.
