كوللاجدى جاساعان امانگەلدى قياس, "EQ"
سپيكەردىڭ ايتۋىنشا, سوڭعى 5 جىلدا, ناقتىراق ايتقاندا, 2016-2020 جىلدار ارالىعىندا وندىرىستە زارداپ شەككەندەردىڭ سانى 10,7%-عا, 1 683-تەن 1 500 ادامعا دەيىن ازايدى. ونىڭ ىشىندە قايتىس بولعاندار سانى 16,2%-عا تومەندەدى. ستاتيستيكا جونىندەگى ۋاكىلەتتى ورگانداردىڭ دەرەگى بويىنشا, 2020 جىلى زەرتتەلگەن كاسىپورىنداردىڭ 1,6 ملن جۇمىسشىسىنىڭ 367 مىڭى نەمەسە ءاربىر ءتورتىنشىسى زياندى جانە قاۋىپتى ەڭبەك جاعدايىندا جۇمىس ىستەگەن. 2019 جىلى بۇل كورسەتكىش 370 مىڭ ادامدى قۇراعان.
– زياندى جانە قاۋىپتى ەڭبەك جاعدايىندا جۇمىس ىستەيتىن جۇمىسشىلاردىڭ كوپشىلىگى قاراعاندى, پاۆلودار, شىعىس قازاقستان جانە ماڭعىستاۋ وبلىستارىندا بايقالعان. جوعارى شۋ جانە ءدىرىل جاعدايىندا شامامەن ءاربىر ەكىنشى, جۇمىس اينالاسىنداعى اۋانىڭ گازدانۋى مەن شاڭدانۋى جاعدايىندا ءاربىر ءۇشىنشى ادام جۇمىس ىستەگەن. 94 مىڭ ادام اۋىر دەنە ەڭبەگىمەن شۇعىلدانعان. جۇمىسشىلاردىڭ قولايسىز ەڭبەك جاعدايلارى ەكونوميكالىق شىعىندارعا الىپ كەلەتىنى بارشامىزعا ءمالىم. بىلتىر ەلىمىزدە 672 مىڭ جۇمىسشى زياندى ەڭبەك جاعدايىندا جۇمىس ىستەگەنى ءۇشىن 141 ملن تەڭگە سوماسىندا ءتۇرلى وتەماقى الدى. بۇل كورسەتكىش 2010 جىلمەن سالىستىرعاندا 10%-عا جوعارى, – دەدى ت.وسپانقۇلوۆ.
سونداي-اق باس مەملەكەتتىك ەڭبەك ينسپەكتورى 2020 جىلى رەسپۋبليكا بويىنشا كاسىپورىنداردا ورىن العان قايعىلى وقيعالاردان 1 503 ادام زارداپ شەككەنىن اتاپ ءوتتى. قازا تاپقانداردىڭ سانى 15,5%-عا ارتىپ, 208 ادامعا جەتتى. 2019 جىلى 180 ادام قازا تاپقان ەدى. قاراعاندى, شىعىس قازاقستان جانە قوستاناي, پاۆلودار وبلىستارىنداعى تاۋ-كەن مەتاللۋرگيالىق كەشەن كاسىپورىندارىندا جاراقاتتانۋ دەڭگەيى جوعارى بولىپ وتىر. وتكەن جىلى بۇل سالادا 304, ال قۇرىلىس سالاسىندا 175 ادام جاراقاتتانعان. وسى جىلدىڭ 4 ايىندا عانا ەلىمىزدىڭ كاسىپورىندارىندا 462 ادام زارداپ شەگىپ, ونىڭ 59-ى قازا تاپتى. بۇل 2020 جىلدىڭ 4 ايىمەن سالىستىرعاندا 11%-عا جوعارى.
2020 جىلى مەملەكەتتىك ەڭبەك ينسپەكتورلارى 4 439 تەكسەرۋ جۇرگىزدى. ناتيجەسىندە, 7 260 بۇزۋشىلىق انىقتالدى. ونىڭ ىشىندە ەڭبەك قاتىناستارى سالاسىندا – 5 001, ەڭبەك قاۋىپسىزدىگى جانە ەڭبەكتى قورعاۋ بويىنشا – 2 096, حالىقتى جۇمىسپەن قامتۋ بويىنشا – 163. ەڭبەكتى قورعاۋعا بايلانىستى زاڭنامانىڭ نەگىزگى بۇزۋشىلىقتارى جۇمىسكەرلەردى قاۋىپسىز ەڭبەك جاعدايلارىمەن قامتاماسىز ەتپەۋدەن, قاۋىپسىز ەڭبەك تاسىلدەرىنە ۇيرەتپەۋدەن, جەكە جانە ۇجىمدىق قورعانۋ قۇرالدارىمەن, ارنايى كيىممەن جانە ارنايى اياقكيىممەن قامتاماسىز ەتپەۋدەن, ەڭبەكتى قورعاۋ جونىندەگى قىزمەتتىڭ نەمەسە جاۋاپتى ادامنىڭ بولماۋىنان كورىندى. تەكسەرۋلەردىڭ قورىتىندىسى بويىنشا جۇمىس بەرۋشىلەرگە 2 614 ۇيعارىم بەرىلىپ, 182,2 ملن تەڭگە سوماسىنا 1 090 ايىپپۇل سالىندى.
– جۇمىس ورىندارىنداعى ەڭبەك جاعدايلارىنىڭ ناقتى كۇيىن جالپى باعالاۋ جانە اتتەستاتتاۋ ناتيجەلەرى بويىنشا ەڭبەكتى قورعاۋ جونىندەگى ءىس-شارالار كەشەنىن قولدانۋ ماقساتىندا 2020 جىلى 3 397 وندىرىستىك نىسان اتتەستاتتاۋدان ءوتتى. انىقتالعان بۇزۋشىلىقتاردى جويعانعا دەيىن مەملەكەتتىك ەڭبەك ينسپەكتورلارى 207 لاۋازىمدى ادامدى اتقارىپ وتىرعان قىزمەتتەرىنەن بوساتتى. مەملەكەتتىك ەڭبەك ينسپەكتورلارى ەڭبەكتى قورعاۋ تالاپتارىن بۇزۋ فاكتىلەرى بويىنشا قۇقىق قورعاۋ ورگاندارىنا 1 234 ماتەريال جىبەردى, بۇل بويىنشا 173 قىلمىستىق ءىس قوزعالدى, – دەدى سپيكەر.
سونىمەن قاتار ت.وسپانقۇلوۆ 2030 جىلعا دەيىنگى قاۋىپسىز ەڭبەك تۇجىرىمداماسىنىڭ جوباسى ازىرلەنىپ جاتقانىن حابارلادى. بۇل ەڭبەكتى قورعاۋدى باسقارۋدىڭ تاۋەكەلگە باعىتتالعان ۇلتتىق جۇيەسىن قۇرۋعا الەۋمەتتىك ارىپتەستىك تاراپتاردىڭ بەلسەندى قاتىسۋىن قامتاماسىز ەتەتىن جۇيەلى ءىس-شارالاردى ايقىندايدى. نورما شىعارۋ قىزمەتى اياسىنداعى ءتيىستى جۇمىستاردى 2021 جىلى اياقتاۋ جوسپارلانىپ وتىر. وسى جىلدىڭ 12 ناۋرىزىندا الەۋمەتتىك ارىپتەستىك پەن الەۋمەتتىك جانە ەڭبەك قاتىناستارىن رەتتەۋ جونىندەگى رەسپۋبليكالىق ۇشجاقتى كوميسسيا وتىرىسىندا 2021-2023 جىلدارعا ارنالعان باس كەلىسىم جاسالدى. قۇجاتتىڭ نەگىزگى ماقساتى – لايىقتى ەڭبەك قاعيداتتارىن ىلگەرىلەتۋ. بۇل – تولىق جۇمىسپەن قامتىلعان كەزدە جاقسى وندىرىستىك, الەۋمەتتىك-ەڭبەك ءارى قاۋىپسىز جاعدايلاردا لايىقتى جالاقى تولەنەتىن, ءاربىر جۇمىسشى قاناعاتتاناتىن, ءوزىنىڭ قابىلەتى مەن شەبەرلىگىن كورسەتۋگە مۇمكىندىك بەرەتىن جوعارى ءتيىمدى جۇمىس.
