كەزدەسۋگە رەسپۋبليكانىڭ بارلىق اۋدانى مەن قالاسىنان دەبات ۇيلەستىرۋشىلەرى, ءبىلىم باسقارمالارىنىڭ باسشىلارى, جوعارى وقۋ ورىندارىنىڭ پرورەكتورلارى, مەكتەپ جانە ستۋدەنتتىك دەبات كلۋبتارىنىڭ بەلسەندى دەباتەرلەرى شاقىرىلدى.
ءبىلىم جانە عىلىم مينيسترلىگى قازاقستاندا دەبات قوزعالىسىن دامىتۋ تۇجىرىمداماسىن جانە وقۋشىلار, ستۋدەنتتەر اراسىندا دەبات تۋرنيرلەرىن وتكىزۋ قاعيدالارىن ازىرلەدى. جاتتىقتىرۋشىلاردى دايارلاۋ بويىنشا جۇمىس جۇرگىزىلىپ, دەبات كلۋبتارى اشىلىپ جاتىر.
«دەباتتى ويىن رەتىندە ەمەس, ءبىلىم بەرۋ تەحنولوگياسى دەپ قابىلداۋىمىز قاجەت. سوندىقتان بۇل قوزعالىستى بەلسەندى تۇردە دامىتىپ جاتىرمىز. ءبىز قازاقستاندا دەبات قوزعالىسىن دامىتۋ تۇجىرىمداماسىن جانە وقۋشىلار مەن ستۋدەنتتەر اراسىندا دەبات تۋرنيرلەرىن وتكىزۋ قاعيدالارىن ازىرلەدىك. مينيسترلىكتىڭ «وقۋعا قۇشتار مەكتەپ», «مەكتەپتەگى جانە ستۋدەنتتىك ءوزىن-ءوزى باسقارۋ» سياقتى جوبالارىمەن بىرگە «دەباتتار» جوباسىنا دا بارلىق ءبىلىم بەرۋ ۇيىمىندا باسا ءمان بەرىلۋى ءتيىس», دەدى مينيستر اسحات ايماعامبەتوۆ
سونداي-اق بعم باسشىسى ستۋدەنتتىك جىلدارى ءوزى دە دەبات ويىندارىنا بەلسەندى قاتىسقانىن تىلگە تيەك ەتىپ, بالالارمەن ءوز تاجىريبەسىمەن ءبولىستى.
«دەبات ادام بويىندا ماڭىزدى داعدىلاردى قالىپتاستىرادى. ماسەلەن, بۇل تاجىريبە ماعان كوپ پايداسىن تيگىزدى جانە قازىر جۇمىس بارىسىندا دا كومەكتەسەدى. سوندىقتان بالالاردىڭ سىني ويلاۋ قابىلەتىن دامىتۋ, كوماندادا جۇمىس ىستەۋگە باۋلۋ, سۇراقتارعا جاۋاپ بەرۋ, ءوز پىكىرىڭدى دالەلدەۋ, بالالاردىڭ ءوز ويلارىن دۇرىس تۇجىرىمداۋى ءۇشىن بىزگە وسى ءبىلىم بەرۋ تەحنولوگياسىن بەلسەندى قولدانۋ قاجەت», دەپ اتاپ ءوتتى مينيستر.
سونىمەن قاتار اسحات ايماعامبەتوۆ دەبات قوزعالىسىنىڭ دامۋى قاعاز جۇزىندە بولماۋى ءتيىس ەكەنىن اتاپ ءوتتى. وسى رەتتە بالانىڭ قىزىعۋشىلىعىن تۋعىزىپ, وعان جەكە قاسيەتتەرىن دامىتۋعا كومەكتەسۋ ماڭىزدى. ايتا كەتكەن ءجون, دەبات تۋرنيرلەرىنىڭ جەڭىمپازدارى جوعارى وقۋ ورىندارى رەكتورلارىنىڭ گرانتتارىن الا الادى.
