قازاقستاننىڭ ەڭبەك سىڭىرگەن قايراتكەرى, جازۋشى, كينودراماتۋرگ سماعۇل ەلۋباەۆتىڭ حح عاسىردىڭ 30-جىلدارىنداعى اشارشىلىق تۋرالى ايگىلى «اق بوز ءۇي» رومانى بويىنشا سەنەك اۋىلىندا دراما جانرىنداعى تاريحي فيلم تۇسىرىلەدى.
فيلمدە كۇللى قازاق حالقى كورگەن ناۋبەتتى ءبىر اۋلەت باسىنان كەشىرگەن وقيعا ارقىلى كورسەتۋدى ماقسات ەتىپ وتىر.
«ۇزدىك شەتەلدىك دراما» نوميناتسياسىن العان «اڭشى بالا» جانە «وازيس», «بالا عاشىق» كوركەم فيلمدەرىن ءتۇسىرۋشى رەجيسسەر بەگارىس ەلۋباەۆتىڭ بۇل فيلمىندە باستى ءرولدى س.سەيفۋللين اتىنداعى قازاق دراما تەاترىنىڭ ءارتىسى قايرات كەمالوۆ پاحرەددين بي رەتىندە سومدايدى.
«پاراسات» وردەنىنىڭ يەگەرى سماعۇل ەلۋباەۆ ءتۇسىرىلىم توبىمەن بىرگە سەنەك اۋىلىنا كەلىپ, فيلم تۇسىرەتىن ورىنمەن تانىستى.
قازاق ەلىنىڭ اشارشىلىقتان قىرىلعان اۋىر كەزەڭى سومدالاتىن تاريحي ءفيلمنىڭ ءتۇسىرىلىمى الداعى اپتا باستالىپ, 2022 جىلدىڭ ناۋرىز ايىندا كورەرمەنگە جول تارتپاق.
