مينيستر قوناقتى قازاقستاندىق پوليتسيانى رەفورمالاۋ بارىسىمەن, جۇمىستىڭ سەرۆيستىك مودەلىن ەنگىزۋ, حالىقپەن كەرى بايلانىس ورناتۋ, زاماناۋي قاۋىپسىزدىك جۇيەلەرى جانە باسقا دا جاڭالىقتارىمەن تانىستىردى.
ۆەدومستۆو باسشىسى ەكى ەلدىڭ ىشكى ىستەر مينيسترلىكتەرىنىڭ ءوزارا قارىم-قاتىناسىنىڭ, سونىڭ ىشىندە قىلمىستىق ىستەر بويىنشا قۇقىقتىق كومەك كورسەتۋ, ىزدەستىرۋ جۇمىستارىن جۇرگىزۋ, كوشى-قون باقىلاۋى, سونداي-اق كادرلار دايارلاۋ بويىنشا ءوزارا قارىم-قاتىناسىنىڭ جوعارى دەڭگەيىن اتاپ ءوتتى.
– ءبىزدىڭ ۆەدومستۆولار اراسىنداعى ىنتىماقتاستىق قوعام مەن ازاماتتاردىڭ قاۋىپسىزدىگىن قامتاماسىز ەتۋ بويىنشا قويىلعان مىندەتتەردى شەشۋگە قولداۋ كورسەتۋ جانە ءوزارا كومەك كورسەتۋگە نەگىزدەلگەن. بۇگىن بىزدە ءوزارا ءىس-قيمىل اياسىن كەڭەيتۋگە مۇمكىندىك بار, – دەپ اتاپ ءوتتى ەرلان تۇرعىمباەۆ.
ءوز كەزەگىندە نيكولاي كارپەنكوۆ العىسىن ءبىلدىرىپ, حالىقارالىق قىلمىسقا قارسى ءىس-قيمىلدا بىرلەسكەن كۇش-جىگەردىڭ تيىمدىلىگىن ارتتىرۋ ماقساتىندا تىكەلەي بايلانىستاردىڭ ماڭىزدىلىعىن اتاپ ءوتتى. كەزدەسۋ قورىتىندىسى بويىنشا قۇقىق قورعاۋ سالاسىنداعى ىنتىماقتاستىقتى ودان ءارى دامىتۋ جوسپارلارى ايقىندالدى.
