ەلوردا • 21 مامىر، 2021

التاي كولگىنوۆ: «جاسىل بەلدەۋ» اۋماعىندا 10 ميلليونداي اعاش وسەدى

296 رەت كورسەتىلدى

باس شاھاردىڭ اكىمى التاي كولگىنوۆ Instagram پاراقشاسىندا «جاسىل بەلدەۋ» اۋماعىندا 9،6 ميلليوننان استام اعاش پەن 1،8 ميلليونعا جۋىق بۇتا وسەتىنىن ءمالىم ەتتى، دەپ حابارلايدى Egemen.kz.

«ەلوردانىڭ «جاسىل بەلدەۋى» – قالا قالقانى. قالانىڭ كليماتى تىم كونتينەنتتىك ەكەنىن ەسكەرە وتىرىپ، «جاسىل بەلدەۋ» ەكولوگيانى ايتارلىقتاي جاقسارتىپ قانا قويماي، كليماتتىق جاعدايلاردى جۇمسارتۋعا مۇمكىندىك بەرەدى.

ءبىزدىڭ مىندەتىمىز – قالانىڭ «وكپەسى» بولىپ تابىلاتىن «جاسىل بەلدەۋدى» قورەكتەندىرۋ. تەك بيىل وسى اۋماقتا 900 مىڭعا جۋىق كوشەت وتىرعىزامىز. ولاردىڭ جارتىسى قازىردىڭ وزىندە وتىرعىزىلدى. جالپى «جاسىل بەلدەۋ» اۋماعىندا 9،6 ميلليوننان استام اعاش پەن 1،8 ميلليونعا جۋىق بۇتالار وسەدى.

 1

سونىمەن قاتار فاۋنانى دامىتۋمەن دە اينالىسامىز. قۇستاردىڭ، سونىڭ ىشىندە قىرعاۋىل سانىن كوبەيتۋ ءۇشىن ءفازاناريدى كەڭەيتۋ جانە قايتا قۇرۋ جۇمىستارى جۇرگىزىلدى. بۇل بىزگە قىرعاۋىل سانىن جىلىنا 2 مىڭ قۇسقا دەيىن ارتتىرۋعا مۇمكىندىك بەرەدى. مىسالى، قىرعاۋىلداردى ءوسىرۋ – زيانكەستەردەن (جاندىكتەردەن) قورعاۋدىڭ بيولوگيالىق ءادىسى، سونىمەن قاتار قىرعاۋىلداردىڭ تىرشىلىك ەتۋ ورتاسىنىڭ كەڭەيۋىنە ىقپال ەتەدى. سونىمەن قاتار «جاسىل بەلدەۋ» اۋماعىندا قويان، تۇلكى، قارساق، كەكىلىك جانە ت. ب. تىرشىلىك ەتەدى.

سونداي-اق بەلدەۋ اۋماعىندا ات جولىن سالۋ جۇمىستارىن جۇرگىزەمىز. ۋاقىتتى بەلسەندى وتكىزۋ ءۇشىن سكەيتبوردينگكە ارنالعان الاڭداردى جايلاستىرامىز، تەننيس، فۋتبول الاڭدارىن، بالالار ويىن ايماقتارىن جانە ت. ب. ورناتامىز، سونداي-اق جاياۋ سەرۋەندەۋگە جانە كروسس-كانتري ساباقتارىنا ارنالعان جولداردى سالامىز. سونىمەن قاتار قالا تۇرعىندارىنا ۇناعان ۆەلوجول جەلىسىن كەڭەيتۋدەمىز.

1 

«جاسىل بەلدەۋ» ماڭىندا قولدانىستاعى يپپودروم بازاسىندا ەرەكشە قاجەتتىلىگى بار بالالاردى وڭالتۋعا ارنالعان ات-سپورت كەشەنىنىڭ قۇرىلىسىن جۇرگىزىپ جاتىرمىز. يپپودروم بازاسىن 3 باعىت بويىنشا دامىتامىز: يپپوتەراپيا، ۇلتتىق جانە كلاسسيكالىق سپورت تۇرلەرىن وتكىزۋ جانە دايىنداۋ، سونداي-اق تۋريستىك مارشرۋتتار – بۇل جەردە اتپەن سەرۋەندەۋ دامىتىلادى.

وسىلايشا «جاسىل بەلدەۋ» قالا قالقانىنان باسقا، قالا تۇرعىندارى مەن قوناقتارى ءۇشىن تارتىلىس ورنى بولىپ تابىلادى، ول تازا اۋادا ۋاقىت وتكىزۋ ءۇشىن بارىنشا قولايلى جانە تارتىمدى»، دەپ جازدى ەلوردا اكىمى.

سوڭعى جاڭالىقتار

ۇقساس جاڭالىقتار