جالپى, اتالعان مەرەكە 1977 جىلى حالىقارالىق مۋزەيلەر كەڭەسىنىڭ باس كونفەرەنتسياسىندا بەكىتىلگەن ەكەن. ال «مۋزەي ءتۇنى» شاراسى 1997 جىلى تۇڭعىش رەت گەرمانيانىڭ بەرلين قالاسىندا وتكەن. ۋاقىت وتە كەلە بۇل يگى ءداستۇر ەلىمىزدە دە جالعاستى. قازىرگى كەزدەگى كارانتين تالاپتارىنا بايلانىستى اۋليەاتا جەرىندەگى بۇل شارا بيىل ونلاين فورماتتا ءوتتى. تارازدىق جۇرتشىلىق مۋزەي ءتۇنىن ءتۇرلى الەۋمەتتىك جەلىلەر ارقىلى تاماشالادى. ءداستۇرلى «مۋزەيدەگى ءتۇن» اكتسياسى وبلىس ورتالىعىنداعى «تورتكۇل» كەرۋەن سارايىنان باستاۋ الىپ, وبلىستىق تاريحي-ولكەتانۋ مۋزەيىندە ءوربىدى. اۋەلى اشىق اسپان استىندا «كونە تارازدىڭ قۇندى جادىگەرلەرى» اتتى ارحەولوگيالىق, «كيەلى قازاقستان» اتتى كوللاج تۇرىندەگى جانە «تاراز – تاريحتىڭ التىن دىڭگەگى» اتتى سۋرەتشىلەر مەن قولونەر شەبەرلەرىنىڭ كورمەلەرى قويىلدى. سونداي-اق كوپشىلىك نازارىنا «شىعىس بازارى» كورمەسى, ءتۇرلى شوۋ-دەفيلە جانە اباي قۇنانباي ۇلى مەن جامبىل جاباەۆتىڭ تۋىندىلارىن قامتىعان «تاقىرىپتىق كىتاپ» كورمەسى, «تاريحي داۋىرلەردىڭ جاندانعان كەيىپكەرلەرى» سياقتى شارالار ۇسىنىلدى. سونىمەن قاتار اتالعان مۋزەيدىڭ ەكسپوزيتسيالىق زالىندا تاريحي «التىن ادام» مەن «توميريس» بەينەسى سومدالىپ, ۇلت تاريحىنان سىر شەرتەتىن «قازاق حاندىعى» جانە «ايشا ءبيبى مەن قاراحان» تەاترلاندىرىلعان قويىلىمى كورسەتىلدى. ءىس-شارا بارىسىندا شاعىن كونتسەرتتىك باعدارلاما مەن مۋزەي تۋرالى تۇسىرىلگەن ارنايى بەينەسيۋجەت تە قامتىلدى. بۇدان كەيىن وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى سارا ماديەۆا, وبلىستىق تاريحي-ولكەتانۋ مۋزەيىنىڭ ديرەكتورى سەيىتجان ءىلياس بىرقاتار مادەنيەت سالاسىنىڭ قىزمەتكەرلەرىن العىس حاتپەن ماراپاتتادى. ال شارا سوڭىندا «قاراقات» مەكتەپ-ستۋدياسىنىڭ جەتىگەنشىلەرى «ەلىك-اي» حالىق ءانىن ورىندادى.
جامبىل وبلىسى
