2020 جىلعى ساۋىردە سادۋاقاسوۆ دەنساۋلىق ساقتاۋ مينيسترلىگىنەن قازاقستان وڭىرلەرىنە دارىگەرلەردىڭ جاپپاي ۆيرۋس جۇقتىرۋ سەبەپتەرىن زەرتتەۋگە جىبەرىلگەن. ول سوتتا الماتى ورتالىق كلينيكالىق اۋرۋحاناسىندا كورگەندەرىن ايتتى.
«مەنىڭ تۇجىرىمدارىمدا باستى سەبەپتەردىڭ ءبىرى جەرگىلىكتى بيلىك پەن اۋماقتىق وكىلەتتىك ارەكەتتەرىنىڭ سايكەس كەلمەۋى. ەش كەلىسىمسىز جۇقپالى اۋرۋلار اۋرۋحاناسىن ورنالاستىردى. وندا ولاردى وقشاۋلاماي تەك ءبولىپ قويعانى انىقتالدى. بۇل ءبىرىنشى جانە باستى سەبەپتەردىڭ ءبىرى.
ەكىنشىسى, اۋرۋحانانىڭ ءوزى. مەن بارلىق بولىمدەردى كوردىم. ولار مۇنداي رەجيمگە دايىن ەمەس ەدى. ول كەزەڭدە ءۇش-ءتورت بلوك بولدى, بەس قاباتتا ءۇش سانيتايزەر ورناتىلعان. ارينە, دارىگەرلەر جەكە قورعانىس قۇرالدارىندا ءجۇردى, بىراق ونى شەشۋ جانە كيۋ, جويۋ ەرەجەلەرى بۇزىلدى», دەدى سادۋاقاسوۆ سوتقا.
ايتا كەتەيىك, پروكۋرورلار ءشارىپتى دارىگەرلەردىڭ جاپپاي ۆيرۋس جۇقتىرۋىنا كىنالى دەپ سانايدى. ويتكەنى ول قورعانىس قۇرالدارىمەن ۋاقتىلى قامتاماسىز ەتپەگەن. بۇل ايىپتاۋ بويىنشا ول ەكى مىڭ مەديتسينا قىزمەتكەرىنىڭ كوروناۆيرۋس جۇقتىرۋىنا سەبەپ بولعان.
سول كەزەڭدە دارىگەرلەردىڭ ستاندارتتى قورعانىس قۇرالدارىنا ماسكا, كوزىلدىرىك, قولعاپ, كيىم, اياق كيىم كىرگەن. سادۋاقاسوۆتىڭ ايتۋىنشا, دارىگەرلەر ۆيرۋستىڭ تەرى ارقىلى بەرىلەتىنىن بىلمەگەن.
«مەن ءوز تاجىريبەمدە ينفەكتسيا نەگىزىنەن شىرىشتى قاباتتار ارقىلى وتەتىنىن ءتۇسىندىم, ماسكا ءبىرىنشى كەزەكتە قورعايدى جانە كوزىلدىرىك. ەگەر ادام كوزىن ۇستاسا, ول قازىردىڭ وزىندە جۇقتىرۋى مۇمكىن. ۆيرۋستىڭ ءوزى جەلدەتۋ جۇيەسى ارقىلى جۇرەتىن قىزىلشا سياقتى ۇشپا ەمەس. بىراق ەگەر اراقاشىقتىقتى ساقتاماساڭىز وندا جۇقتىرۋ ىقتيمالدىعى جوعارى», دەپ ءتۇسىندىردى ول.
سونداي-اق سادۋاقاسوۆ اۋرۋحاناداعى باقىلاۋ كامەرالارىنداعى بەينەجازبالاردى قايتا قاراپ شىققانىن ايتتى.
ء«بىز سوت تەرگەۋىندە ءشارىپتىڭ ايىپتاۋى بويىنشا قورعانىس قۇرالدارىناڭ جەتىسپەۋشىلىگى ەكى مىڭ دارىگەردىڭ جاپپاي ۆيرۋس جۇقتىرۋىنا اكەلدى دەپ مالىمدەمە جاساعاندىقتان, ونى انىقتاۋىمىز كەرەك. ول ءۇشىن ەپيدەميولوگ مامان رەتىندە ءسىزدىڭ پىكىرىڭىز ماڭىزدى», دەدى سۋديا قانات دۇيسەمبيەۆ.
«قۇرمەتتى سوت, بۇگىندە مەديتسينا قىزمەتكەرلەرى ينفەكتسيا جۇقتىرىپ جاتىر. ارينە, جاپپاي ەمەس, بىراق نۇر-سۇلتان قالاسىندا ينفەكتسيانىڭ دەڭگەيى وتە جوعارى. 50 پايىزدان اسا قىزمەتكەر ينفەكتسيانى جۇمىستا جۇقتىرماعانىن ايتادى. بىراق قورعانىس قۇرالى جەتكىلىكتى بولعان جاعدايدا دا جۇقتىرۋ مۇمكىندىگى بار», دەپ جاۋاپ بەردى نۇرقان سادۋاقاسوۆ.
ايتا كەتەيىك, بەرىك ءشارىپ مەديتسينا قىزمەتكەرلەرىنىڭ 2020 جىلدىڭ ءساۋىر-مامىرىندا جاپپاي كوروناۆيرۋس جۇقتىرۋىنا كىنالى جانە اتىس قارۋىن زاڭسىز ساقتادى دەپ ايىپتالعان ەدى.
