امانگەلدى قياس «Egemen Qazaqstan»
قىرىق جىلعا تاياۋ جيعان-تەرگەندى قايتا ءبىر قاراپ, 3 جىلعى تىنىمسىز ەڭبەكتىڭ ناتيجەسىندە دۇنيەگە كەلگەن كىتاپ بۇل. قازاق سپورتىنىڭ كەيىنگى 75 جىل تاريحىن قامتيتىن وسى ءبىر قۇندى دۇنيە, ۇلى دالانىڭ داڭقىن اسقاقتاتقان دارابوزداردى دايارلاپ, جەڭىسكە جەتۋىنە تىكەلەي دانەكەر بولعان باپكەرلەردى وقىرماندارىنا جەكە-جەكە تانىستىرۋعا بەل بۋعانداي. ەل ەرەكشە ىقىلاس تانىتقان بۇل ەڭبەك سوڭعى قوس عاسىرداعى تاڭداۋلى 120-دان اسا باپكەر مەن ولاردىڭ 500-دەن استام شاكىرتى تۋرالى دەرەكتەر مەن ماتەريالداردىڭ باسىن قوسادى.
بۇتىندەي ءبىر عىلىمي-زەرتتەۋ ينستيتۋتىنىڭ بەلىن قايىستىرار مەحناتى مول شارۋاسىن جالعىز ءوزى مويىنىنا العان قىدىربەك اعامىز ەڭبەكقورلىق پەن تاباندىلىقتىڭ, ىجداھاتتىلىق پەن ۇقىپتىلىقتىڭ ارقاسىندا ونى ويداعىداي اتقارىپ شىعىپ, وقىرمانىنا ولجا سالدى.
پارلامەنت ءماجىلىسىنىڭ دەپۋتاتى دارحان مىڭباي: «بۇل – باپكەرلەرگە قويىلعان ەسكەرتكىش» دەپ لايىقتى باعاسىن دا بەرگەن ەدى. «دۇركىرەگەن, دۇبىرلەگەن دودالار – كوز بەن كوڭىلدى بىردەي اربايتىن سپورت دۇنيەسىنىڭ بەرگى جاعى عانا. ال ونىڭ ار جاعىندا مىڭداعان ساڭلاقتاردى وسى الامانعا جانىن سالا باپتاپ, قىلىشتاي قايراپ اكەلەتىن جۇزدەگەن باپكەرلەردىڭ جانكەشتى ماڭداي تەرى, ىزدەنىسى, سۇراپىل تىرلىگى جاتىر», دەپ جازادى ول كىسى ءوز العىسوزىندە.
قازاق باپكەرلەرىنە ارنالعان كىتاپ جارىققا شىققانعا دەيىن قىدىربەك اعامىزدىڭ «قازاق بالۋاندارى», «قازاق بوكسشىلارى», قوس تومدىق «قازاق وليمپياداشىلارى» دەرەكتى جيناقتارى, سونىمەن قاتار «داۋلەت», «سۇرمەرگەن», «بەكزات», «بەرىكقازى», «تۇرلىقان قاسەن ۇلى» كىتاپتارى دا ءوز وقىرماندارىن تاۋىپ, كوپشىلىكتەن ءوز باعاسىن الىپ ۇلگەرگەن ەدى.
ال جولى دا, ءجونى دە بولەك «قازاقتىڭ 72 باپكەرى» كىتابى سپورت تاريحىنداعى بەلدى جاتتىقتىرۋشىلار تۋرالى جازىلعان تۇڭعىش تولىمدى كىتاپ دەپ باعالانۋدا.
وسى ورايدا كىتاپ اۆتورى قىدىربەك رىسبەك اعامىز بىلاي دەپ وي وربىتەدى: «بۇل كىتاپتارعا شىققان ادامداردىڭ بارىمەن جاقسى ارالاستىم. تەك ەكەۋىمەن عانا سويلەسە المادىم. ونىڭ بىرەۋى – 1969 جىلى قايتىس بولعان وكتيابر جارىلعاپوۆ, ەكىنشىسى – 1996 جىلى قايتقان كەڭەس ومار ۇلى. كىتاپقا ءار كەيىپكەردىڭ سۋرەتىن ەرتەڭ ءبىزدىڭ ۇرپاعىمىز 50-100 جىلدان كەيىن ماقتانىپ ايتىپ وتىراتىنداي ەتىپ ادەيى تۇسىرتكىزدىم. ۇلت تاريحىن ۋاقىتىندا جيناقتاپ, تاسقا باسىپ وتىرماساق, ەرتەڭ كوپ نارسە كومەسكى تارتىپ, تالاي تۇلعالارىمىز ۇمىت بولارى ءسوزسىز».
راسىندا دا, ۇلتتىڭ ۇپايىن تۇگەندەپ جۇرگەن ۇستاز-باپكەرلەر ۇمىت قالماسى ءۇشىن ۇلكەن جوبا قولعا الىندى. الداعى كۇندەردە دە جالعاسىن تابادى دەپ ۇمىتتەنەمىز.
جۇلدىزدى تابۋ دا, ونى جارقىراتىپ جاعۋ دا وڭاي شارۋا ەمەس. مۇنى باپكەردىڭ باپكەرى عانا ويداعىداي اتقارا السا كەرەك-ءتى...
...ولشەۋسىز توگىلگەن ماڭداي تەردىڭ وتەۋىندەي بولعان وتە ءبىر قۇندى دۇنيە وسىلايشا ءوز وقىرمانىنا جول تارتتى. اق جولىن تىلەيىك, اعايىن!
