اتالمىش وقۋ-جاتتىعۋدىڭ تاقىرىبى – كاسپي تەڭىزىنىڭ سولتۇستىك بولىگىندەگى ەكونوميكالىق قىزمەتتىڭ وبەكتىلەرىن قورعاۋ.
قازاقستان قارۋلى كۇشتەرىنىڭ اتىنان اسكەري-تەڭىز كۇشتەرى باس قولباسشىسى باسقارماسىنىڭ جەدەل توبى, اسكەري-تەڭىز بازاسىنىڭ بولىمشەسى, «ورال» جانە «ماڭعىستاۋ» زىمىراندى-ارتيللەريالىق كورابلدەرىنىڭ, «جايىق» گيدروگرافيالىق كەمەسىنىڭ ەكيپاجدارى قاتىسادى. بۇدان وزگە, وقۋ-جاتتىعۋعا مايدان ۇشاقتارى مەن ارميا اۆياتسياسىنىڭ تىكۇشاقتارى جۇمىلدىرىلدى.
بىرلەسكەن وقۋ-جاتتىعۋدى قازاقستان اسكەري-تەڭىز كۇشتەرىنىڭ باس قولباسشىسى كونتر-ادميرال ساكەن بەكجانوۆ باسقارادى.
وقۋ-جاتتىعۋ بارىسىندا ەكى ەلدىڭ اسكەري تەڭىزشىلەرى قازاقستان مەن رەسەي سۋ ايلاعىندا ورنالاسقان كاسپي تەڭىزىنىڭ پوليگوندارىندا جاۋىنگەرلىك وقۋ-جاتتىعۋ مىندەتتەرىن ورىنداۋى ءتيىس.
اتاپ ايتقاندا, ەكونوميكالىق قىزمەت وبەكتىلەرىن كۇزەتۋ مەن قورعاۋ جونىندەگى مىندەتتەردى پىسىقتاپ, جاۋىنگەرلىك ءىس-قيمىلداردى جۇرگىزۋدىڭ جاڭا ادىستەرى مەن تاسىلدەرىن ۇيرەنەدى. كەمەلەردىڭ ەكيپاجدارى شارتتى اۋە قارسىلاسىنىڭ شابۋىلىنا تويتارىس بەرۋ جونىندەگى ءىس-شارالار كەشەنىن, اۋە جانە تەڭىز نىساندارىنا ارتيللەريالىق اتىستار جۇرگىزۋدى ورىندايدى, سونداي-اق شارتتى تۇردە اپاتقا ۇشىراعان كەمەگە كومەك كورسەتۋ جونىندەگى مىندەتتەردى پىسىقتايدى.
