قوعام • 20 مامىر، 2021

الەۋمەتتىك باسپانالار سالىنادى

23 رەت كورسەتىلدى

باستاپقى جارنا مولشەرىن وزگەرتۋ جانە كوپبالالى وتباسىلار، جەتىم بالالار مەن ەرەكشە قاجەتتىلىكتەرى بار ازاماتتارعا جەڭىلدەتىلگەن يپوتەكا بەرۋ جانە وزگە دە وزەكتى ماسەلەلەر پارتياسى جانىنداعى جۇمىسپەن قامتۋدى جانە حالىقتىڭ الەۋمەتتىك وسال توپتارىن قولداۋ جونىندەگى جاڭا رەسپۋبليكالىق قوعامدىق كەڭەستىڭ ءبىرىنشى وتىرىسىندا تالقىلاندى.

Nur Otan پارتياسىنىڭ سايلاۋالدى باعدارلاماسىن ىسكە اسىرۋ جونىندەگى جول كارتاسى اياسىندا بيىل ەلىمىزدە 17 ملن شارشى مەتر تۇرعىن ءۇي سالۋ جوسپارلانسا، ونىڭ 2،5 ميلليونى حالىقتىڭ الەۋمەتتىك وسال توپتارىنا ارنالعان. 2021 جىلدىڭ ءتورت ايىندا 3،5 ملن شارشى مەتر تۇرعىن ءۇي نەمەسە 28،9 مىڭ پاتەر پايدالانۋعا بەرىلدى. باسپاناعا مۇقتاج ادام­دار سانى كۇن سايىن وسۋدە. بۇگىندە تۇرعىن ءۇي كەزەگىندە 562 مىڭ وتباسى تۇر، ونىڭ 185 مىڭىنىڭ تابىسى وتباسىنىڭ ءبىر مۇشەسىنە شاققاندا ەڭ تومەنگى كۇنكورىس دەڭگەيىنەن تومەن.

يندۋستريا جانە ينفراقۇرى­لىمدىق دامۋ ءمينيسترىنىڭ ءبىرىنشى ورىنباسارى قايىربەك وسكەنباەۆتىڭ ايتۋىنشا، ولاردى تۇرعىن ۇيمەن جەدەل قامتاماسىز ەتۋ ءۇشىن جەكە تۇرعىن ءۇي قورىنداعى جالداۋ اقىسىنىڭ ءبىر بولىگىن نۇر-سۇلتان جانە الماتى قالالارى ءۇشىن 31 اەك، وزگە وڭىرلەر ءۇشىن 21 اەك جانە اۋىلدىق جەرلەر ءۇشىن 15 اەك مول­شەرىندە سۋبسيديالاۋ ۇسىنىلادى. سونى­مەن قاتار ۆيتسە-مينيستر از قام­تىلعان وتباسىلارعا ارنالعان باسپانا قۇرىلىسىنا جاڭا كوزقاراس تۋرالى ايتىپ بەردى.

«الەۋمەتتىك وسال وتباسىلار ءۇشىن تۇرعىن ءۇيدى پايدالانۋعا بە­رۋ كولەمى جىلىنا شامامەن 10 مىڭ پاتەردى قۇرايدى، مۇنداي جاع­داي­دا پروبلەما تەك 20 جىلعا جۋىق ۋا­قىت­تان كەيىن عانا شەشىلەدى. سون­دىق­تان قاراجاتتى اكىمدىكتەر سالا­تىن ۇيلەردىڭ قۇرىلىسىنا ەمەس، جە­كە ين­ۆەستيتسيالاردى تارتۋ ءۇشىن كوم­مەر­تسيالىق كومپانيالاردى سۋبسي­ديا­لاۋعا باعىتتادى. جىل سايىن 37 مىڭ پاتەر تاپسىرامىز جانە 5 جىل ىشىندە بارلىق از قام­تىل­عان وتباسىلاردى تۇرعىن ۇيمەن قامتا­ماسىز ەتۋگە تىرىسامىز»، دەدى ق.وسكەن­باەۆ.

تاعى ءبىر ماڭىزدى ماسەلە – ەرەكشە قاجەتتىلىكتەرى بار ادامدارعا باسپانا بەرۋ. بۇل باعىتتاعى پارمەندى تەتىكتەردىڭ ءبىرى – يپوتەكالىق نەسيە بەرۋ.

«وتباسى بانكى» باسقارما ءتورايىمى ءلاززات يبراگيموۆانىڭ ايتۋىنشا، مۇگەدەكتىگى بار 2 مىڭعا جۋىق تۇلعا مەن مۇگەدەك بالالاردى تاربيەلەپ وتىرعان وتباسىلاردىڭ بانكتە 19،6 ملرد تەڭگە سوماسىندا نەسيەلەرى بار. مۇنداي وتباسىلاردىڭ جالپى سوماسى 3،7 ملرد تەڭگەنى قۇرايتىن 10 مىڭعا جۋىق دەپوزيتى بار. «باقىتتى وتباسى» باعدارلاماسى اياسىندا مۇگەدەك بالالاردى تاربيە­لەپ وتىرعان وتباسىلارعا 13،8 ملرد تەڭگە سوماسىندا 1،3 مىڭ زايم بەرىلدى. بيىل وسى باعدارلاما بويىن­­شا حالىقتىڭ الەۋمەتتىك وسال توپ­تارى 27 مىڭنان استام ءوتىنىش جول­دادى. جارتىسىنان كوبى «تولىق ەمەس وتباسى» ساناتىنا جاتادى»، دەدى ل.يبراگيموۆا.

ءوز كەزەگىندە كەڭەس مۇشەسى يرينا سميرنوۆا سوڭعى جىلدارى كەزەكتە تۇرعانداردىڭ سانى ارتىپ، بەرىلەتىن پاتەرلەر سانى ازايىپ بارا جاتقانىن اتاپ ءوتتى. «كەزەكتە تۇرعانداردى تۇرعىن ۇيمەن قامتاماسىز ەتۋ باياۋ ءجۇرىپ جاتىر، سوندىقتان جىل وتكەن سايىن كەزەك كوبەيمەسە ازايماي تۇر. مىسالى، وتكەن جىلى كەزەك 23%-عا ۇلعايسا، ال تۇرعىن ءۇي العاندار سانى 3%-عا ازايدى. مۇنداي قارقىنمەن، كەزەكتىڭ سوڭىندا تۇرعاندار 80 جىلدان كەيىن عانا باسپانا الادى. سوندىقتان مۇگەدەكتىگى بار ادامدار ءۇشىن تۇرعىن ءۇي قورىن ۇلعايتۋ قاجەت»، دەدى ي.سميرنوۆا.

ەسكە سالا كەتەيىك، Nur Otan پارتيا­سىنىڭ سايلاۋالدى باعدارلاماسى اياسىن­دا 2025 جىلعا قاراي 1 ملن وتباسى ءۇشىن 103 ملن شارشى مەتر تۇر­عىن ءۇي بەرۋ مىندەتى تۇر. ونىڭ ىشىندە 284 مىڭ كوپبالالى جانە كەدەيلىك شەگىندەگى وتباسىلار، سونداي-اق مۇمكىندىگى شەكتەۋلى ازاماتتار مەن جەتىم بالالار بار.

وتىرىس قورىتىندىسى بويىنشا Nur Otan پارتياسى اتىنان كەڭەس مۇشەلەرى «تۇرعىن ءۇي قاتىناستارى تۋرالى» زاڭعا بىرقاتار وزگەرىس پەن تولىقتىرۋ ەنگىزۋدى ۇسىندى. ولاردىڭ پىكىرىنشە، مۇگە­دەك بالا 18 جاسقا تولعان كەزدە ونىڭ تۇرعىن ءۇي الۋ كەزەگىنىڭ ساقتا­لۋىن، الەۋمەتتىك وسال ساناتتار ءۇشىن تۇرعىن ءۇي قۇرىلىسىنىڭ كولە­مىن ۇلعايتۋدى، «نۇرلى جەر» مەملە­كەتتىك باعدارلاماسىندا كوزدەلگەن ەڭ تو­مەنگى كۇنكورىس دەڭگەيىنىڭ شە­گىن كوتەرۋدى ەسكەرگەن ءجون. بۇدان باس­قا، الەۋمەتتىك وسال وتباسىلارعا ساتىپ الۋ قۇقىعىنسىز بۇرىن جالعا بە­رىلگەن تۇرعىن ءۇيدى ولاردىڭ جەكەشەلەندىرىپ الۋىنا مۇمكىندىك بەرىلۋى كەرەك.

سوڭعى جاڭالىقتار

شەرحان مۇرتازانىڭ ءۇيى

ادەبيەت • كەشە

«جاسىل» ايماقتا ەكى ءوڭىر

كوروناۆيرۋس • كەشە

بۇگىن - انالار كۇنى

قازاقستان • كەشە

الماتىدا تەگىن ءدارى-دارمەك قاتارى ارتتى

مەديتسينا • 18 قىركۇيەك، 2021

الەمدە ەپيداحۋال قانداي؟

الەم • 18 قىركۇيەك، 2021

توكيو مارافونى 2022 جىلعا شەگەرىلدى

سپورت • 18 قىركۇيەك، 2021

الماتىدا تاۋ بوكتەرى ورتەنىپ جاتىر

ايماقتار • 18 قىركۇيەك، 2021

ۇقساس جاڭالىقتار