«بىزدە بىرىڭعاي زەينەتاقى جيناعىنان 200 مىڭ ادام اقشاسىن الدى. ولار 950 ملرد تەڭگەنى الىپ, پايداعا جاراتتى. بايقاساڭىز, الىنعان سوما 1 ترلن تەڭگەگە تاياپ قالدى. زەينەتاقىسىنان اقشا العان ادامداردىڭ ءاربىر ءۇشىنشىسى (950 ملرد تەڭگەنىڭ – 70 پايىزىن) قاراجاتتى تولىق ساتىپ الۋ ءۇشىن جۇمسادى. بۇعان دەيىن يپوتەكالاردىڭ ءوسىمى جاعىنان, مەرزىمىنەن بۇرىن قارىزدى جابۋ بويىنشا ءارتۇرلى بولجامدار ايتىلعان ەدى. ايتسە دە 55 مىڭ ادام سول اقشانى پايدالانىپ, يپوتەكانى ۋاقىتىنان بۇرىن جاپتى. ول قاجەتتىلىككە 200 ملرد تەڭگە جۇمسالدى», دەدى لاززات يبراگيموۆا ونلاين رەجيمدە VIII CFO سامميتىندە.
سونىمەن قاتار ول زەينەتاقى جيناعىن پايدالانىپ, 11 مىڭ ادام جاڭادان يپوتەكا (70 ملرد تەڭگە) العانىن تىلگە تيەك ەتتى.
«شىنىندا دا, قاڭتار, اقپان جانە ناۋرىز ايلارىندا اقپاراتتىق انوماليا جۇرگەن سەكىلدى. ۇلتتىق ستاتيستيكا بيۋروسى ءارتۇرلى سانداردى جاريالادى. وعان سەنۋدىڭ اسا قاجەتتىگى جوق. كوررەكتسيا مەنىڭشە, جىلدىڭ ەكىنشى جارتىسىندا جۇرەدى. جالپى ءبىزدىڭ بانكتە جىلىنا 300 مىڭعا تارتا كەلىسىمشارت جاسالادى. ايتسە دە زەينەتاقى جيناعىنىڭ پايداعا جاراۋىنا بايلانىستى بۇل ءوسىم 80 مىڭعا ارتتى. دەسەك تە, كەلىسىمشارتتاردىڭ بۇل دەڭگەيدە كوتەرىلۋى – باسپانا نارىعىنا اسا ءبىر توڭكەرىس اكەلە قويمايدى. جىلدىڭ ەكىنشى جارتىسىندا قالىپتى كوررەكتسيا پايدا بولادى», دەيدى ول.
