وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, اعىمداعى جاعدايعا بايلانىستى بەكىتىلگەن جوسپارعا سايكەس وبلىستاعى اۋرۋحانالاردا 2 580 ينفەكتسيالىق توسەك-ورىن قورى, ونىڭ ىشىندە 250 رەانيماتسيالىق توسەك-ورىن قورى بار. وعان قوسا 135 توسەك-ورىنعا ارنالعان كارانتيندىك ستاتسيونارلار جۇمىس ىستەيدى. قازىرگى كەزدەگى ەپيدەميالىق جاعدايعا بايلانىستى كوروناۆيرۋسپەن اۋىراتىن ناۋقاستاردى ەمدەۋ ءۇشىن قوسىمشا رەزەرۆ رەتىندە 2 180 ينفەكتسيالىق, ونىڭ ىشىندە 251 رەانيماتسيالىق توسەك-ورىن قورى اشىلادى.
«17 مامىر كۇنگى اقپارات بويىنشا 2 580 ورىندىق ينفەكتسيالىق ستاتسيونارلاردا 1 015, ونىڭ ىشىندە 250 ورىندىق رەانيماتسيادا 104 ناۋقاس ەم قابىلداۋدا. ال كارانتيندىك ستاتسيونارلارعا 30 ازامات ورنالاستىرىلعان. جەرگىلىكتى بيۋدجەت ەسەبىنەن وتكەن جىلى ەمدەۋ جانە الدىن الۋ ۇيىمدارىن مەديتسينالىق قۇرال-جابدىقتارمەن قامتاماسىز ەتۋ ماقساتىندا 2,1 ملرد تەڭگە ءبولىندى. بولىنگەن قاراجات ەسەبىنەن 1 ليتوتريپتور, 4 دانا ەكسپەرتتى كلاسستى ۋلترادىبىستى اپپارات, 1 دانا ەندوۆيدەوحيرۋرگيالىق كەشەن, 4 دانا ۆيدەوەندوستويكا, 3 دانا ەلەكتروكارديوگراف ساتىپ الىندى. سونداي-اق دەنساۋلىق ساقتاۋ مەكەمەلەرى 140 دانا فۋنكتسيونالدى توسەكتەرمەن, 100 دانا رەتسيركۋلياتور جانە 1 دانا فليۋروگراف اپپاراتتارىمەن قامتاماسىز ەتىلدى. سونىمەن قاتار بيىل مەديتسينالىق ۇيىمداردى ءتيىستى مەديتسينالىق قۇرال-جابدىقتارمەن جابدىقتاۋ ماقساتىندا 2,5 ملرد تەڭگە ءبولىندى. ناتيجەسىندە مەديتسينالىق مەكەمەلەر ۆيدەولاپروسكوپيالىق جۇيە, 5 دانا ناركوزدى تىنىس الۋ اپپاراتتارى, ترانسپورتتى ينكۋباتور, وكپەنى جاساندى جەلدەتۋ اپپاراتتارى, ەكسپەرتتى كلاستى ۋلترادىبىستىق اپپارات, ەلەكتروەنتسەفالوگرافتار جانە تاعى دا باسقا جابدىقتارمەن قامتاماسىز ەتىلەدى», دەيدى باسقارما باسشىسى.
بۇل رەتتە قاۋىپتى ىندەتپەن كۇرەس كەزىندە مەملەكەت تاراپىنان دا ءتيىستى كوڭىل ءبولىنىپ وتىرعانىن ايتا كەتۋ كەرەك. ءوڭىر تۇرعىندارىنىڭ ءومىرىن ساقتاپ قالۋ ماقساتىندا رەسپۋبليكالىق بيۋدجەت قاراجاتى ەسەبىنەن ليزينگ بويىنشا وبلىستىق جەدەل جاردەم ستانساسىنا 66 جەدەل جاردەم كولىكتەرى, سونداي-اق 53 بىرلىك وكپەنى جاساندى جەلدەتۋ اپپاراتى مەن 8 جىلجىمالى مەديتسينالىق كەشەن الىنعان. سونىمەن قاتار دەمەۋشىلىك كومەك ەسەبىنەن ايماقتاعى ەمدەۋ ۇيىمدارىنا 122 وتتەگى كونتسەنتراتورى جانە 14 وكپەنى جاساندى جەلدەتۋ اپپاراتتارى بەرىلگەن. قاۋىپتى ىندەتتىڭ الدىن الۋ ماقساتىندا وبلىستا بارلىق شارا قابىلدانۋدا. وسى ورايدا اسەت قاليەۆ بىرىڭعاي ديستريبيۋتورمەن ستاتسيونار شەڭبەرىندە وبلىستىڭ دەنساۋلىق ساقتاۋ ۇيىمدارىنا 2,8 ملرد تەڭگە كولەمىندە دارىلىك زاتتار مەن مەديتسينالىق بۇيىمدار جەتكىزىلگەنىن, ونىڭ ىشىندە 315 ملن تەڭگەگە كوروناۆيرۋس ىندەتىن ەمدەۋگە جانە ونىڭ الدىن الۋعا ارنالعان دارىلىك زاتتار مەن مەديتسينالىق ماقساتتاعى بۇيىمدار جەتكىزىلگەنىن ايتتى. سونداي-اق بۇگىندە بىرىڭعاي ديستريبيۋتورمەن امبۋلاتوريا شەڭبەرىندە وبلىستىڭ مەديتسينالىق ۇيىمدارىنا 3,1 ملرد تەڭگەگە دارىلىك زاتتار مەن بۇيىمدار الىنعان. ونىڭ ىشىندە «تىنىس الۋ جولدارى اۋرۋى» نوزولوگياسى جانە «COVID-19 كوروناۆيرۋس ينفەكتسياسى» نوزولوگياسى بويىنشا 78 ملن تەڭگەگە الىنعان دارىلىك زاتتار مەن مەديتسينالىق بۇيىمدار بار. ال ايماقتا دارىلىك زاتتاردىڭ ەكى ايلىق قورى قالىپتاسقان.
سونىمەن قاتار كوروناۆيرۋس ىندەتىنەن قورعانۋدىڭ ءتيىمدى جولى ۆاكتسينا الۋ ەكەنى بەلگىلى. بۇگىندە ەلىمىزدە تۇرعىنداردى ۆاكتسينالاۋ جۇمىستارى جۇيەلى تۇردە جۇرگىزىلۋدە. جامبىل ءوڭىرىنىڭ جۇرتشىلىعى دا بۇل ناۋقانعا بەلسەنە اتسالىسۋدا. قازىرگى كەزدە وبلىس بويىنشا 18 جاستان اسقان 582 مىڭ ادام كوروناۆيرۋس ىندەتىنە قارسى ۆاكتسينالاۋعا جاتادى دەپ جوسپارلانعان. جالپى, وبلىس بويىنشا 42 ەگۋ پۋنكتى بار بولسا, ونىڭ ىشىندە 14 پۋنكت تاراز قالاسىندا, قالعان 28 پۋنكت اۋدانداردا ورنالاسقان. 1 اقپاننان باستاپ وبلىسقا 1 مىڭ ادامعا ارنالعان 2 مىڭ دوزا QazCovid-in وتاندىق ۆاكتسيناسى, 92 مىڭ 700 دوزا سپۋتنيك-V 1 كومپونەنتى جانە 11 مىڭ دوزا Hayat-Vax ۆاكتسيناسى كەلگەن. جالپى, 93 059 تۇلعا وتاندىق QazCovid-in ۆاكتسيناسىمەن جانە سپۋتنيك-V, Hayat-Vax ۆاكتسينالارىمەن ەكپە العان. ەگۋدەن كەيىنگى اسقىنۋلار تىركەلمەگەن.
جامبىل وبلىسى
