اقتوبە وبلىسىندا جىل باستالعالى بەرى 6 ادام سۋعا باتىپ كەتتى. ونىڭ ۇشەۋى كامەلەتكە تولماعان بالا. توتەنشە جاعدايلار قىزمەتى ساقتىق شاراسىن كۇشەيتۋ ماقساتىندا بۇگىن اتتى پوليتسەيلەرمەن بىرگە باقىلاۋدى كۇشەيتتى.
«سۋعا ءتۇسۋ ماۋسىمى 1 ماۋسىم كۇنى باستالادى. قازىرگى كەزدە كۇن ىستىق. دەگەنمەن سۋدىڭ ءالى سالقىن ەكەنىن ۇمىتپاعان ءجون. تۇرعىندار تابيعات اياسىندا دەمالىپ, شومىلۋدى باستاپ كەتكەن. سۋعا تۇسەدى. ال سۋدىڭ ءبىر بولىگى جىلىنعانىمەن, وزەن تابانى سۋىق. سول كەزدە ادام دەنەسى قۇرىسىپ قالادى. ءارى ىشىمدىك ءىشىپ, سۋعا ءتۇسۋ وتە قاۋىپتى», دەدى وبلىستىق تجد باستىعىنىڭ ورىنباسارى قايرات قاسىم.
باقىلاۋدى كۇشەيتكەن اتتى پوليتسەيلەردىڭ باستى مىندەتى – ساياجاي اۋماعى مەن كوشەلەرىندە ءتارتىپتىڭ ساقتالۋىن قاداعالاۋ.
«جىل باسىنان بەرى وبلىستىڭ سۋ ايدىندارىندا 6 ادام سۋعا باتىپ كەتتى. ونىڭ 3-ءى بالا. جاعدايدى باقىلاۋ ءۇشىن اتتى پوليتسيا قىزمەتكەرلەرى جاعاجايلاردى باقىلاۋعا شىعادى. جەرگىلىكتى كولدەر مەن وزەندەردىڭ جانىندا 10-عا جۋىق پاترۋلدەۋ مارشرۋتتارى ازىرلەندى. ولاردىڭ 8-ءى اتتى پوليتسيانىڭ باقىلاۋىندا بولادى. 16 اتتى پوليتسەي جۇمىسقا جۇمىلدىرىلدى», دەدى پد جپقب باستىعى اردانا سايماعامبەتوۆ. قىزمەت اتقارۋ ۋاقىتى ساعات 15.00-دەن 22.00-گە دەيىن. ولار قارعالى جانە ەلەك وزەندەرىنىڭ جاعاسىندا ورنالاسقان جاعاجايلار مەن ساياجاي اۋماعىندا جۇرەدى.
