بارىمىزدى باعالاي بىلەيىك

“ەگەمەن قازاقستان” گازەتىنىڭ بيىلعى 27 قاڭتارداعى سانىنان “ۇيات بولدى-اۋ...” اتتى ماقالانى وقىپ ويعا قالدىم. جۋرناليست عالىم قوجابەكوۆتىڭ وسى ما­تە­ريالدا قاجىمۇقان مۇڭايت­پاس ۇلى تۋرالى كوتەرگەن ماسەلەسى وزەكتى جايدى قوزعاپ, وتكىر جازىلعان ەكەن. اۆتور ايتقانداي, ءبىز شى­نىمەن دە ءبىرتۋار تۇلعامىزدىڭ قادىرىن ءوزىنىڭ تۋعان جەرىندە ءالى بىلمەي جۇرگەن سەكىلدىمىز. ءما­سەلەن, سول قاجى­مۇقانىمىز ورىس­تىڭ پوددۋب­نىيىنان كەم بولدى ما؟! ەستىپ تە, وقىپ تا, كورىپ تە ءجۇر­مىز, رەسەيدە پوددۋبنىي دە­گە­نىڭىز ۇلتتىق باتىر رەتىندە قۇر­مەت­تەلەدى. ال بىزدە داڭق­تى چەم­پيو­نىمىزدىڭ ءدال استانانىڭ ءتۇبىن­دەگى تۋعان اۋى­لىندا شىنىمەن دە: “مىنە, ءبىزدىڭ اتاقتى بالۋانىمىز تۋعان اۋىل وسى”, دەپ كورسەتەتىن ەشتەڭە جوق-اۋ. وسى ورايدا ەسكەرتكىشىن سومداپ, مۇراجايىن مىقتاپ سالعان وڭتۇستىك قازاقستان وبلىسىنىڭ ازاماتتارىنا ريزا­شىلىق تانى­تىپ, قۇدايعا شۇكىر دەۋىمىز كەرەك. مەن قاجەكەڭ تۋعان اۋىلدىڭ تۇرعىنىمىن. ءيا, كەزىندە بۇل ەلدى مەكەن بۋدەننىي اتانعان ەدى. ول كەزدە, ارينە, تۋرالاپ ايتقاندا 1957 جىلعا دەيىن “كۇدىكتىلەر تىزىمىنە” ىلىنگەندەردىڭ ەسىمىن اتاۋدىڭ ءوزى قىلمىستاي بولاتىن. ءبىزدىڭ قاجەكەڭنىڭ ءومىربايانىنا ۇڭىلەر بولساق, ول كىسى دە سول زاماننىڭ قياناتىن كورگەندەردىڭ ءبىرى. بۇل جونىندە الدىڭعى بۋىن ازاماتتارى جاقسى بىلەدى دەپ ويلايمىن. دەگەنمەن, بۇگىنگى قاجىمۇقان اۋىلىندا جاعداي تىم جامان دەپ ايتا المايمىز. اۋىلىمىزدىڭ تۋماسى مارقۇم مۇرات كەرەيباەۆ كوزى تىرىسىندە “بالا مۇقان, بالۋان مۇقان, قاجى مۇقان” جانە قاجىمۇقان” اتتى دەرەكتى كىتاپتار شىعاردى. ول كىسى وسى اۋىلدا مۇراجاي اشامىن دەپ ءبىراز تال­پىنىپ ەدى, بىراق وعان جەتپەي كەتتى. مەكتەپتەگى دەنەشىنىقتىرۋ مۇعالىمى اسىلبەك زامزين قازاق كۇرەسى سەكتسياسىن اشىپ, قازىر مۇندا كوپتەگەن بالا جاتتىعىپ ءجۇر. ارالارىندا اۋداندىق جانە وبلىستىق جارىستاردىڭ جۇلدە­گەرلەرى دە بار. بۇرىنىراق مەكتەپ ديرەكتورى تويلىبەك شاحارباەۆ قاجىمۇقان ەسكەرتكىشىنىڭ ەسكيزى مەن سمەتاسىن دايىنداعان بولا­تىن. بىراق اۋدان اكىمدىگى: “اكىمنىڭ جۇمىسىنا ارالاس­پاڭدار”, – دەگەن سوڭ, سول ءىس تە “جابۋلى قازان جابۋلى” بولىپ قالدى. 90-شى جىلدارى “قاجى­مۇقان قورى” دا قۇرىلعان ەدى. سول قورعا اۋىل بولىپ 1 ميلليون رۋبل جيناپ وتكىزگەن بولاتىنبىز. ونىڭ قاي ىسكە جۇمسالعانى بەلگىسىز. ءجا, وتەر ءىس ءوتتى, بولار نارسە بولدى عوي. ەندى ول كىسىنىڭ قادىر-قاسيەتىن قالاي كوتەرەمىز دەگەندى ويلاۋىمىز كەرەك. وبلىس اكىم­دىكتەرىنە, سپورت سالاسىنىڭ باسشىلارىنا ۇسىنىس جاسايىق, ءسويتىپ, ەلدىگىمىزدى تانىتايىق. سوندا عانا قاجىمۇقان بار قازاقتىڭ باتىر-بالۋانى بولىپ تۇلعالانا تۇسەدى دەپ ويلايمىن. ا. ارىستانبەكوۆ, زەينەتكەر. اقمولا وبلىسى, تسەلينوگراد اۋدانى, قاجىمۇقان اۋىلى.