ءبىلىم • 18 مامىر، 2021

كوپتەگەن مەكتەپتە دارەتحانا ماسەلەسى ءالى شەشىلمەگەن

26 رەت كورسەتىلدى

الماتى، شىعىس قازاقستان، باتىس قازاقستان جانە قاراعاندى وبلىستارىنداعى 37 مەكتەپتە دارەتحانا ماسەلەسى شەشىلمەي تۇر، دەپ حابارلايدى Egemen.kz.

ءبىلىم جانە عىلىم سالاسىنداعى باقىلاۋ كوميتەتىنىڭ ءتورايىمى گۇلزات كوبەنوۆا ۇكىمەت جانىنداعى كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى ۆەدومستۆوارالىق كوميسسيانىڭ 30-شى وتىرىسىندا وسىنداي مالىمەت ايتتى. كوبەنوۆا ەڭ الدىمەن ەلدەگى ءبىلىم وشاقتارىنىڭ بەينەكامەرالارمەن جابدىقتالۋىنا توقتالدى.

«وتكەن جىلدىڭ سوڭىنا قاراي رەسپۋبليكامىزدىڭ 1602 مەكتەبىندە بىرلەسكەن بۇيرىقتىڭ تالاپتارىنا سايكەس كەلمەگەن 83 مەكتەپتە كەمشىلىك جويىلدى. دەگەنمەن، ءالى دە 1519 مەكتەپتىڭ ماسەلەسى شەشىلمەي وتىر. ونىڭ ىشىندە تۇركىستان وبلىسىندا 687 مەكتەپ، الماتى وبلىسىندا 427، الماتى قالاسىندا 205 مەكتەپتە كەمشىلىكتەر ساقتالۋدا. بۇل ستاتيستيكا وسى وڭىرلەردەگى ءبىلىم ۇيىمدارداعى بەينەكامەرالار اتالعان بۇيرىق تالاپتارىنا سايكەس كەلمەيتىنىن كورسەتەدى»، دەدى كوميتەت باسشىسى.

ونىڭ سوزىنە قاراعاندا، ەلدەگى مەكتەپتەردىڭ باسىم بولىگىندە جىلى دارەتحانالار ورناتىلعانىمەن، اۋلاداعى دارەتحانانى پايدالانۋ تىيىلماي تۇر.

«2020 جىلدىڭ باسىندا ەلىمىزدىڭ ورتا ءبىلىم بەرۋ ۇيىمدارىندا 2700 اۋلا دارەتحاناسى بولعان. 2021 جىلدىڭ باسىندا ولاردىڭ سانى 148-گە دەيىن ازايدى. 2021 جىلدىڭ ءى توقسانىندا تاعى 13 جىلى دارەتحانا ورناتىلدى. ونىڭ 12-ءسى تۇركىستان وبلىسىندا، بىرەۋى الماتى وبلىسىندا سالىندى. ءالى دە 135 مەكتەپتە اۋلا دارەتحاناسى جۇمىس ىستەپ تۇر. ولاردىڭ 98-ىندە بيىل جىلى دارەتحانا ورناتۋ جوسپارلانعان. رەسپۋبليكانىڭ 37 مەكتەبىندە جىلى دارەتحانا ورناتۋ جۇمىستارى جۇرگىزىلمەي جاتىر»، دەگەن گۇلزات كوبەنوۆا ماسەلەگە قىرىن قاراپ وتىرعان وڭىرلەردى دە اتادى.

الماتى وبلىسىنىڭ جامبىل، قاراساي، كوكسۋ، پانفيلوۆ، تالعار، ەڭبەكشى قازاق اۋداندارىنداعى 18 مەكتەپتە جىلى دارەتحانالار قاشان ورناتىلاتىنى بەلگىسىز. شىعىس قازاقستان وبلىسىنىڭ تارباعاتاي جانە التاي اۋداندارىندا، باتىس قازاقستان وبلىسىنىڭ قازتالوۆ، جاڭاقالا اۋداندارىندا، قاراعاندى وبلىسىنىڭ شەت اۋدانىندا دا وسىنداي پروبلەما بار.

«بارلىعى 2631 مەكتەپتە جىلى دارەتحانالارمەن قاتار اۋلا دارەتحانالارى دا جۇمىس ىستەپ تۇر. ولاردىڭ ىشىندە بۇگىنگى كۇنى 1381 مەكتەپتە سىرتقى دارەتحانالار تولىق جويىلدى. تاعى 396 مەكتەپتە اۋلا دارەتحاناسىن جويۋ جوسپارلانعان. دەگەنمەن، 854 مەكتەپتە بۇل ماسەلە ءالى شەشىلمەگەن. جەرگىلىكتى اتقارۋشى ورگاندارعا بۇل ماسەلەگە تاعى نازار اۋدارۋ قاجەت»، دەدى مينيسترلىك وكىلى.

ءبىلىم جانە عىلىم سالاسىنداعى باقىلاۋ كوميتەتىنىڭ ءتورايىمى بالاباقشالارادا دا جىلى دارەتحانا پروبلەماسى بار ەكەنىن ايتتى.

«تۇركىستان وبلىسىندا 4-5 جاستاعى بالالارى اۋلاداعى دارەتحاناعا باراتىن 199 ۇيىم بار ەكەن. اكىمدىك بۇل ماسەلەنى بۇگىنگە دەيىن شەشپەي وتىر»، دەدى گۇلزات كوبەنوۆا.

 

سوڭعى جاڭالىقتار

ۇقساس جاڭالىقتار