كوزى ءالسىز كورەتىندەرگە ارنالعان تاكتيلدى پليتالار كوبىنە تروتۋارلارعا, جاياۋ جۇرگىنشىلەرگە ارنالعان جول وتكەلدەرىنە, باسپالداقتارعا, تەمىر جول بەكەتتەرى پلاتفورمالارى مەن ايالدامالارعا توسەلەدى. مۇنداي توسەنىشتەردىڭ بەتىندە زاعيپ جانداردىڭ قاۋىپسىز ءجۇرىپ-تۇرۋىنا كومەكتەسەتىن ارنايى بۇدىر نۇكتەلەرى بولادى.
كاسىپكەر بيىل ءىسىن ودان ءارى دامىتىپ, قالدىقتان قۇم-پوليمەر تاقتاتاستارىن ءوندىرۋدى باستادى. جاس كاسىپكەر وسىدان ءتورت جىل بۇرىن وبلىستىق كاسىپكەرلەر پالاتاسى جانىنداعى «باستاۋ بيزنەس» كۋرسىنا جازىلعان ەدى. ونداعى مامانداردىڭ كومەگىمەن ءوز باستاماسىن ىسكە اسىرۋ ءۇشىن مەملەكەتتەن 4,7 ملن تەڭگە كولەمىندە گرانت الدى.
– اي سايىن پلاستيكالىق بوتەلكەلەردەن, تۇرمىستىق حيميا ىدىستارىنان ەكى توننا پوليمەر ۇنتاعىن شىعارامىن. تاياۋدا قۇم-پوليمەرلى پليتكالار ءوندىرىسىن اشتىم. كورىنگەن جەردە شاشىلىپ جاتقان قوقىستى جاراتا بىلسەڭ, كادەگە اسادى. پلاستيك قالدىقتارىنان تاكتيلدى تروتۋار پليتكاسىن شىعارىپ جاتىرمىن. مەنىڭ ەكى كوزىم دە ناشار كورەدى. سوندىقتان ءوزىم سياقتى زاعيپ جاندارعا ونىڭ قانشالىقتى قاجەت جانە ماڭىزدى ەكەنىن جاقسى بىلەمىن, – دەدى اندرەي زەلەۆسكي.
ازىرگە, تسەحتا ەكى ادام جۇمىس ىستەيدى. الداعى ۋاقىتتا كاسىپكەر تاعى ءبىر مۇگەدەك كىسىنى جۇمىسقا شاقىرماق. اندرەي ەندى فوسفور ارقىلى كۇندىز بويىنا جارىق جيناپ, تۇندە ساۋلە شاشاتىن توسەمتاستار شىعارۋدى كوزدەيدى.
قوستاناي وبلىسى
