قازاقستان • 18 مامىر، 2021

اۋىلدىق جەرلەردە ءومىر ءسۇرۋ دەڭگەيى ارتتىرىلۋى ءتيىس

25 رەت كورسەتىلدى

اۋىلدىق جەرلەردەگى ءومىر ءسۇرۋ دەڭگەيىن ارتتىرۋعا قاتىستى پارتيانىڭ سايلاۋالدى ۋادەلەرىن ىسكە اسىرۋدىڭ وزەكتى ماسەلەلەرى Nur Otan پارتياسى جانىنداعى وڭىرلىك دامۋ جونىندەگى رەسپۋبليكالىق قوعامدىق كەڭەستىڭ وتىرىسىندا تالقىلاندى.

كەڭەس توراعاسى، پارلامەنت ءماجىلىسىنىڭ دەپۋتاتى يۋليا كۋچينسكايانىڭ ايتۋىنشا، بۇگىنگى تاڭدا قازاقستاندىقتاردىڭ 40%-دان استامى اۋىلدىق جەردە تۇ­رادى. بۇل رەتتە جەكەلەگەن اۋىلدارداعى ءومىر ءسۇرۋ دەڭگەيى مەن ساپاسى اراسىندا ايتارلىقتاي الەۋ­مەتتىك-ەكونوميكالىق ايىر­ماشىلىق ساق­تالۋدا. ايتالىق، Nur Otan پارتياسىنىڭ قوعامدىق ساياسات ينستي­تۋتى جۇرگىزگەن الەۋ­مەتتىك زەرتتەۋ­لەردىڭ ناتي­جەلەرىنە قاراساق، ءاربىر ەكىنشى وتباسىنىڭ اي سايىن­عى تابىسى 100 مىڭ تەڭگەدەن، ءاربىر ونىن­شى وتباسىنىڭ تابىسى 42500 تەڭگەدەن اسپايدى. اۋىل وتبا­سىلارىنىڭ ورتاشا تابىسى قالا­لىقتاردان جانە رەسمي ستاتيستيكادان ايتارلىقتاي تومەن.

پارتيانىڭ 2025 جىلعا دەيىنگى سايلاۋالدى باعدارلاماسىندا 3،5 مىڭ اۋىلدى جاڭعىرتۋ مىندەتى قويىلعان. بيىل «اۋىل – ەل بەسىگى» جوباسى اياسىندا 1،3 ملن ادام تۇراتىن 480-نەن استام اۋىل­دى دامىتۋعا 105 ملرد تەڭگە جۇم­ساۋ جوسپارلانۋدا.

«بۇل كولىك، الەۋمەتتىك جانە تۇرعىن ءۇي-كوممۋنالدىق ينفرا­قۇرىلىمدى دامىتۋ ءۇشىن مىڭنان استام جوبانى ىسكە اسىرۋعا مۇم­كىندىك بەرەدى. جوبانى ودان ءارى ىسكە اسىرۋ اياسىندا 3،5 مىڭ اۋىل­داعى تۇرعىنداردىڭ ءومىر ءسۇرۋ ساپاسىن جاقسارتۋ ءۇشىن 5 جىل ىشىندە شامامەن 800 ملرد تەڭگە بولىنەدى»، دەدى وتىرىس بارىسىندا ۇلتتىق ەكونوميكا ۆيتسە-ءمينيسترى الىشەر ابدىقادىروۆ.

ءوز كەزەگىندە كەڭەس مۇشەسى، ءماجىلىس دەپۋتاتى ەرلىك تايجا-
نوۆ تىرەك جانە سەرىكتەستەر تىزى­مىنە كىر­مەيتىن اۋىلداردىڭ تاع­دىرى تۋرالى ماسەلەنى كوتەردى. ول مىسال رەتىندە وتىرىسقا قاتى­سۋ­شى­لارعا سولتۇستىك قازاقستان وب­لىسىنىڭ مايبالىق اۋىلىنا اپا­راتىن جولداردىڭ جاعدايىن كورسەتتى.

«سولتۇستىك قازاقستان وبلىسىندا جولداردىڭ جاعدايى ناشار، سۋمەن قامتاماسىز ەتىلمەگەن. ادامدار نەگە ۇيلەرىن تاستاپ كەتىپ جاتىر؟ سەبەبى جەرگىلىكتى بيلىك جاعدايدى جاقسارتۋ ءۇشىن ەشتەڭە ىستەمەيدى. وتكەن جىلى بۇل جولدى جوندەۋگە 252 ملن تەڭگە جۇمسالعانى تۋرالى ايتىلىپ ەدى، بىراق مەن وندا ەشقانداي قيىرشىق تاس تا، تسەمەنت تە كورگەن جوقپىن. بۇل جەرگىلىكتى بيلىكتىڭ سالعىرتتىعى»، دەدى ول.

پارلامەنت ءماجىلىسىنىڭ دەپۋتاتى ايگۇل قۇسپان اۋىلدىق ەلدى مەكەندەردى ىرىكتەۋ كەزىندە نە­عۇرلىم يكەمدى ءتاسىلدى قولدا­نۋدىڭ جانە مارتەبەسىنە قارا­ماستان، اۋىل­دا قولايلى جاعداي جاساۋ­دىڭ ما­ڭىزدىلىعىن اتاپ ءوتتى. بۇگىندە اۋىل تۇرعىن­دا­رى­نىڭ بارلىعى بىر­دەي تۇرعىلىقتى جەرىن اۋىستىرۋعا دايىن ەمەس، وعان مۇمكىندىگى جوقتار دا بار­شىلىق.

سونىمەن قاتار پارتيا مۇشە­لەرى وڭىرلەردى دامىتۋعا قاتىستى جۇيەلى پايىمنىڭ جوقتىعىن دا اتاپ ءوتتى. كەڭەس توراعاسىنىڭ ورىنباسارى، دەپۋتات ءامىرحان راحىم­جانوۆ اۋىلدىق ەلدى مەكەندەرگە ىرىكتەمەلى تالداۋ جۇرگىزۋ كەزىن­دە، اۋدانداردىڭ كوپ بولىگى جوبا­عا كىرمەي قالاتىنى بەلگىلى بولعا­نىن باسا ايتتى. مىسالى، اقمو­لا وبلىسىنداعى اۋداندار اراسىن­دا ايتارلىقتاي ايىر­ما­شى­لىق بايقالادى. استرا­حان
اۋدانىندا ىرىكتەلگەن اۋىلدار اۋىل حالقىنىڭ 78%-ىن قامتىسا، ال اقكول اۋدانىندا بۇل كورسەتكىش – تەك 11%-ىن قامتىپ وتىر.

كەڭەس مۇشەسى، دەپۋتات ۆەرا كيم تىرەك جانە سەرىكتەس اۋىل­داردى دامىتۋدىڭ جول كارتا­لارىنىڭ دەرەكتەرىنە سايكەس، كەي­بىر اۋىلدىق ەلدى مەكەندەردە تۇرعىنداردىڭ تابيعي اعى­نىن قوسپاعاندا، جوبانى ىسكە اسى­رۋ كورسەتكىشتەرى بارلىق كەزەڭ­دە وزگەرمەيتىنىن اتاپ ءوتتى. سونى­مەن قاتار «قارجى­لان­دىرى­لاتىن جوبالارعا جۇرگى­زىلگەن تالداۋ جۇمىستارى قولداۋ كور­­سە­تى­لەتىندەردىڭ اراسىندا دامۋعا ەمەس، اعىمداعى جوندەۋگە باعىت­تالعان جوبالار باسىم ەكەنىن كورسەتەدى. مۇنداي جاعدايدا، ءبىز 3،5 مىڭ اۋىلدى ءىس جۇزىندە جاڭ­عىرتا الامىز با جانە اۋىل تۇرعىندارىنىڭ 88%-ىنىڭ ءومىر ساپاسىن جاقسارتۋعا قاتىستى بەر­گەن ۋادەلەرىمىز بوس ءسوز بولىپ قال­ماي ما؟»، دەدى ۆەرا كيم.

پارلامەنت ءماجىلىسىنىڭ دەپۋتاتى ەكاتەرينا سمىشلياەۆا جانە ەكونوميست يارالي حاليلوۆ «اۋىل – ەل بەسىگى» جوباسىن وڭىر­لەر­دى دامىتۋ، جۇمىسپەن قام­تۋ جا­نە بيزنەستى قولداۋ، سۋار­مالى جەر­لەردى ءبولۋ جانە تۇ­ر­عىن ءۇي سالۋ جونىندەگى باسقا دا مەم­لەكەتتىك باعدارلامالارمەن ۇي­لەستىرۋدىڭ ماڭىزدىلىعىن اتاپ ءوتتى.

وتىرىس قورىتىندىسى بو­يىنشا «اۋىل – ەل بەسىگى» جوباسىن ىسكە اسىرۋ اياسىندا اتقارىلاتىن جۇمىستاردىڭ ساپاسىنا جانە بيۋدجەت قاراجاتىنىڭ يگەرىلۋىنە جۇيەلى مونيتورينگ جۇرگىزۋ بو­يىنشا كەڭەس پەن ۇلتتىق ەكونوميكا مينيسترلىگىنە بىرلەسىپ جۇمىس ىستەۋ تۋرالى شەشىم قا­بىلداندى. كەڭەس مۇشەلەرى، ءىرى قوعامدىق ۇيىمداردىڭ وكىل­دەرى وسى جۇمىسقا قاتىسۋعا دايىن ەكەندىكتەرىن ءبىل­دىر­دى. قازاق­ستان ازاماتتىق اليان­سى­نىڭ پرە­­زي­دەنتى بانۋ نۇرعا­زيە­ۆا اليانس­تىڭ قۇرامىنا كىرە­تىن ۇيىم­داردىڭ مۇشەلەرى وسى جۇ­مىسقا تىكەلەي قاتىساتىنىن اتاپ ءوتتى.

سوڭعى جاڭالىقتار

حەم اعاي

ادەبيەت • كەشە

نەسيە كورسەتكىشى ارتتى

ەكونوميكا • كەشە

ۇقساس جاڭالىقتار