قوعام • 15 مامىر، 2021

ەلىمىزدىڭ ادام قۇقىقتارى جونىندەگى ۋاكىلى اسەل ايتباەۆا ءىسىن باقىلاۋعا الدى

31 رەت كورسەتىلدى

ەلىمىزدىڭ ادام قۇقىقتارى جونىندەگى ۋاكىلى ەلۆيرا ءازيموۆا قايعىلى جاعدايدا قىزىنان ايىرىلعان اناعا زاڭدىق تۇرعىدان كومەك بەرۋگە دايىن ەكەنىن ايتىپ، گرۋزيادا قايتىس بولعان اسەل ايتپاەۆاعا قاتىستى ءىستى ءوز باقىلاۋىنا الدى، دەپ حابارلايدى Egemen.kz

«قازاقستان ادام قۇقىقتارى جونىندەگى بىرنەشە حالىقارالىق قۇجاتتىڭ قاتىسۋشىسى. ونىڭ ۇستىنە قازاقستان مەن گرۋزيا اراسىندا ازاماتتىق جانە قىلمىستىق ىستەر بويىنشا زاڭدىق كومەك كورسەتۋ تۋرالى بولەك كەلىسىم بار. وسىنداي قىلمىس جاسالعاندا بۇل قۇجات قوس ەلدىڭ پروكۋراتۋرالارىنا تىكەلەي بايلانىستا جۇمىس ىستەۋىنە مۇمكىندىك بەرەدى. ونىڭ ىشىندە كۇدىكتىلەردى قاماۋ، جاۋاپ الۋ ءۇشىن ءبىر مەملەكەتتىڭ اۋماعىنان ەكىنشى مەملەكەتتكە تاسىمالداۋ سىندى شارالار كىرەدى»، دەدى ەلۆيرا ءازىموۆا.

ەلۆيرا ءازىموۆانىڭ ايتۋىنشا، تاعى ءتورت حالىقارالىق كونۆەنتسيا بار. بۇل ادام ساۋداسىنا قارسى كۇرەسكە قاتىستى جەكە كونۆەنتسيالار جانە ولارعا قورىتىندى حاتتامالار. گرۋزيا بۇۇ-نىڭ وسى ءتورت قۇجاتىنىڭ قاتىسۋشىسى بولسا، وندا حالىقارالىق قۇجاتتاردى وسى قىلمىستى تەرگەۋ جۇرگىزۋ ءۇشىن پايدالانۋعا بولادى.

وسى ورايدا ادام قۇقىقتارى جونىندەگى ۋاكىل ەكى تاراپتىڭ دا قۇقىق قورعاۋ ورگاندارىنىڭ بىرلەسە جەدەل جۇمىس ىستەۋى وتە ماڭىزدى ەكەنىن جەتكىزدى.

«وكىنىشكە قاراي، مەندەگى اقپارات بويىنشا اسەل ايتپاەۆانىڭ اناسى قازاقستانعا كەلگەننەن كەيىن 6 مامىردا تۇرعىلىقتى جەرى بويىنشا پوليتسيا دەپارتامەنتىنە وسى جاعداي بويىنشا قاجەتتى شارالار قابىلداۋ تۋرالى ءوتىنىش جازدى. بىراق 6 مامىردان بەرى پوليتسيا دەپارتامەنتى تاراپىنان قانداي شارالار قولدانىلعانى تۋرالى اقپارات ءالى جوق. سوندىقتان ارينە، مەن قىزدىڭ اناسىنا كومەكتەسەمىن»، دەدى ەلۆيرا ءازىموۆا.

ەسكە سالا كەتەيىك، گرۋزيادا 26 جاستاعى قازاقستاندىق بەلگىسىز جاعدايدا كوز جۇمدى. سونداي-اق كەشە گرۋزيانىڭ اقپارات كوزدەرى وتانداسىمىز اسەل ايتپاەۆانى زورلاپ، ءوز-وزىنە قول جۇمساۋعا يتەرمەلەگەنى ءۇشىن كۇدىككە ىلىنگەن قىلمىسكەر بەسيك توردۋانى تەرگەۋ قۇجاتىنىڭ كوشىرمەسىن جاريالاعان ەدى.

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

اقتوبە وبلىسىنا باس يمام تاعايىندالدى

تاعايىنداۋ • 11 ماۋسىم، 2021

ۇقساس جاڭالىقتار