جاڭا كلۋبتىڭ ارتىقشىلىعى – بۇل جەردە بالالاردىڭ دا, ەرەسەكتەردىڭ دە بوس ۋاقىتىن وتكىزۋى ءۇشىن بارلىق جاعداي جاسالعان. جاڭا اۋلا كلۋبىندا بالالار مەن ەرەسەكتەردىڭ سپورتپەن, يوگامەن اينالىسۋى, سول سياقتى دويبى, شاحمات, توعىزقۇمالاق ويناپ, دومبىرا شەرتۋى ءۇشىن مۇمكىندىك قاراستىرىلعان. قىزدار ءۇشىن اسپازدىق كۋرستار بار. اۋلا كلۋبىنىڭ ىشىندە كىتاپحانا دا بار.
«ۇلكەن كىسىلەر جاستارعا ىلعي دا ۇلگى بولادى. مۇندا ولار وسكەلەڭ ۇرپاققا ومىردەگى تاجىريبەسىمەن ءبولىسىپ, ولارمەن بىرگە دويبى, شاحمات, توعىزقۇمالاق وينايدى. ۇركەر ەلدى مەكەنىندە كوپبالالى وتباسىلار از ەمەس. بۇل اۋماقتا شامامەن 20 مىڭ ادام تۇرادى. سول سەبەپتى مۇندا ۇلكەن اۋلا كلۋبىن قۇرۋ قاجەت بولدى. ەلوردا اكىمى التاي كولگىنوۆتىڭ تاپسىرماسى بويىنشا بۇل اۋداندا بوس ۋاقىت وتكىزۋ ورتالىعىن اشتىق», دەپ اتاپ ءوتتى جاستار ساياساتى ماسەلەلەرى باسقارماسىنىڭ باسشىسى قايرات قامباروۆ.
بالالار مەن ەرەسەكتەر ەلورداداعى اۋلا كلۋبتارىنىڭ بارىنە تەگىن قاتىسا الادى. سونىمەن قاتار جىل سوڭىنا دەيىن ەلوردادا بىرقاتار اۋلا كلۋبىن اشۋ جوسپارلانىپ وتىر.
«بۇرىن ۇيىرمەلەرگە بارۋ ءۇشىن قالاعا اۆتوبۋسپەن قاتىناپ, جولىمىزدىڭ وزىنە ءبىر ساعاتىمىز كەتەتىن. ەندى اۋدانىمىزدىڭ دا ءوز اۋلا كلۋبى بار. مەن وعان قاتىسىپ قانا قويماي, ەكى كۋرس ۇسىنعىم كەلەدى. ءبىرىنشىسى – بالالارعا ارنالعان اكتەرلىك شەبەرلىك ءدارىسى, ەكىنشىسى – گيدروپونيكا ۇيىرمەسى. وندا ءبىز سۋدا وسەتىن وسىمدىكتەردى عانا وسىرەمىز. سول سياقتى يدەيالاردى جۇزەگە اسىراتىن ەكو-سىنىبىمىز بار», دەپ اتاپ ءوتتى يگور ەسىمدى اۋدان تۇرعىنى.
نۇر-سۇلتاندا اۋلا كلۋبتارىنىڭ سانى ەداۋىر ارتتى. قازىرگى ۋاقىتتا 28 اۋلا كلۋبى جۇمىس ىستەيدى, ال وندا شامامەن ءۇش مىڭ بالا وقيدى.
نۇر-سۇلتان قالاسىنىڭ اكىمدىگى مەملەكەت باسشىسىنىڭ تاپسىرماسى بويىنشا بوس ۋاقىت ورتالىقتارىن قۇرۋعا, قوعامدىق كەڭىستىكتەردى (ساياباقتار, گۇلزارلار, جەلەكجولدار), قالا تۇرعىندارىنىڭ سپورتپەن شۇعىلدانۋىنا, تازا اۋادا بوس ۋاقىتىن وتكىزەتىن اۋلا اۋماقتارىن اباتتاندىرۋعا ەرەكشە كوڭىل بولەدى. بۇل جۇمىس بارلىق اۋداندا, سونىڭ ىشىندە تۇرعىن الاپتارىندا جۇرگىزىلىپ جاتىر.
