نەگىزى, ەكى بوكسشىنىڭ جەكپە-جەك وتكىزۋ ۋاقىتى كەرىسىنشە بولۋى كەرەك ەدى. سەبەبى بيىل عانا 31 جاسقا تولعان الۆارەستىڭ كاسىپقوي بوكس الەمىندە كەمىندە 5-6 جىل جۇرەتىن مۇمكىندىگى بار جانە سوعان سايكەس قازىر اسىعىستىق تانىتپاسا دا, ءبىرتالاي جەكپە-جەك وتكىزىپ ۇلگەرەدى. ال گولوۆكين بولسا, انە-مىنە دەگەنشە قولعابىن شەگەگە ىلۋگە دايىن تۇر. جەرلەسىمىز ءساۋىر ايىندا 39 جاسىن تويلاعانى بارشاعا بەلگىلى. سوندىقتان ەندى قالعان 1-2 جىلدىڭ ىشىندە شارشى الاڭدا ءجيى بوي كورسەتىپ, مۇمكىندىگىنشە اتى الەمگە ايگىلى بوكسشىلارمەن جۇدىرىقتاسىپ, ءوز مىقتىلىعىن دالەلدەۋى كەرەك.
ونىڭ ۇستىنە, گولوۆكين 2019 جىلدىڭ ناۋرىزىندا DAZN ستريمينگتىك پلاتفورماسىمەن ءۇش جىلعا التى جەكپە-جەك ۇيىمداستىرۋعا كەلىسكەن بولاتىن. ياعني كەلىسىم بويىنشا جىل سايىن ەكى كەزدەسۋ وتكىزۋگە مىندەتتى. وتانداسىمىز العاشقى جىلى جوسپارداعى ەكى جەكپە-جەگىن كانادالىق ستيۆ روللس پەن ۋكراينالىق سەرگەي دەرەۆيانچەنكومەن وتكىزسە, بىلتىر پاندەمياعا بايلانىستى ءبىر-اق رەت شارشى الاڭعا شىقتى. ەستەرىڭىزدە بولسا, جەلتوقسان ايىندا پولشالىق كاميل شەرەمەتامەن قولعاپ ءتۇيىستىرىپ, 7-راۋندتا تەحنيكالىق نوكاۋتپەن جەڭىسكە جەتكەن ەدى. سونداي-اق ورتا سالماقتاعى IBF تۇجىرىمىنىڭ بەلبەۋىن ءبىرىنشى مارتە ءساتتى قورعاعان-دى.
مەرزىمى بيىل اياقتالاتىن كەلىسىمنىڭ ءالى وتكىزىلمەگەن ءۇش كەزدەسۋى بار. كەيبىر شەتەلدىك باق وكىلدەرىنىڭ مالىمەتى بويىنشا, شەرەمەتامەن وتكەن كەزدەسۋ جوعارىداعى كەلىسىمشارت اياسىنان تىس ۇيىمداستىرىلعان جانە 2020 جىلى كەزدەسۋ بولمادى دەپ ساناپ, DAZN كەلىسىمدى تاعى ءبىر جىلعا سوزعان. ەسەسىنە ستريمينگتىك ارنانىڭ ءۇش جىلدا التى ايقاس وتكىزگەنى ءۇشىن گولوۆكينگە تولەيتىن اۋەلدەگى 100 ميلليون دوللار اقشاسى دا ازايعان.
وتانداسىمىزدىڭ ەكىنشى پروموۋتەرى جانە DAZN ستريمينگتىك پلاتفورماسىنىڭ باسشىسى ەددي حيرن ءبىر سۇحباتىندا گولوۆكينگە بيىل ەكى جەكپە-جەك ۇيىمداستىرىپ بەرۋدى جوسپارلاپ جاتقانىن مالىمدەدى. بىراق ناقتى قاي بوكسشىلارمەن كەلىسسوز جۇرگىزىپ جاتقانىن اشىپ ايتپادى. الدىن الا مالىمەتتەر بويىنشا جەرلەسىمىز الداعى تامىزدا 2012 جىلعى لوندون وليمپياداسىنىڭ جۇلدەگەرى, IBF رەيتينگىندە 5-ورىندا تۇرعان برازيليالىق ەسكيۆە فالكاومەن (28-0, 20 كو) كەزدەسىپ, IBF بەلدىگىن قورعاۋى مۇمكىن. ال جەلتوقساندا ورتا سالماقتاعى WBA تۇجىرىمى بويىنشا سۋپەرچەمپيون بەلدىگىنىڭ يەگەرى 35 جاستاعى جاپونيالىق رەتا مۋراتامەن (16-2, 13 كو) IBF پەن WBA بەلبەۋىن ساراپقا سالماق.
دەمەك گولوۆكيننىڭ بيىل الۆارەسپەن ءۇشىنشى مارتە جەكپە-جەك وتكىزۋ جوسپارى جوق سياقتى. سونداي-اق «كانەلو» دا تريلوگياعا اسا قۇلشىنىپ تۇرماعان سىڭايلى. سوندەرستى جەڭگەننەن كەيىن مەكسيكالىق «سارى بالا» جۋرناليستەرگە بەرگەن سۇحباتىندا گولوۆكين ەكىنشى ورتا سالماققا كوتەرىلەتىن بولسا عانا ءۇشىنشى ايقاسقا كەلىسىم بەرەمىن دەدى.
جالپى, دۇنيە ءجۇزىنىڭ بوكس جانكۇيەرلەرى تاراپىنان گولوۆكين-الۆارەس اراسىنداعى ءۇشىنشى ايقاسقا سۇرانىس ءالى دە ازايعان جوق. دەگەنمەن ۋاقىت وتكەن سايىن ەكى الىپتىڭ اراسىنداعى كەزدەسۋ وتپەيتىنى ايقىندالىپ كەلە جاتسا دا, كوپ بوكس جانكۇيەرىن ەكى بوكسشىنىڭ جەكپە-جەكتەرىن كورسەتۋ قۇقىعى ءبىر ارناعا, ياعني DAZN ستريمينگتىك پلاتفورماسىنا تيەسىلى جانە ونىڭ باسشىسى ەددي حيرن بولعاندىقتان, ۇمىتتەرىن ۇزبەي كەلەدى. تريلوگيادان ءتاپ-ءتاۋىر قارجىعا كەنەلەتىنىن بىلەتىن حيرن, بالكىم بۇل كەزدەسۋدى كەلەسى جىلى گولوۆكيننىڭ كاسىپقوي بوكستاعى قوشتاسۋ جەكپە-جەگى رەتىندە ۇيىمداستىرىپ بەرۋدى كوزدەپ وتىرعان شىعار.
