تاقىرىپتىق كورمە ءۇشىن قىلقالام شەبەرى ارنايى 30-دان استام سۋرەت سالعان. ا.ءابجانوۆانىڭ تۋىندىلارىنان ونىڭ شەبەرلىگىن عانا ەمەس, تۋعان ولكەسىنە دەگەن سۇيىسپەنشىلىگى مەن تابيعاتقا تاڭدانىسىن دا اڭعارۋعا بولادى. سۋرەتشى ءوزىنىڭ شىعارماشىلىعى ارقىلى كورەرمەندى تابيعاتتى باعالاۋعا جانە قورعاۋعا شاقىرادى.
ءىس-شاراعا شەت مەملەكەتتەردىڭ ەلشىلەرى مەن ديپلوماتيالىق كورپۋستارىنىڭ وكىلدەرى, سۋرەتشىلەر, ونەرتانۋشىلار مەن ونەر قايراتكەرلەرى, قازۇوۋ كوركەمسۋرەت فاكۋلتەتىنىڭ وقىتۋشىلارى, نۇر-سۇلتان قالاسىنداعى بالالار كوركەمسۋرەت مەكتەبى – يۋنەسكو كلۋبى مەن «AVANGARD» كوركەمسۋرەت مەكتەبىنىڭ پەداگوگتارى مەن وقۋشىلارى قاتىستى.
– انار ءابجانوۆانىڭ ەڭبەكتەرىندە ەلباسىنىڭ « ۇلى دالانىڭ جەتى قىرى» ماقالاسىنىڭ مازمۇنى شىعارماشىلىق نەگىزدە كورىنىس تاپقان. ن.ءا. نازارباەۆتىڭ ماقالالارى ونەر تىلىندە جاقسى سۋرەتتەلگەن. بۇگىن مۇندا بەينەلەۋ ونەرىن باعالايتىن جاندار جينالدى. وسى جەردەگى كوزدىڭ جاۋىن الاتىن كەرەمەت دۇنيەلەردى انار بۇگىنگى كورمە ءۇشىن ارنايى سالدى, – دەدى كورمەنىڭ سالتاناتتى اشىلۋىندا ەلباسى كىتاپحاناسىنىڭ ديرەكتورى باقىتجان تەمىربولات. ول اۆتورعا «نۇرسۇلتان نازارباەۆ. ءومىربايان» كىتابىن تارتۋ ەتتى.
سۋرەتشىنىڭ ايتۋىنشا, قازاقستاندىق قىزعالداقتار تاقىرىبىنا ارنالعان جۇمىستار توپتاماسىن جاساۋ يدەياسىنا ەلباسىنىڭ « ۇلى دالانىڭ جەتى قىرى» ماقالاسى شابىت بەرگەن. وندا ن.ءا. نازارباەۆ قازاقستان الما مەن قىزعالداقتىڭ تاريحي وتانى ەكەنىن اتاپ وتكەن. قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ جىلىندا ەلباسىنىڭ باعدارلامالىق ماقالاسىنىڭ مازمۇنى «قاراپايىم, بىراق بۇكىل الەم ءۇشىن وزىندىك ءمان-ماڭىزى زور» قىزعالداقتارعا ارنالعان جۇمىستاردىڭ جارىق كورۋىنە مۇرىندىق بولدى. ن.ءا. نازارباەۆتىڭ «وسىمدىكتەر الەمىنىڭ جاۋھارى» اتاعان گرەيگ قىزعالداقتارىنىڭ اسەمدىگى انار ءابجانوۆانى ىلە الاتاۋىنا شىققان كەزدە تاڭ قالدىرعان. گرەيگ قىزعالداقتارى بەينەلەنگەن جۇمىستار تسيكلى رەگەل, كولپاكوۆسكي قىزعالداقتارىنىڭ سۋرەتتەرىمەن تولىقتىرىلعان.
بيىلعى جىلى سۋرەتشىنىڭ شىعارماشىلىعىنا 20 جىل تولادى. انار ءابجانوۆانىڭ «الەم – ارمان قاناتىندا» اتتى العاشقى جەكە كورمەلەرىنىڭ ءبىرى 2012 جىلى ەلباسى كىتاپحاناسىنىڭ الاڭىندا (تۇڭعىش پرەزيدەنت مۋزەيىندە) «ۇكىلى ءۇمىت» شىعارماشىل جاستاردى قولداۋ جوباسى اياسىندا وتكىزىلگەن بولاتىن.
– تاۋلاردا وسەتىن قىزعالداقتاردىڭ گۇلدەگەن ءساتىن ەكىنىڭ ءبىرى كورە المايدى. بۇل سيرەك كەزدەسەتىن قۇبىلىس. سۇلۋلىعىنا ءتىل جەتپەيدى. مەن وسى كەرەمەتتى كورىپ, قاعازعا تۇسىرە الدىم. تابيعاتتىڭ ءوزى ماعان سەنىم ارتقانداي. ءوز سۋرەتتەرىم ارقىلى تابيعاتقا, قازاقستان تاۋلارى مەن دالاسىنىڭ بىرەگەي سۇلۋلىعىنا ۇقىپتى قاراۋدى ناسيحاتتاعىم كەلەدى. قىزىل كىتاپقا ەنگەن وسىمدىكتەردى جويماي, كەرىسىنشە ساقتاپ قالۋدى سۇرايمىن, – دەدى انار ءابجانوۆا.
كورمە 11 ماۋسىمعا دەيىن جالعاسادى. كورمە ماتەريالدارىمەن ەلباسى كىتاپحاناسىنىڭ سايتىنداعى «كورمەلەر», «جوبالار» بولىمىنەن تانىسۋعا بولادى.
