قالا بويىنشا ساۋدا ورتالىقتارى مەن ساۋدا كەشەندەرىندەگى پۋنكتتەر سانى – 9. ولار – Mega Silk Way, Keruen, «حان شاتىر» جانە «ابۋ-دابي پلازا» ساۋدا ويىن-ساۋىق ورتالىقتارى, «ازيا پارك» جانە «بيگ شانحاي» ساۋدا كەشەندەرى, ورتالىق بازار, «الەم» جانە «ارتەم» ساۋدا ورتالىقتارى. اتالعان ەگۋ ايماقتارىندا شامامەن 14 مىڭ ازامات ۆاكتسينا العان.
حالىقتىڭ جاپپاي ۆاكتسينا الۋى قالىپتى تىرشىلىگىمىزگە ورالۋدىڭ بىردەن-ءبىر جولى ەكەنى انىق. ال جۇرتتىڭ تۇگەل ۆاكتسينا الىپ, ساقتانعانىنشا قاۋىپسىزدىك ەرەجەلەرىن قاتاڭ ۇستانعان ابزال. دەگەنمەن نۇر-سۇلتان قالاسى «قىزىل ايماقتا» ەكەنىن بىلسە دە, كارانتين رەجىمىن قاپەرىنە ىلمەي, كاسىبىن دوڭگەلەتىپ جاتقان كاسىپورىندار سانى ازايماي تۇر. ەلورداداعى مونيتورينگتىك توپتار كارانتين رەجىمىن ساقتاۋ تۇرعىسىنان كاسىپكەرلىك وبەكتىلەرىندە تەكسەرۋ جۇرگىزىپ كەلەدى. ەسكەرتۋ بەرىلىپ, جاۋاپكەرشىلىككە تارتىلعانىنا قاراماستان قالانىڭ كەيبىر مەكەمەلەرى كارانتيندىك شەكتەۋلەردى ۇدايى بۇزۋدا. مەرەكەلىك دەمالىس كۇندەرىنىڭ بىرىندە كارانتيندىك تىيىمدارعا قاراماستان سارىارقا اۋدانىندا ورنالاسقان «گاۋھارتاس» مەيرامحاناسىندا 100-گە جۋىق ادامعا ارناپ اۋىزاشار وتكىزىلدى.
سول سياقتى 9 مامىر كۇنى تاعى بەس مەكەمە كارانتين تالاپتارىن بۇزعانى انىقتالدى. Ashyq جوباسىنا قاتىساتىن Line Brew مەيرامحاناسى تىيىم سالىنعانىنا قاراماستان ءتۇن ورتاسىنان كەيىن دە جۇمىس ىستەدى. سونداي-اق ەلوردانىڭ سانيتارلىق دارىگەرىنىڭ قاۋلىسىن بۇزعانى ءۇشىن «پالاۋ ورتالىعى» اسحاناسى, «بازيليك» جانە «پاناچي» مەيرامحانالارى اكىمشىلىك جاۋاپكەرشىلىككە تارتىلدى. بۇل مەكەمەلەر دەمالىس كۇنى دە توقتاۋسىز جۇمىس ىستەدى. دەمالىس كۇنى جۇمىس ىستەۋ سانيتارلىق دارىگەردىڭ قاۋلىسى بويىنشا رۇقسات ەتىلمەگەن. كارانتين رەجىمى سول سياقتى Yamato ويىن كلۋبىندا دا بۇزىلدى.
الماتى اۋدانىندا «تاپچان» جانە «بەلەس» كافەلەرى جۇمىس رەجىمىن بۇزعانى ءۇشىن جاۋاپكەرشىلىككە تارتىلدى. دەمالىس كۇندەرى انىقتالعان بۇزۋشىلىقتار بويىنشا ماتەريالدار ءتيىستى شارالار قابىلداۋ جانە كاسىپكەرلەردى جاۋاپكەرشىلىككە تارتۋ ءۇشىن اۋداندىق سانيتارلىق-ەپيدەميالىق باقىلاۋ باسقارمالارىنا جىبەرىلدى.
ەستەرىڭىزگە سالا كەتەيىك, نۇر-سۇلتان ەپيدەميالىق احۋالدى باعالاۋ ماتريتساسى بويىنشا ەكى ايدان بەرى «قىزىل ايماقتا» تۇر. قالاداعى جاعداي ءالى دە تۇراقسىز بولىپ وتىر. جاعدايدىڭ ناشارلاۋىنا جول بەرمەس ءۇشىن قالا تۇرعىندارى مەن قوناقتارى, سونداي-اق كاسىپكەرلىك سۋبەكتىلەرى سانيتارلىق نورمالاردى قاتاڭ ساقتاۋى, دارىگەرلەر مەن ەپيدەميولوگتەردىڭ ۇسىنىستارىن ورىنداۋى ءتيىس.
قازىرگى ۋاقىتتا قاۋىپتى ۆيرۋسپەن كۇرەسۋدىڭ جالعىز ءتيىمدى ءادىسى ۇجىمدىق يممۋنيتەتتى دامىتۋ بولىپ سانالادى. بۇل حالىقتى جاپپاي ۆاكتسينالاۋ جاعدايىندا عانا مۇمكىن. قالادا بۇل ءۇشىن ءتيىستى جاعدايدىڭ ءبارى جاسالعان.
