تايلاندتاعى بيلىك پەن وپپوزيتسيا اراسىنداعى قاقتىعىس جاڭا سيپات الا باستادى.
بانگكوكتىڭ ىسكەر ورتالىعىندا بىرنەشە جارىلىستار بولعان. وندا گراناتامەتتەر پايدالانىلعان كورىنەدى. بيلىك جاعى ءالى دە پاراساتتىلىق تانىتىپ, ونى وپپوزيتسيا جاسادى دەپ وتىرعان جوق. قالاي بولعاندا دا, مۇنىڭ پرەمەر-مينيستر ابحيسيت ۆەتچاچيۆانىڭ ۇكىمەتىنە قارسى ارەكەت ەكەنى انىق. سوڭعى ەكى اپتاداي ۋاقىتتا ەلۋگە تارتا ديۆەرسيالىق ارەكەت جاسالىپتى.
تۇرىكتەرمەن تۇسىنىسپەدى
ارمەنيا پرەزيدەنتى سەرج سارگسيان ارميان-تۇرىك كەلىسىمىنىڭ قاۋلىلارىن پارلامەنتتە ماقۇلداۋدى توقتاتا تۇرۋ جونىندە شەشىم شىعاردى. بۇل قادامعا ارمەنيا پرەزيدەنتى تۇرىك جاعى ايىپتى دەپ ەسەپتەيدى. جىل بويى ولار ءتۇرلى شارتتاردى العا توسىپ, ەكى ەل اراسىنداعى ديپلوماتيالىق قارىم-قاتىناستىڭ ورنىعۋىنا كەدەرگى جاساپ كەلگەن كورىنەدى. ولار 1915 جىلعى 24 ساۋىردەگى ارمياندارعا قارسى جاسالعان گەنوتسيدتى مويىنداعىسى جوق. سوندا 1,5 ميلليونداي ارميان قىرىلعانى بەلگىلى. ونى ارميانداردىڭ جادىنان وشىرە المايسىڭ.
بۇرىنعىدان دا سوراقى
يسلاندياداعى ايتۋعا قيىن ەيافياتلايوكۋدل جانارتاۋىنىڭ اتقىلاۋىنان تۋىنداعان قيىندىق ءسىرا ۇزاق ۋاقىت ۇمىتىلماس. ونىڭ ەكونوميكالىق زاردابى ءتۇرلى جەر سىلكىنىستەرىنەن دە, توپان سۋلاردان دا زور بولدى. تەك ەۋروپانىڭ اۆيا تاسىمالى ميللياردتاعان دوللار شىعىنعا باتتى. ال ادامداردىڭ بارار جەرىنە جەتە الماي, قينالعاندارى ءوز الدىنا. زەرتتەۋشى عالىمدار زارداپ مۇنىمەن بىتپەيتىنىن ايتىپ, جۇرتتى تاعى دا قورقىتىپ وتىر. ادەتتە اتالعان جانارتاۋدان كەيىن ونىڭ سەرىگى كاتلا وياناتىن كورىنەدى. بۇرىندارى تالاي رەت سولاي بولىپتى. عالىمداردىڭ ايتۋىنشا, ونىڭ كۇشى سەرىگىنەن ون ەسە زور كورىنەدى. ول جارىلسا, ءبىر سويقان بولماق.
لاڭكەستەرگە سوققى
يراكتىڭ ارناۋلى قىزمەتى اقش-تىڭ ارناۋلى قىزمەتىمەن بىرىگە وتىرىپ, اتىشۋلى ء“ال-كايدانىڭ” وسى ەلدەگى توبىنىڭ ەكى باسشىسى ءابۋ ومار ءال-باعدادي مەن ءابۋ ايۋبي ءال- ءماسريديدىڭ كوزىن جويعانى حابارلاندى. ولاردىڭ تيكريت قالاسىنىڭ ماڭىندا تىعىلىپ جۇرگەنى انىقتالعان سوڭ, باعىتتالاتىن زىمىرانمەن اتقىلانىپتى. اتالعان لاڭكەستەردىڭ جويىلعانىن ناقتى انىقتاۋ ءۇشىن ولاردىڭ دەنەلەرى دنك تەستىلەۋىمەن زەرتتەلىپ, كوز جەتكىزىلگەن كورىنەدى. ءسىرا, لاڭكەستەردىڭ باسار جەر, بارار تاۋى قۋسىرىلىپ بارا جاتسا كەرەك.
قايىرىمدى باي
دۇنيە ساراڭعا بىتەدى, باي جومارت بولمايدى دەگەن بار. بىراق قىتاي ميللياردەرى يۋي پەننيان ونى جوققا شىعاردى: قوزعالمايتىن م ۇلىك ماگناتى ءوزىنىڭ بار بايلىعىن – 1,2 ميلليارد دوللار كولەمىندەگى دۇنيەسىن قايىرىمدىلىق قورىنا اۋدارىپتى. “مەنىڭ بۇل قادامىم ەلدىڭ باسقا دا اۋقاتتى ادامدارىنا ونەگە بولار”, دەپتى جومارت جان. كىم بىلەدى.
كىشى ۇلدان ساقتان
سولتۇستىك كورەيانىڭ حالقى العاش رەت كيم چەن ءيردىڭ كىشى بالاسى, بولاشاق بيلىك تىزگىنىن ۇستايدى دەگەن كيم چەن ۋننىڭ سۋرەتىن كورىپ, “قۋانىشقا بولەندى”. ونى ەلدىڭ باس گازەتى “نودون سينمۋن” جاريالادى. بۇعان دەيىن ول جايىندا كوپ اڭگىمە ايتىلىپ, 27 جاسار مۇراگەر ەڭ جوعارعى ورگان – كحدر-دىڭ مەملەكەتتىك قورعانىس كوميتەتىنە سايلانسا دا, قانداي سەبەپپەن ەكەنى بەلگىسىز, ونىڭ سۋرەتى باسىلماعان ەكەن. كۇنى كەشە قىرعىزستان پرەزيدەنتى باكيەۆ كىشى بالاسى ماكسيمدى بيلىككە اكەلگەندە, ونىڭ اقىرى اكەسىن بيلىكتەن قۋعا سوقتىرىپ ەدى, مۇندا دا سولاي بولماس پا ەكەن دەگەن اڭگىمە ايتىلىپ ءجۇر.
40 جىل بويى وشپەگەن
قاراقۇمنىڭ تۇركىمەنستانعا قارايتىن ايماعىندا دارۆاز دەيتىن جەردە 40 جىل بويى گاز جانىپ جاتىر. اسا قۇندى وتىننىڭ بوستان بوسقا جانىپ, ىسىراپ بولۋى ءوز الدىنا, ول وسى ماڭداعى بايلىقتى يگەرۋگە مۇمكىندىك بەرمەيتىن كورىنەدى. ونى كەزىندە گەولوگيالىق بارلاۋ جۇمىستارىن جۇرگىزگەننەن كەيىن, قۋىستاردا قالعان گازدى جاعىپ جىبەرمەك ويمەن, وزدەرى تۇتاتقان ەكەن, ەندى 40 جىل بويى ونى سوندىرە الماي الەك.
ەسىرتكىمەن ەلىرگەن
تۇرىكتىڭ اتاقتى ءانشىسى تارحانعا ەسىرتكىنى ساقتاعان جانە ونى پايدالانعان دەگەن ايىپ تاعىلىپ وتىر. ونىڭ ۇيىنەن 12 گرامم گاشيش تابىلىپتى. بۇل ۇلكەن قىلمىس سانالادى. بۇعان 17 ادامنىڭ قاتىسى بار كورىنەدى. ولاردىڭ 15-ىنە بەس جىلدان 23 جىلعا دەيىن جازا بەلگىلەنسە, تارحاننىڭ ءوزى ءبىر-ەكى جىلعا بوستاندىعىنان ايىرۋ جازاسىنا كەسىلۋى مۇمكىن. ءسىرا, وعان الەمگە تانىمالدىلىعى كومەكتەسسە كەرەك.
ازىرلەگەن ماماديار جاقىپ.
